નવી દિલ્હી: ચીને મ્યાનમાર સરહદ નજીક પોતાના યુનાન પ્રાંતમાં અદ્યતન લાર્જ ફેઝ્ડ એરે રડાર (LPAR) તૈનાત કર્યું હોવાનું સામે આવ્યું છે. સુરક્ષા વિશ્લેષકોના જણાવ્યા મુજબ, આ રડારની દેખરેખ ક્ષમતા 5,000 કિલોમીટરથી વધુ હોવાનું માનવામાં આવે છે, જેના કારણે ભારતના પૂર્વીય વિસ્તારો, હિંદ મહાસાગર અને મિસાઇલ પરીક્ષણો પર નજર રાખવાની તેની ક્ષમતા વધી શકે છે.
આ રડાર ખાસ કરીને બેલિસ્ટિક મિસાઇલોના પ્રક્ષેપણને રિયલ-ટાઇમમાં શોધવા અને તેના માર્ગનું વિશ્લેષણ કરવા માટે બનાવવામાં આવ્યું છે. અહેવાલો અનુસાર, ઓડિશા સ્થિત ડૉ. એ.પી.જે. અબ્દુલ કલામ આઇલેન્ડ પરથી થતા ભારતના વ્યૂહાત્મક મિસાઇલ પરીક્ષણોની માહિતી એકત્ર કરવાની ક્ષમતા પણ આ સિસ્ટમ ધરાવી શકે છે. જોકે, આ રડારની વાસ્તવિક કામગીરી અને તેની અસર અંગે ચીન તરફથી કોઈ સત્તાવાર માહિતી જાહેર કરવામાં આવી નથી.
LPAR રડાર શું છે?
LPAR (Large Phased Array Radar) પરંપરાગત ફરતા રડારથી અલગ ટેક્નોલોજી પર કામ કરે છે. તેમાં ઇલેક્ટ્રોનિક રીતે નિયંત્રિત એન્ટેના હોય છે, જે સેકન્ડોમાં વિશાળ વિસ્તારને સ્કેન કરી શકે છે. આ સિસ્ટમ એકસાથે અનેક લક્ષ્યોને શોધી, ટ્રેક કરી અને તેનું વિશ્લેષણ કરવાની ક્ષમતા ધરાવે છે.
ભારત છેલ્લા કેટલાક વર્ષોમાં પોતાની મિસાઇલ અને બેલિસ્ટિક મિસાઇલ ડિફેન્સ ક્ષમતાઓને પણ સતત મજબૂત બનાવી રહ્યું છે. તાજેતરમાં ભારતે સ્વદેશી લાંબા અંતરની મિસાઇલ અને મિસાઇલ ડિફેન્સ સિસ્ટમના સફળ પરીક્ષણો પણ કર્યા છે.
