અઠવાડિયાના બીજા કારોબારી દિવસે મંગળવારે શેરબજારમાં મિશ્ર શરૂઆત જોવા મળી. શરૂઆતમાં સેન્સેક્સ થોડો વધારા સાથે ખુલ્યો, પરંતુ બાદમાં અસ્થિર ચાલ નોંધાઈ. સવારે 9:15 વાગ્યે 30 મુખ્ય શેરો ધરાવતો BSE સેન્સેક્સ 66.76 પોઈન્ટના વધારા સાથે 84,845.60 પર ટ્રેડ થઈ રહ્યો હતો. જોકે, સવારે 10:30 વાગ્યે બજાર વળાંક લેતું જોવા મળ્યું અને સેન્સેક્સ 230 પોઈન્ટ ઘટીને 25,980.30 પર આવી ગયો. થોડી જ વારમાં સૂચકાંક ફરી સંભળી 25,900 ની આસપાસ ટ્રેડ થવા લાગ્યો.
નિફ્ટી 50 સૂચકાંકમાં પણ શરૂઆતના ટ્રેડિંગ દરમિયાન મિશ્ર ચાલ રહી. મજબૂત શેરોમાં SBI, ભારતી એરટેલ, ટાઇટન અને Larsen & Toubroનો સમાવેશ થાય છે, જ્યારે ઇન્ડિગો, ICICI બેંક, બજાજ ફાઇનાન્સ, અલ્ટ્રાટેક સિમેન્ટ અને ONGC જેવા હેવીવેઇટ શેરોમાં દબાણ જોવા મળ્યું.
અગાઉના દિવસના તેજીભર્યા કારોબાર પછી અસ્થિર શરૂઆત
સોમવારે અઠવાડિયાના પહેલા કારોબારી દિવસે સ્થાનિક શેરબજારમાં જોરદાર તેજી જોવા મળી હતી. વૈશ્વિક બજારના સકારાત્મક સંકેતોના આધારે સેન્સેક્સ 567 પોઈન્ટના ઉછાળા સાથે બંધ થયો હતો, જ્યારે નિફ્ટી 25,900ના સ્તરને પાર કરી ગયો હતો.
બજાર નિષ્ણાતોના જણાવ્યા મુજબ, યુએસ રિટેલ ફુગાવાના આંકડાઓમાં સુધારો થવાથી ફેડરલ રિઝર્વ દ્વારા દર ઘટાડાની અપેક્ષાઓ મજબૂત થઈ છે. ઉપરાંત, યુએસ-ચીન વેપાર સંબંધિત સમજૂતીની આશાઓ અને વિદેશી રોકાણકારોની સતત ખરીદીથી ભારતીય બજારમાં આત્મવિશ્વાસ જોવા મળી રહ્યો છે.
નિષ્ણાતોની ટિપ્પણીઓ
જિયોજિત ફાઇનાન્સિયલ સર્વિસીસના ચીફ ઇન્વેસ્ટમેન્ટ સ્ટ્રેટેજિસ્ટ ડૉ. વી.કે. વિજયકુમારએ જણાવ્યું કે બજારનું એકંદર મિજાજ હજી પણ હકારાત્મક છે. સ્થાનિક રોકાણકારોનો વિશ્વાસ મજબૂત છે અને વૈશ્વિક સ્તરે મળતા સહાયક સંકેતો બજારને ટેકો આપી રહ્યા છે.
જિયોજિત ઇન્વેસ્ટમેન્ટ્સ લિમિટેડના રિસર્ચ હેડ વિનોદ નાયરના જણાવ્યા મુજબ, યુએસ-ચીન વેપાર વાટાઘાટોમાં પ્રગતિના સંકેતો અને વૈશ્વિક અનિશ્ચિતતા ઘટતા ભારતીય બજારમાં સુધારો નોંધાયો છે. તેમણે વધુમાં કહ્યું કે સ્થાનિક આર્થિક સૂચકોમાં સુધારો થવાથી આવક વૃદ્ધિની શક્યતાઓ વધી છે, જે વર્તમાન ઊંચા મૂલ્યાંકનને યોગ્ય ઠરાવે છે.
નિષ્ણાતો માને છે કે આગામી દિવસોમાં વૈશ્વિક બજારોની ગતિ, ડોલર ઈન્ડેક્સ અને ફેડરલ રિઝર્વના પગલાં ભારતીય બજારની દિશા નક્કી કરશે.
