ભારત ધર્મશાળા નથી : શ્રીલંકાના તમિલ શરણાર્થીની અરજી ફગાવતા સુપ્રીમ કોર્ટનું નિવેદન

સુપ્રીમ કોર્ટે મદ્રાસ હાઈકોર્ટના આદેશને પડકારતી અરજી પર સુનાવણી કરતા કહ્યું કે શું ભારત દુનિયાભરના શરણાર્થીઓને આશ્રય આપવા તૈયાર છે? આપણે પહેલાથી જ 140 કરોડની વસ્તી સાથે સંઘર્ષ કરી રહ્યા છીએ. સુપ્રીમ કોર્ટે સોમવારે શ્રીલંકાના નાગરિક દ્વારા દાખલ કરવામાં આવેલી અરજી પર સુનાવણી કરવાનો ઇનકાર કર્યો હતો. જેમાં તેણે સજા પૂરી થયા બાદ દેશમાંથી દેશનિકાલને પડકાર્યો હતો. કોર્ટે સ્પષ્ટ કર્યું કે ભારત કોઈ 'ધર્મશાળા' નથી જ્યાં વિશ્વભરના શરણાર્થીઓને આશ્રય આપી શકાય.

જસ્ટિસ દીપાંકર દત્તા અને જસ્ટિસ કે. વિનોદ ચંદ્રનની બેન્ચે કહ્યું, શું ભારત વિશ્વભરના શરણાર્થીઓને આશ્રય આપવા માટે છે? આપણે પહેલાથી જ 140 કરોડની વસ્તી સાથે સંઘર્ષ કરી રહ્યા છીએ. આ કોઈ ધર્મશાળા નથી જ્યાં આપણે દરેક જગ્યાએથી આવતા વિદેશી નાગરિકોને સમાવી શકીએ.

સુપ્રીમ કોર્ટ મદ્રાસ હાઈકોર્ટના આદેશને પડકારતી અરજી પર સુનાવણી કરી રહી હતી. તેમાં કહેવામાં આવ્યું છે કે શ્રીલંકાના તમિલ નાગરિકે UAPA કેસમાં સાત વર્ષની સજા પૂર્ણ કર્યા પછી ભારત છોડી દેવું જોઈએ. અરજદારના વકીલે બેન્ચને જણાવ્યું હતું કે શ્રીલંકન તમિલ યુવક અહીં વિઝા પર આવ્યો હતો. તેના પોતાના દેશમાં તેનો જીવ જોખમમાં છે. તે ત્રણ વર્ષથી કોઈ પણ દેશનિકાલ પ્રક્રિયા વિના અટકાયતમાં છે.

જસ્ટિસ દીપાંકર દત્તાએ વકીલને પૂછ્યું, તમને અહીં સ્થાયી થવાનો શું અધિકાર છે? તો વકીલે કહ્યું કે અરજદાર શરણાર્થી છે અને તેની પત્ની અને બાળકો ભારતમાં સ્થાયી થયા છે. આના પર જસ્ટિસ દત્તાએ કહ્યું કે કલમ 21નું કોઈ ઉલ્લંઘન થયું નથી. તેમની સ્વતંત્રતા છીનવાઈ ગઈ. પરંતુ કલમ ૧૯ મુજબ, ભારતમાં સ્થાયી થવાનો મૂળભૂત અધિકાર ફક્ત ભારતીય નાગરિકોને જ છે. જ્યારે વકીલે કહ્યું કે અરજદારના પોતાના દેશમાં જ જીવ જોખમમાં છે, ત્યારે જસ્ટિસ દત્તાએ તેમને બીજા કોઈ દેશમાં જવા કહ્યું.

મામલો શું છે.

અરજદારની 2015 માં LTTE કાર્યકરો હોવાની શંકાના આધારે અન્ય બે લોકો સાથે ધરપકડ કરવામાં આવી હતી. તેમને ટ્રાયલ કોર્ટે UAPA હેઠળ દોષિત ઠેરવ્યા હતા અને 10 વર્ષની જેલની સજા ફટકારી હતી. મદ્રાસ હાઈકોર્ટે તેની સજા ઘટાડીને ત્રણ વર્ષ કરી હતી. હાઇકોર્ટે કહ્યું હતું કે સજા પૂર્ણ કર્યા પછી, તેમણે દેશ છોડવો પડશે. વકીલે જણાવ્યું હતું કે અરજદાર 2009 માં શ્રીલંકાના યુદ્ધમાં LTTE ના ભૂતપૂર્વ સભ્ય તરીકે લડ્યો હતા અને તેને ત્યાંથી હાંકી કાઢવામાં આવ્યા હતા. જો તેને પાછો મોકલવામાં આવશે તો તેના જીવને જોખમ થશે. તેમણે કહ્યું કે તેમની પત્ની અને પુત્ર ઘણી બીમારીઓથી પીડાઈ રહ્યા છે.