Surat News: સુરતના સચિન જીઆઇડીસી વિસ્તારમાં એક અત્યંત દુઃખદ ઘટના સામે આવી છે. ઘરે રમતી એક નાની બાળકીનું પાણીથી ભરેલી ડોલમાં ડૂબી જવાથી કરુણ મોત નીપજ્યું છે. આ ઘટનાએ સમગ્ર વિસ્તારમાં શોકની લાગણી ફેલાવી દીધી છે અને માતા-પિતામાં પણ ચિંતા વધારી છે.
મળતી માહિતી મુજબ, સચિન જીઆઇડીસી વિસ્તારમાં રહેતા શ્રી રામ રાજવંશીની નાની બાળકી પોતાના ઘરે રમતી હતી. રમતા-રમતા તે પાણીથી ભરેલી ડોલ પાસે પહોંચી હતી. આ દરમિયાન અચાનક સંતુલન ગુમાવતા તે ડોલમાં પડી ગઈ હતી. ડોલમાં ડૂબી જતાં બાળકી બેભાન થઈ ગઈ હતી.
તાત્કાલિક હોસ્પિટલ ખસેડાઈ
ઘટનાની જાણ થતાં જ પરિવારજનો ગભરાઈ ગયા હતા. બાળકીના પિતા તેને તાત્કાલિક સારવાર માટે સુરત સિવિલ હોસ્પિટલ લઈ ગયા હતા. હોસ્પિટલમાં ફરજ પરના તબીબોએ બાળકીને બચાવવા પ્રયાસ કર્યો હતો, પરંતુ ટૂંકી સારવાર બાદ તેને મૃત જાહેર કરવામાં આવી હતી. આ કરુણ ઘટનાથી પરિવાર પર આભ તૂટી પડ્યું છે. વિસ્તારના રહેવાસીઓએ પણ ઘટનાને લઈને શોક વ્યક્ત કર્યો છે. પ્રાથમિક માહિતી અનુસાર આ સમગ્ર ઘટના અકસ્માત હોવાનું સામે આવ્યું છે.
માતા-પિતા માટે ચેતવણીરૂપ ઘટના
નિષ્ણાતોના જણાવ્યા મુજબ, નાનાં બાળકો માટે ઘરમાં રાખવામાં આવેલા પાણીના વાસણો, ડોલ, ટાંકી અથવા અન્ય પાણી ભરેલા પાત્રો પણ ગંભીર જોખમ બની શકે છે. થોડા ઇંચ પાણીમાં પણ નાનાં બાળકો ડૂબી શકે છે. તેથી બાળકો રમતા હોય ત્યારે સતત નજર રાખવી, પાણીની ડોલ અને અન્ય વાસણો ઢાંકીને રાખવા તેમજ બાળકોની પહોંચથી દૂર રાખવા જેવી સાવચેતી અત્યંત જરૂરી છે.
પોલીસે સમગ્ર ઘટનાને લઈને જરૂરી કાયદેસરની કાર્યવાહી હાથ ધરી હોવાનું જાણવા મળ્યું છે. ઘટનાના વધુ વિગતો માટે તપાસ ચાલુ છે.
