Cricket Records : ક્રિકેટ જગતમાં હંમેશા કહેવામાં આવે છે કે, જ્યાં સુધી છેલ્લો બોલ ન ફેંકાય ત્યાં સુધી કંઈ પણ કહી શકાય નહીં. આ રમત અનિશ્ચિતતાઓથી ભરેલી છે અને ખાસ કરીને T20 ફોર્મેટમાં તો ક્યારે કયો રેકોર્ડ બની જાય તે નક્કી હોતું નથી. ઘણીવાર ટીમો 200 કે 250 થી વધુ રનનો વિશાળ સ્કોર બનાવે છે, પરંતુ ક્યારેક એવું પણ બને છે કે, બેટ્સમેનો ક્રીઝ પર ટકવા માટે પણ સંઘર્ષ કરતાં જોવા મળે છે. જાણો એક એવી મેચ વિશે જેને વિશ્વ ક્રિકેટમાં સનસનાટી મચાવી દીધી છે અને આંકડાઓએ ફેન્સના હોશ ઉડાવી દીધા.
ઐતિહાસિક મેચ અને હરીફાઈ
આ રેકોર્ડ સ્પેન અને આઈલ ઓફ મેન (Isle of Man) જેવી ઉભરતી ટીમો વચ્ચેની T20I મેચમાં નોંધાયો હતો. સ્પેનમાં રમાયેલી આ મેચમાં કોઈને અંદાજો ન હતો કે આટલી જલ્દી રમત પૂરી થઈ જશે. આઈલ ઓફ મેનની ટીમ જ્યારે પ્રથમ બેટિંગ કરવા મેદાનમાં ઉતરી ત્યારે સ્પેનિશ બોલરોએ મેદાન પર એવો તરખાટ મચાવ્યો કે વિરોધી ટીમના બેટ્સમેનો ઘૂંટણિયે પડી ગયા હતા. આખી ટીમ માત્ર 10 રન બનાવીને ઓલઆઉટ થઈ ગઈ હતી, જે T20I ક્રિકેટના ઇતિહાસનો સૌથી ઓછો ટીમ સ્કોર માનવામાં આવે છે.
બોલિંગનો વિસ્ફોટક પાવર
સ્પેન તરફથી મોહમ્મદ કામરાન અને આતિફ મોહમ્મદ નામના બે બોલરોએ મેદાન પર કાળો કહેર વર્તાવ્યો હતો. મોહમ્મદ કામરાને પોતાની શાર્પ બોલિંગથી હેટ્રિક ઝડપીને આઈલ ઓફ મેનના બેટિંગ ઓર્ડરને વેરવિખેર કરી દીધો હતો. તેને 4 વિકેટો ઝડપી હતી, જ્યારે આતિફ મોહમ્મદે પણ તેનો પૂરો સાથ આપતા વધુ 4 વિકેટો પોતાના નામે કરી હતી. આઈલ ઓફ મેનના કુલ 11 ખેલાડીઓમાંથી 7 ખેલાડીઓ તો પોતાનું ખાતું પણ ખોલાવી શક્યા ન હતા અને શૂન્ય રને પેવેલિયન પરત ફર્યા હતા. આખી ઇનિંગ માત્ર 8.4 ઓવર સુધી જ ટકી શકી હતી.
માત્ર 2 બોલમાં વિજયનો મંત્ર
જ્યારે સ્પેનની ટીમ 11 રનના સાવ નજીવા લક્ષ્યનો પીછો કરવા ઉતરી ત્યારે લોકો ચોગ્ગા-છગ્ગાની આશા રાખતા હતા, પરંતુ સ્પેનના ઓપનર અવૈસ અહેમદ કંઈક અલગ જ મૂડમાં હતા. તેણે મેચના પ્રથમ બોલ પર (જે નો-બોલ હતો) જોરદાર સિક્સર ફટકારી દીધી. ત્યારબાદ ફ્રી હિટ અને પછીના બોલ પર પણ તેણે ગગનચુંબી છગ્ગો ફટકારીને સ્કોર પૂર્ણ કરી લીધો. આમ, સત્તાવાર રીતે સ્પેને માત્ર 0.2 ઓવરમાં એટલે કે માત્ર 2 જ લીગલ બોલમાં 13 રન ફટકારીને 11 રનનો ટાર્ગેટ હાંસલ કરી લીધો હતો. આ જીત સાથે સ્પેને 118 બોલ બાકી રહેતા મેચ જીતવાનો વિશ્વ વિક્રમ સ્થાપ્યો હતો.
અવિશ્વસનીય આંકડા
આ મેચમાં જે આંકડા બહાર આવ્યા તે ખરેખર અવિશ્વસનીય છે. ક્રિકેટના ઇતિહાસમાં આ પ્રથમ વખત બન્યું હતું કે કોઈ ટીમે આટલી ઝડપથી મેચ પૂરી કરી હોય. સ્પેને આ મેચમાં પોતાની તાકાત બતાવી અને આઈલ ઓફ મેન માટે આ એક ભૂલવા જેવો દિવસ રહ્યો. આ રેકોર્ડ લાંબા સમય સુધી ક્રિકેટના પુસ્તકોમાં નોંધાયેલો રહેશે, કારણ કે આજના સમયમાં જ્યારે બેટ્સમેનો વર્ચસ્વ જમાવી રહ્યા છે, ત્યારે માત્ર 10 રનમાં આખી ટીમ આઉટ થવી અને 2 બોલમાં રમત પૂરી થવી એ કોઈ ચમત્કારથી ઓછું નથી.
