ફિલ્મ નિર્માતામાંથી રિયલ એસ્ટેટ ડેવલપર બનેલા આનંદ પંડિતની કંપની શ્રી લોટસ ડેવલપર્સે IPO લાવવાની જાહેરાત કરી છે. કંપની 5.28 કરોડ ઇક્વિટી શેરના વેચાણ દ્વારા આશરે ₹792 કરોડ એકત્ર કરવાની યોજના ધરાવે છે. IPO માટે બિડિંગ 30 જુલાઈથી શરૂ થશે અને 1 ઓગસ્ટે બંધ થશે. IPO માટેનો પ્રાઇસ બેન્ડ ₹140 થી ₹150 પ્રતિ શેર નક્કી થયો છે અને લોટ સાઈઝ 100 શેરનો રહેશે.
આ IPOમાં સૌથી રસપ્રદ વાત એ છે કે અમિતાભ બચ્ચન, શાહરૂખ ખાન, ઋત્વિક રોશન, અજય દેવગણ, એકતા કપૂર, જીતેન્દ્ર, ટાઈગર શ્રોફ, મનોજ બાજપેયી જેવા બોલીવૂડના ઘણા મોટા નામોએ આ કંપનીમાં રોકાણ કર્યું છે. ઉલ્લેખનીય છે કે અમિતાભ બચ્ચને ₹10 કરોડના 6,66,670 શેર ખરીદ્યા છે, જ્યારે શાહરૂખ ખાન ફેમિલી ટ્રસ્ટે ₹10.12 કરોડના 6,75,000 શેરમાં દાવ લગાવ્યો છે. ઋત્વિક અને રાકેશ રોશને મળીને ₹2.1 કરોડના 1,40,000 શેર ખરીદ્યા છે. અજય દેવગણે સૌથી વધુ ₹57.5 કરોડના 38,33,300 શેરમાં રોકાણ કર્યું છે.
આ ઉપરાંત એકતા, જીતેન્દ્ર અને તુષાર કપૂરે ₹5 કરોડના 3,33,000 શેર ખરીદ્યા છે. ટાઈગર અને જેકી શ્રોફે ₹50 લાખનું રોકાણ કર્યું છે, જયારે સાજિદ નડિયાદવાલાએ ₹1 કરોડના 66,670 શેર લીધા છે. શૈલેષ લોઢા અને મનોજ બાજપેયીએ અનુક્રમે ₹15 લાખ અને ₹10 લાખનું રોકાણ કર્યું છે.
કંપનીએ IPO લાવવાના સાત મહિના પહેલા ડિસેમ્બર 2024માં રૂ. 150 પ્રતિ શેરના દરે 2.66 કરોડ શેરના પ્રાઇવેટ પ્લેસમેન્ટ દ્વારા ₹399.2 કરોડ એકત્ર કર્યા હતા. આ પ્લેસમેન્ટમાં કુલ 118 રોકાણકારો સામેલ થયા હતા, જેમાં આશિષ કચોલિયા, DRChoksi Finserv, Abundantia Capital, Turtle Crest વગેરેનો સમાવેશ થાય છે.
આ IPO માત્ર રિયલ એસ્ટેટ અને બજાર માટે નહીં પરંતુ બૉલીવૂડ ઈન્વેસ્ટમેન્ટ માટે પણ મહત્વપૂર્ણ છે, કારણ કે તેમાં થતી સફળતા સેલિબ્રિટી રોકાણકારોના નફા પર પણ સીધી અસર કરશે.
