જમ્મુ-કાશ્મીરના સાંબામાં કેટલાક શંકાસ્પદ ડ્રોન જોવા મળ્યા : બ્લેકઆઉટ જાહેર કરવામાં આવ્યું, સેનાએ કહી આ વાત

સોમવારે રાત્રે જમ્મુ અને કાશ્મીરના સાંબામાં ફરીથી કેટલાક શંકાસ્પદ ડ્રોન જોવા મળ્યા. ડ્રોનની હાજરી બાદ સમગ્ર વિસ્તારમાં બ્લેકઆઉટ લાદવામાં આવ્યું છે. ભારતીય વાયુસેનાએ સંરક્ષણ પ્રણાલીને સક્રિય કરી દીધી છે. આ માહિતી આપતાં ભારતીય સેનાના અધિકારીઓએ લોકોને સંયમ જાળવવા કહ્યું છે. ઉપરાંત લોકોને ખાતરી આપવામાં આવી છે કે ગભરાવાની કોઈ જરૂર નથી.

ભારતીય સેનાના અધિકારીએ જણાવ્યું હતું કે જમ્મુ અને કાશ્મીરના સાંબા નજીક કેટલાક શંકાસ્પદ ડ્રોન જોવા મળ્યા હતા. તેમની સામે કાર્યવાહી કરવામાં આવી રહી છે. ગભરાવાની કોઈ જરૂર નથી. જમ્મુ અને કાશ્મીરમાં શંકાસ્પદ ડ્રોન એવા સમયે જોવા મળ્યા જ્યારે બંને દેશોના ડીજીએમઓએ આજે ​​મોડી સાંજે યુદ્ધવિરામ પર બીજા રાઉન્ડની વાતચીત કરી. ત્રણ દિવસથી ચાલી રહેલી લડાઈને રોકવા માટે ભારત અને પાકિસ્તાન વચ્ચે 10 મેના રોજ સાંજે 5 વાગ્યાથી યુદ્ધવિરામની જાહેરાત કરવામાં આવી હતી.

યુદ્ધવિરામની જાહેરાત પછી પણ ભારતના ઘણા ભાગોમાં શંકાસ્પદ ડ્રોન જોવા મળી રહ્યા છે. સાંબા ઉપરાંત પંજાબના જાલંધરમાં પણ ડ્રોન જોવા મળ્યાના અહેવાલો છે. જે બાદ જાલંધરમાં સાયરનનો અવાજ સંભળાયો. હવે સમગ્ર વિસ્તારમાં અંધારપટ છવાઈ ગયો છે.  હોશિયારપુરના દસુહા અને મુકેરિયન નજીક ડ્રોનની હિલચાલ જોવા મળી છે. વિસ્તારના લોકોનું કહેવું છે કે લગભગ 5 થી 7 રાઉન્ડ વિસ્ફોટ થયા હતા. સાવચેતીના પગલા રૂપે વહીવટીતંત્ર દ્વારા બ્લેકઆઉટ લાદવામાં આવ્યો છે.