મગ પકવતા ખેડૂતો માટે સારા સમાચાર : ટેકાના ભાવે ખરીદી માટે આજથી ઓનલાઇન નોંધણીનો પ્રારંભ, મર્યાદિત સમય માટે નોંધણી ખુલ્લી

Gujarat Farmers Update: રાજ્યના મગ ઉત્પાદક ખેડૂતો માટે મહત્વના અને રાહતરૂપ સમાચાર સામે આવ્યા છે. ઉનાળુ મગના પાકને ટેકાના ભાવે (MSP) વેચાણ કરવા ઈચ્છતા ખેડૂતો માટે આજથી ઓનલાઈન નોંધણી પ્રક્રિયા શરૂ કરવામાં આવી છે. સરકાર દ્વારા જાહેર કરાયેલા ટેકાના ભાવ હેઠળ ખેડૂતો પોતાનો પાક વેચી શકે તે માટે રજિસ્ટ્રેશન ફરજિયાત બનાવવામાં આવ્યું છે. ખેડૂતો હવે 10 જૂન સુધી ઓનલાઈન અરજી કરી શકશે. સરકારના આ નિર્ણયથી ખાસ કરીને ઉનાળુ મગનું ઉત્પાદન કરનાર ખેડૂતોમાં ખુશીની લાગણી જોવા મળી રહી છે. બજારમાં મળતા અનિશ્ચિત ભાવ વચ્ચે હવે સરકાર દ્વારા નક્કી કરાયેલા ટેકાના ભાવે ખરીદી થવાને કારણે ખેડૂતોને યોગ્ય વળતર મળવાની આશા મજબૂત બની છે.

આજથી શરૂ થઈ ઓનલાઈન નોંધણી પ્રક્રિયા

રાજ્યમાં આજથી મગની ટેકાના ભાવે ખરીદી માટે ઓનલાઈન રજિસ્ટ્રેશન પ્રક્રિયાનો પ્રારંભ થયો છે. ખેડૂતો પોતાના પાકનું વેચાણ સરકારને કરવા માંગતા હોય તો સમયમર્યાદા પહેલાં નોંધણી કરાવવી જરૂરી રહેશે. કૃષિ વિભાગ દ્વારા જણાવ્યા મુજબ, નોંધણીની અંતિમ તારીખ 10 જૂન નક્કી કરવામાં આવી છે. ખેડૂતોને સમયસર અરજી પૂર્ણ કરવા અને જરૂરી દસ્તાવેજો સાથે પ્રક્રિયા પૂર્ણ કરવા અપીલ કરવામાં આવી છે, જેથી ખરીદી પ્રક્રિયા દરમિયાન કોઈ મુશ્કેલી ન સર્જાય

ઈ-ગ્રામ કેન્દ્ર પરથી પણ સરળતાથી કરી શકાશે નોંધણી

ખેડૂતોને સરળતા રહે તે માટે સરકાર દ્વારા ગ્રામ્ય સ્તરે પણ નોંધણીની સુવિધા ઉપલબ્ધ કરાવવામાં આવી છે. હવે ખેડૂતો ફિંગરપ્રિન્ટ અથવા ફેસ ઓથેન્ટિકેશન મારફતે નજીકના ઈ-ગ્રામ કેન્દ્ર પરથી પણ સરળતાથી ઓનલાઈન રજિસ્ટ્રેશન કરાવી શકશે. ખાસ કરીને ગ્રામ્ય વિસ્તારોમાં રહેતા અને ટેકનોલોજીથી દૂર ખેડૂતો માટે આ વ્યવસ્થા વધુ ઉપયોગી સાબિત થઈ શકે છે, જેથી તેઓ સરળતાથી સરકારની યોજનાનો લાભ લઈ શકે.

આ પણ વાંચો: ગુજરાતના પશુપાલકો માટે ફાયદાની વાત: ડેરી ફાર્મ માટે મોટી સહાય યોજના, પોર્ટલ પર શરૂ થઈ અરજી પ્રક્રિયા

રૂ.8768ના ટેકાના ભાવથી ખેડૂતોને મળશે રાહત

મગ ઉત્પાદક ખેડૂતોને આર્થિક રીતે સક્ષમ બનાવવા માટે કેન્દ્ર સરકાર દ્વારા પ્રતિ ક્વિન્ટલ રૂ.8,768નો ટેકાનો ભાવ નક્કી કરવામાં આવ્યો છે. આ ભાવ ખેડૂતોને બજારમાં મળતા ભાવ કરતાં વધુ વળતર અપાવવામાં મદદરૂપ થશે. સરકારના આ મહત્વપૂર્ણ નિર્ણયથી રાજ્યના ખેડૂતોમાં ઉત્સાહનું વાતાવરણ જોવા મળી રહ્યું છે.

કૃષિ વિભાગની ખેડૂતોને અપીલ

કૃષિ વિભાગ દ્વારા તમામ ખેડૂતોને અપીલ કરવામાં આવી છે કે, તેઓ છેલ્લી તારીખની રાહ જોયા વગર વહેલી તકે પોતાની નોંધણી કરાવી લે. નોંધણી દરમિયાન આધાર કાર્ડ, જમીનના દસ્તાવેજો અને બેંકની વિગતો જેવા તમામ જરૂરી દસ્તાવેજો સાથે રાખવા જરૂરી છે જેથી અરજી પ્રક્રિયામાં કોઈ પણ પ્રકારની ક્ષતિ ન રહે અને ખેડૂતોને નિર્ધારિત સમયે લાભ મળી શકે.