Surat News: સુરત શહેરમાં ભાડે કાર લઈને તેને બારોબાર સગેવગે કરી દેતા એક રીઢા આરોપીને સુરત ક્રાઈમ બ્રાન્ચે ઝડપી પાડી મોટો ભાંડો ફોડ્યો છે. આરોપીના કબજામાંથી અંદાજે રૂ. 25 લાખનો મુદ્દામાલ, જેમાં બે કારનો સમાવેશ થાય છે, કબજે કરવામાં આવ્યો છે. પ્રાથમિક તપાસમાં સામે આવ્યું છે કે આરોપી અલગ-અલગ લોકો પાસેથી ભાડે વાહનો લઈને તે પરત કરવાના બદલે ગેરકાયદેસર રીતે સગેવગે કરી દેતો હતો. વાહન માલિકો ભાડું અથવા ગાડીની માંગણી કરતા તેમને ધમકી આપતો હોવાનું પણ તપાસમાં સામે આવ્યું છે.
ક્રાઈમ બ્રાન્ચના અધિકારીઓને મળેલી ચોક્કસ બાતમીના આધારે આરોપીને સરદાર બ્રિજ નજીકથી ઝડપી પાડવામાં આવ્યો હતો. ત્યારબાદ તેની પૂછપરછ દરમિયાન અનેક ચોંકાવનારી વિગતો સામે આવી છે. પોલીસ હવે આરોપી સાથે અન્ય કોઈ વ્યક્તિ સંડોવાયેલી છે કે નહીં અને તેણે આવી જ રીતે અન્ય કેટલાં લોકોને ભોગ બનાવ્યા છે તેની તપાસ કરી રહી છે.
બાતમીના આધારે ગોઠવાયું ટ્રેપ
સુરત ક્રાઈમ બ્રાન્ચને માહિતી મળી હતી કે ભાડે લીધેલી કારો ગેરકાયદેસર રીતે સગેવગે કરનાર એક શખ્સ શહેરમાં ફરી રહ્યો છે. બાતમીના આધારે પોલીસે સરદાર બ્રિજ નજીક વોચ ગોઠવી હતી. ત્યાંથી દીપ હરેશભાઈ ડોબરિયાને ઝડપી લેવામાં આવ્યો હતો. તેની પ્રાથમિક પૂછપરછ દરમિયાન પોલીસે બે કાર કબજે કરી હતી. કબજે કરાયેલા વાહનોમાં કિયા સેલ્ટોસ અને મારુતિ સુઝુકી અલ્ટો (ફરિયાદમાં દર્શાવેલી વિગતો અનુસાર)નો સમાવેશ થાય છે. બંને વાહનો સહિત કુલ અંદાજે રૂ. 25 લાખનો મુદ્દામાલ પોલીસે જપ્ત કર્યો છે.
આ પણ વાંચો: અમદાવાદ ફટાકડા બ્લાસ્ટમાં મોટો ખુલાસો : 4થી વધુની અટકાયત, રામોલ PIએ બે વખત ફેક્ટરી બંધ કરવાની કરી હતી ભલામણ
11 મહિનાના ભાડાના બહાને લીધી કાર
તપાસમાં બહાર આવેલી વિગતો મુજબ, 9 ડિસેમ્બર, 2025ના રોજ આરોપીએ સચિન વિસ્તારમાં રહેતા નરસિંહભાઈ રાઠોડની માલિકીની સફેદ રંગની કાર 11 મહિનાના ભાડાના કરારથી લીધી હતી. પોલીસના જણાવ્યા પ્રમાણે, આરોપીએ શરૂઆતમાં માત્ર એક મહિનાનું ભાડું ચૂકવ્યું હતું, પરંતુ ત્યારબાદ ન તો બાકીનું ભાડું ચૂકવ્યું અને ન તો કાર પરત કરી. જ્યારે કારના માલિકે વારંવાર સંપર્ક કરીને ભાડું અથવા વાહન પરત આપવાની માંગ કરી ત્યારે આરોપીએ તેમને ધમકી આપી હતી. ફરિયાદ મુજબ, તેણે ફોન પર કહ્યું હતું કે જો ફરી સંપર્ક કરશો અથવા આજુબાજુ દેખાશો તો જીવતા નહીં છોડું. આ ઘટનાને પગલે પીડિતે પોલીસમાં ફરિયાદ નોંધાવી હતી અને ત્યારથી આરોપીની શોધખોળ ચાલી રહી હતી.
લગ્ન પ્રસંગના બહાને બીજી કાર ભાડે લીધી
તપાસ દરમિયાન વધુ એક મહત્વપૂર્ણ ઘટના સામે આવી છે. પોલીસના જણાવ્યા પ્રમાણે, 7 મે, 2026ના રોજ આરોપીએ પોતાના સાગરીતો સાથે મળીને સંદીપભાઈ અનિલભાઈ પાસેથી તેમની માલિકીની હ્યુન્ડાઈ કંપનીની કાર લગ્ન પ્રસંગ અને રાજસ્થાન પ્રવાસના બહાને સાત દિવસ માટે ભાડે લીધી હતી. નક્કી કરેલો સમય પૂર્ણ થયા પછી પણ આરોપીએ કાર પરત કરી નહોતી. તપાસમાં સામે આવ્યું છે કે તેણે કારમાં લગાવેલું GPS ડિવાઇસ અને નંબર પ્લેટ પણ કાઢી નાખી હતી, જેથી વાહનનું લોકેશન ટ્રેસ ન થઈ શકે.
પેમેન્ટ માંગતા માલિકને મોકલ્યો આત્મહત્યાનો વીડિયો
આ કેસમાં વધુ એક ચોંકાવનારી માહિતી સામે આવી છે. પોલીસના જણાવ્યા મુજબ, જ્યારે કાર માલિકે ભાડું અને વાહન પરત આપવા માટે દબાણ કર્યું ત્યારે આરોપીએ પોતાના સાગરીતો સાથે મળીને આત્મહત્યા કરવાનો વીડિયો બનાવી મોકલ્યો હતો.
આ સમગ્ર ઘટનાને લઈને વડોદરા શહેરના પાણીગેટ પોલીસ સ્ટેશનમાં પણ ગુનો નોંધાયો હતો. પોલીસે હવે આ કેસની વિગતો પણ સુરતમાં ચાલી રહેલી તપાસ સાથે સાંકળી છે, જેથી આરોપીના સમગ્ર ગુનાહિત નેટવર્કનો પર્દાફાશ થઈ શકે.
અગાઉ પણ નોંધાયો છે વિશ્વાસઘાતનો ગુનો
ક્રાઈમ બ્રાન્ચની તપાસમાં જાણવા મળ્યું છે કે દીપ હરેશભાઈ ડોબરિયા સામે અગાઉ પણ સરથાણા પોલીસ સ્ટેશનમાં વિશ્વાસઘાતનો ગુનો નોંધાઈ ચૂક્યો છે. પોલીસ હાલ તેના ગુનાહિત ઇતિહાસની વિગતવાર તપાસ કરી રહી છે. તપાસ એજન્સીઓને શંકા છે કે આરોપીએ માત્ર બે જ નહીં પરંતુ અન્ય અનેક લોકો પાસેથી પણ ભાડે વાહનો લઈને છેતરપિંડી આચરી હોઈ શકે છે. તેના મોબાઇલ ફોન, બેંક ટ્રાન્ઝેક્શન અને અન્ય ડિજિટલ પુરાવાઓની તપાસ કરવામાં આવી રહી છે.
