Surat News: સુરતમાં તાજેતરમાં થયેલી પૂર દુર્ઘટનામાં મૃત્યુ પામેલા લોકોના પરિવારજનોને રાજ્ય સરકાર દ્વારા જાહેર કરાયેલી રૂ. 4 લાખની આર્થિક સહાય ચૂકવવાની પ્રક્રિયા શરૂ કરવામાં આવી છે. સરકારના નિયમો મુજબ સહાયની રકમ યોગ્ય અને કાયદેસર લાભાર્થી સુધી પહોંચે તે માટે વારસાઈ સંબંધિત ચકાસણીની કામગીરી હાલ ચાલી રહી છે. દરેક મૃતકના પરિવારની વિગતો એકત્રિત કરીને કયા વ્યક્તિને કાયદેસર રીતે સહાય મળવી જોઈએ તેની તપાસ કરવામાં આવી રહી છે. ચકાસણી પૂર્ણ થયા બાદ સહાયની રકમ સીધી લાભાર્થીના ખાતામાં જમા કરવામાં આવશે, જેથી સમગ્ર પ્રક્રિયામાં પારદર્શિતા જળવાઈ રહે.
ઘર-ઘર પહોંચી સરકાર આપી રહી છે સહાય
પૂર દુર્ઘટનાથી પ્રભાવિત પરિવારોને ઝડપથી રાહત મળે તે માટે રાજ્ય સરકાર અને જિલ્લા વહીવટી તંત્ર દ્વારા મોટાભાગના મૃતકોના ઘરે પહોંચી સહાય પહોંચાડવાની કામગીરી યુદ્ધના ધોરણે શરૂ કરવામાં આવી છે. અધિકારીઓ જરૂરી દસ્તાવેજોની ચકાસણી કરીને પાત્ર પરિવારોને સહાય મળે તેની ખાતરી કરી રહ્યા છે. ગૃહ રાજ્યમંત્રી હર્ષ સંઘવીએ જણાવ્યું હતું કે પૂર દુર્ઘટનામાં જીવ ગુમાવનારા પરિવારોની સરકાર સંપૂર્ણપણે સાથે છે. સરકાર દ્વારા સહાયની પ્રક્રિયા ઝડપથી પૂર્ણ કરવામાં આવી રહી છે અને કોઈપણ પાત્ર પરિવાર સહાયથી વંચિત ન રહે તેની ખાસ કાળજી રાખવામાં આવી રહી છે.
આ પણ વાંચો: અમદાવાદ ફટાકડા ફેક્ટરી દુર્ઘટના : PM મોદીએ PMNRFમાંથી ₹2 લાખની સહાય જાહેર કરી, રાજ્ય સરકાર આપશે મૃતકોના પરિવારને ₹4 લાખ
પીડિત પરિવારોને ઝડપથી આર્થિક સહારો આપવાનો પ્રયાસ
રાજ્ય સરકારના જણાવ્યા મુજબ પૂર દુર્ઘટનાના પીડિત પરિવારોને મુશ્કેલીના સમયમાં તાત્કાલિક આર્થિક સહાય મળે તે માટે તમામ વિભાગો વચ્ચે સંકલન કરીને કામગીરી કરવામાં આવી રહી છે. વારસાઈ ચકાસણી પૂર્ણ થતાં જ તબક્કાવાર રીતે રૂ. 4 લાખની સહાય ચૂકવવામાં આવશે, જેથી અસરગ્રસ્ત પરિવારોને શક્ય તેટલી વહેલી તકે રાહત મળી શકે.
