અઠવાડિયાના પ્રથમ કારોબારી દિવસે એટલે કે સોમવાર, 25 મે 2026ના રોજ ભારતીય શેરબજારે ધમાકેદાર શરૂઆત કરી છે. સવારે 9.15 વાગ્યે બજાર ખુલતા જ રોકાણકારોમાં ભારે ઉત્સાહ જોવા મળ્યો હતો અને સેન્સેક્સ-નિફ્ટી બંને મજબૂતી સાથે લીલા નિશાનમાં ટ્રેડ થતા દેખાયા. શરૂઆતના કારોબારમાં બીએસઈ સેન્સેક્સ 817 થી વધુ અંકના ઉછાળા સાથે 76,200 ની સપાટી પાર કરી ગયો, જ્યારે નિફ્ટી પણ લગભગ 250 અંકની તેજી સાથે 23,900ની ઉપર ટ્રેડ થતો જોવા મળ્યો.
વિશ્વબજારમાં સુધરતા સંકેતો અને અમેરિકા-ઈરાન વચ્ચે તણાવ ઘટવાની આશાએ ભારતીય બજારમાં ફરી ખરીદીનું વલણ મજબૂત બન્યું છે. છેલ્લા કેટલાક અઠવાડિયાથી જિયોપોલિટિકલ તણાવના કારણે દબાણમાં રહેલા બજારમાં હવે રોકાણકારોનો વિશ્વાસ પરત ફરતો જોવા મળી રહ્યો છે.
અમેરિકા-ઈરાન શાંતિ સમજૂતીની આશાએ વૈશ્વિક બજારમાં રાહત
બજારમાં આવેલી તેજી પાછળનું સૌથી મોટું કારણ અમેરિકા અને ઈરાન વચ્ચે ચાલી રહેલા સંઘર્ષ સમાપ્ત થવાની શક્યતા માનવામાં આવી રહી છે. અમેરિકાના રાષ્ટ્રપતિ Donald Trumpએ આપેલા નિવેદન બાદ વૈશ્વિક રોકાણકારોમાં સકારાત્મક ભાવના જોવા મળી છે.
ટ્રમ્પે જણાવ્યું હતું કે વોશિંગ્ટન અને ઈરાન વચ્ચે શાંતિ સમજૂતીના ડ્રાફ્ટ પર મોટા પ્રમાણમાં ચર્ચા પૂર્ણ થઈ ગઈ છે. જો આ સમજૂતી સફળ થાય તો સ્ટ્રેટ ઓફ હોર્મુઝ ફરી શરૂ થઈ શકે છે, જ્યાંથી વિશ્વના આશરે 20 ટકા તેલ અને LNG શિપમેન્ટ પસાર થાય છે. આ માર્ગ ફરી શરૂ થવાથી વૈશ્વિક સપ્લાય ચેઇન પરનો દબાણ ઘટવાની આશા વધી છે.
જોકે રવિવારે ટ્રમ્પે પોતાના નિવેદનમાં થોડું સાવચેતીભર્યું વલણ અપનાવતા કહ્યું હતું કે તરત જ કોઈ મોટા ચમત્કારની અપેક્ષા રાખવી યોગ્ય નહીં હોય, છતાં રોકાણકારોમાં યુદ્ધ સમાપ્ત થવાની આશા જીવંત રહી છે.
ક્રૂડ ઓઇલમાં મોટો ઘટાડો, ભારત માટે રાહતના સમાચાર
અમેરિકા-ઈરાન તણાવમાં ઘટાડાની આશાનો સીધો પ્રભાવ આંતરરાષ્ટ્રીય ક્રૂડ ઓઇલ બજારમાં જોવા મળ્યો છે. બે અઠવાડિયામાં પ્રથમ વખત બ્રેન્ટ ક્રૂડ ઓઇલની કિંમત 4 ટકા કરતાં વધુ ઘટીને પ્રતિ બેરલ 99.39 ડોલર સુધી આવી પહોંચી છે.
ભારત જેવા મોટા તેલ આયાતકાર દેશ માટે ક્રૂડ ઓઇલ 100 ડોલરથી નીચે આવવું મોટી રાહત ગણાય છે. તેલની કિંમતો ઘટવાથી દેશમાં આયાત બિલમાં ઘટાડો, મોંઘવારી પર નિયંત્રણ અને રૂપિયા પરનું દબાણ ઓછું થવાની શક્યતા વધે છે. આ કારણે બેન્કિંગ, ઓટો, એવિએશન અને FMCG ક્ષેત્રના શેરોમાં પણ ખરીદી તેજ થઈ છે.
આ પણ વાંચો: 10 દિવસમાં ચોથી વખત વધ્યા પેટ્રોલ-ડીઝલ ના ભાવ! : આજે ₹2.71 સુધીનો તોતિંગ ઉછાળો, જાણો નવા દર
એશિયન બજારોમાં પણ હરિયાળી
ભારતીય બજાર સાથે એશિયન શેરબજારોમાં પણ સકારાત્મક ટ્રેન્ડ જોવા મળ્યો છે. એશિયન ઈન્ડેક્સમાં સરેરાશ 1.2 ટકા સુધીનો ઉછાળો નોંધાયો છે. વૈશ્વિક રોકાણકારો હવે આગામી દિવસોમાં અમેરિકા-ઈરાન ચર્ચાના સત્તાવાર પરિણામો પર નજર રાખી રહ્યા છે.
ઉલ્લેખનીય છે કે ફેબ્રુઆરીના અંતમાં શરૂ થયેલા ઈરાન સંઘર્ષ બાદ ભારતીય શેરબજારમાં ભારે દબાણ આવ્યું હતું. આ સમયગાળામાં નિફ્ટી આશરે 5.8 ટકા અને સેન્સેક્સ 7.2 ટકા સુધી તૂટી ગયો હતો. હવે શાંતિની આશાએ બજારમાં ફરી રિકવરી શરૂ થતાં રોકાણકારોમાં આશાવાદી વાતાવરણ બન્યું છે.
