દક્ષિણ ગુજરાતમાં મેઘરાજાએ રૌદ્ર સ્વરૂપ ધારણ કરતાં વલસાડ, નવસારી, ડાંગ અને તાપી સહિતના વિસ્તારોમાં ભારે વરસાદની સ્થિતિ સર્જાઈ છે. ખાસ કરીને વલસાડ જિલ્લામાં અતિભારે વરસાદ અને ઓરંગા નદીમાં આવેલા પૂરના કારણે અનેક રહેણાક વિસ્તારોમાં પાણી ફરી વળ્યું છે. વલસાડ શહેરના શેઠીયા નગર સહિતના વિસ્તારોમાં પૂરનાં પાણી ઘૂસી જતાં અનેક મકાનો અને બિલ્ડિંગોના નીચલા માળ પાણીમાં ગરકાવ થયા છે. બીજી તરફ વાપીમાં પણ 17 ઈંચની આસપાસ વરસાદથી નીચાણવાળા વિસ્તારોમાં જળબંબાકારની સ્થિતિ જોવા મળી રહી છે. ભારે વરસાદના પગલે વલસાડ જિલ્લામાં 365 જેટલા રસ્તા વાહનવ્યવહાર માટે બંધ કરવામાં આવ્યા છે.
છેલ્લા 24 કલાકના વરસાદના આંકડા દક્ષિણ ગુજરાતમાં સર્જાયેલી પરિસ્થિતિની ગંભીરતા દર્શાવે છે. રાજ્યના 213 તાલુકામાં વરસાદ નોંધાયો છે, જેમાં ઉમરગામમાં સૌથી વધુ 35.67 ઈંચ વરસાદ નોંધાયો હોવાનું જણાવાયું છે. કપરાડામાં 28.78 ઈંચ, નાનાપોઢામાં 25.31 ઈંચ, ધરમપુરમાં 19.65 ઈંચ, પારડીમાં 17.64 ઈંચ, વાંસદામાં 17.13 ઈંચ, વાપીમાં 16.26 ઈંચ અને વલસાડમાં 15.87 ઈંચ વરસાદ નોંધાયો છે. ભારે વરસાદના કારણે દક્ષિણ ગુજરાતની નદીઓ, નાળા અને કોઝવેમાં પાણીની આવક વધી છે અને અનેક સ્થળોએ માર્ગ વ્યવહારને અસર પહોંચી છે.
ઓરંગા નદીમાં પૂરથી વલસાડના રહેણાક વિસ્તારોમાં પાણી
વલસાડ જિલ્લામાં ભારે વરસાદ બાદ ઓરંગા નદીમાં પાણીનું સ્તર ઝડપથી વધતાં નદીના કાંઠાના વિસ્તારોમાં પૂર જેવી સ્થિતિ સર્જાઈ છે. શેઠીયા નગર વિસ્તારમાં ઓરંગા નદીનું પાણી રહેણાક વિસ્તારોમાં ઘૂસી જતાં લોકો માટે મુશ્કેલી વધી છે. અનેક સ્થળોએ રસ્તાઓ અને આસપાસના વિસ્તારો પાણીમાં ગરકાવ થતાં લોકોની અવરજવર મુશ્કેલ બની છે. કેટલાક બિલ્ડિંગોના નીચલા માળ અને પાર્કિંગ વિસ્તારોમાં પણ પાણી ભરાયું હોવાની સ્થિતિ સામે આવી છે.
ધરમપુર વિસ્તારમાં પણ ભારે વરસાદ બાદ ઓરંગા નદીમાં જળસ્તર વધ્યું છે. નદીના કાંઠા નજીકના કાશ્મીરાનગર અને બરૂડિયાવાળ જેવા વિસ્તારોમાં પાણી ભરાવાની સ્થિતિને ધ્યાનમાં રાખીને લોકોને સુરક્ષિત સ્થળે ખસેડવાની કામગીરી હાથ ધરાઈ હતી. તંત્ર દ્વારા અસરગ્રસ્ત લોકોને સુરક્ષિત સ્થળે પહોંચાડવાની વ્યવસ્થા કરવામાં આવી છે. ભારે વરસાદ અને નદીના વધતા પ્રવાહ વચ્ચે નદી કિનારે રહેતા લોકોને સાવચેતી રાખવા અને તંત્રની સૂચનાઓનું પાલન કરવા અપીલ કરવામાં આવી છે.
વાપીમાં ધોધમાર વરસાદથી નીચાણવાળા વિસ્તારો પાણીમાં
વાપી શહેરમાં પણ ભારે વરસાદે જનજીવનને અસર કરી છે. શહેરના ગુંજન વિસ્તાર સહિત અનેક નીચાણવાળા વિસ્તારોમાં વરસાદી પાણી ભરાયા છે. છરવાડા, અંબા માતા મંદિર અને નામધા સહિતના વિસ્તારોમાં પણ પાણી ભરાવાની સ્થિતિ જોવા મળી છે. કેટલાક એપાર્ટમેન્ટના પાર્કિંગ વિસ્તારોમાં પાણી ઘૂસી જતાં રહેવાસીઓને વાહનો અને રોજિંદી અવરજવરમાં મુશ્કેલીનો સામનો કરવો પડ્યો છે.
વાપી જેવા ઔદ્યોગિક અને વ્યસ્ત શહેરમાં ભારે વરસાદની સીધી અસર રસ્તા અને વાહનવ્યવહાર પર પણ જોવા મળી છે. પાણી ભરાયેલા વિસ્તારોમાં વાહનો ધીમે ચાલતા થયા છે, જ્યારે કેટલાક સ્થળોએ સ્થાનિક અવરજવર પણ ખોરવાઈ છે. વરસાદનું પાણી ઝડપથી નિકાલ ન થાય તેવા વિસ્તારોમાં સ્થિતિ વધુ ગંભીર બની શકે તેવી ચિંતા વચ્ચે સ્થાનિક તંત્ર દ્વારા પાણીના નિકાલ અને રસ્તાઓની સ્થિતિ પર
નજર રાખવામાં આવી રહી છે.
આ પણ વાંચો: જુનાગઢ: ઓડિશાથી પોસ્ટ મારફતે મંગાવેલો 4 કિલોથી વધુ ગાંજો ઝડપાયો : બે ઝડપાયા, ખાખી વર્ધીધારી સહિત પાંચ ફરાર
365 રસ્તા બંધ, અનેક કોઝવે પર પાણી ફરી વળ્યું
વલસાડ જિલ્લામાં અતિભારે વરસાદના કારણે કુલ 365 રસ્તાઓ વાહનવ્યવહાર માટે બંધ કરવામાં આવ્યા હોવાનું જણાવાયું છે. કપરાડા અને ધરમપુરમાં 65-65, પારડી અને વલસાડમાં 74-74, નાના પોઢામાં 59, ઉમરગામમાં 25 અને વાંસદામાં 3 રસ્તાઓ બંધ હોવાની માહિતી સામે આવી છે. અનેક કોઝવે પર પાણી ફરી વળતાં ગ્રામ્ય વિસ્તારોમાં અવરજવર મુશ્કેલ બની છે. રસ્તાઓ બંધ થવાથી ખાસ કરીને ગ્રામ્ય વિસ્તારોમાં દૈનિક જીવન અને વાહનવ્યવહાર પર અસર પડી છે. પાણીનો પ્રવાહ ઓછો ન થાય ત્યાં સુધી જોખમી કોઝવે અથવા પાણી ભરાયેલા રસ્તા પરથી પસાર ન થવા માટે લોકોને અપીલ કરવામાં આવી રહી છે. ભારે વરસાદ દરમિયાન રસ્તાની સ્થિતિ ઝડપથી બદલાઈ શકે છે, તેથી સ્થાનિક તંત્રની સૂચનાઓનું પાલન કરવું મહત્વપૂર્ણ બન્યું છે.
ડાંગમાં નદીઓમાં ઘોડાપૂર
ડાંગ જિલ્લામાં પણ ભારે વરસાદને કારણે નદીઓ અને નાળાઓમાં પાણીનો પ્રવાહ વધ્યો છે. અંબિકા, પૂર્ણા, ખાપરી અને ગીરા નદીઓમાં પાણીની આવક વધતાં અનેક વિસ્તારોમાં ઘોડાપૂર જેવી સ્થિતિ સર્જાઈ છે. ભારે વરસાદ સાથે કેટલાક સ્થળોએ વૃક્ષો ધરાશાયી થતાં રસ્તાઓ પર અવરોધ ઊભા થયા છે. ડાંગના પહાડી અને જંગલ વિસ્તારને કારણે ભારે વરસાદ દરમિયાન માર્ગ વ્યવહાર પર અસર થવાની શક્યતા વધુ રહે છે. નદી-નાળા અને કોઝવેમાં પાણીનું સ્તર વધતાં સ્થાનિક તંત્ર દ્વારા સંવેદનશીલ વિસ્તારો પર નજર રાખવામાં આવી રહી છે. વરસાદી પરિસ્થિતિ વચ્ચે લોકોને જોખમી સ્થળોથી દૂર રહેવા અને પાણીના પ્રવાહને પાર કરવાનો પ્રયાસ ન કરવા સૂચના આપવામાં આવી છે.
આ પણ વાંચો: પરિવારના મુખ્ય વ્યક્તિના અવસાન બાદ લોન કોણ ભરશે? : મોટા ભાગના લોકો આ નિયમ જાણતા નથી
તાપીમાં હાઈવે પર પાણી, શાળા-કોલેજોમાં રજા
તાપી જિલ્લામાં પણ ધોધમાર વરસાદને કારણે જનજીવન પર અસર પડી છે. ડોલવણ તાલુકામાં ભારે વરસાદ બાદ નદી-નાળામાં પાણીની આવક વધતાં માર્ગ વ્યવહાર ખોરવાયો છે. વ્યારા-ઉનાઈ નેશનલ હાઈવે અને સ્ટેટ હાઈવેના કેટલાક ભાગોમાં પાણી ફરી વળતાં ગડત ગામ નજીક વાહનોની લાંબી કતારો લાગી હતી. અનેક વાહનચાલકોને રસ્તા પર જ અટવાઈ જવાની સ્થિતિ સર્જાઈ હતી. ભારે વરસાદને ધ્યાનમાં રાખીને તાપી જિલ્લામાં શાળા-કોલેજોમાં રજા જાહેર કરવામાં આવી હોવાનું જણાવાયું છે. બીજી તરફ વ્યારા શહેરના મિશન નાકા અને આયલ સર્કલ સહિતના વિસ્તારોમાં પાણી ભરાતા શહેરી ડ્રેનેજ વ્યવસ્થા અને પ્રિ-મોન્સૂન કામગીરી અંગે પણ સ્થાનિક સ્તરે સવાલો ઊભા થયા છે. ભારે વરસાદ દરમિયાન પાણીના ઝડપી નિકાલ માટે નગરપાલિકા અને સ્થાનિક તંત્ર સામે પડકાર વધ્યો છે.
દક્ષિણ ગુજરાતમાં ભારે વરસાદની વચ્ચે તંત્રની કામગીરી પર નજર
ઉમરગામમાં 35.67 ઈંચ વરસાદ સહિત દક્ષિણ ગુજરાતના અનેક તાલુકામાં થયેલા અતિભારે વરસાદે સમગ્ર પ્રદેશમાં વરસાદી વ્યવસ્થાની ગંભીરતા વધારી છે. વલસાડમાં ઓરંગા નદીના પૂરના કારણે રહેણાક વિસ્તારો અસરગ્રસ્ત બન્યા છે, જ્યારે ડાંગમાં નદીઓના વધેલા પ્રવાહ અને તાપીમાં માર્ગ વ્યવહાર પર પડેલી અસરથી લોકોની મુશ્કેલી વધી છે.
આ પરિસ્થિતિમાં વહીવટી તંત્ર દ્વારા બચાવ અને રાહત કામગીરી સાથે સંવેદનશીલ વિસ્તારો પર સતત નજર રાખવામાં આવી રહી છે. નદી-નાળા અને કોઝવે પાસે જવાનું ટાળવું, પાણી ભરાયેલા રસ્તા પરથી વાહન લઈને પસાર ન થવું અને બિનજરૂરી મુસાફરી ટાળવી એ હાલની સ્થિતિમાં સૌથી મહત્વપૂર્ણ સાવચેતી છે. આગામી કલાકોમાં વરસાદની સ્થિતિ અને નદીઓના જળસ્તરમાં થતા ફેરફાર પર સમગ્ર દક્ષિણ ગુજરાતની નજર રહેશે. સ્થાનિક તંત્રની સત્તાવાર સૂચનાઓને પ્રાથમિકતા આપવી અને અફવાઓને બદલે અધિકૃત માહિતી પર વિશ્વાસ રાખવો જરૂરી છે.
