Viral Vide: સોશિયલ મીડિયાના યુગમાં લોકો વાયરલ થવા માટે કેવા કેવા જોખમો ઉઠાવે છે તેનું તાજું ઉદાહરણ એક ચોંકાવનારા વીડિયોમાં જોવા મળ્યું છે. આપણે સૌએ નાનપણમાં કાગળના બોર્ડ પર કે મોબાઈલમાં સાપ-સીડીની રમત રમી હશે, પરંતુ શું તમે ક્યારેય જીવતા સાપ વચ્ચે સાપ-સીડી રમવાની કલ્પના કરી છે? ઇન્ટરનેટ પર અત્યારે એક એવો વીડિયો વાયરલ થયો છે જેમાં એક મહિલા અસલી સાપ અને સીડીઓ વચ્ચે આ ખતરનાક રમત રમતી જોવા મળી રહી છે.
આ વીડિયોમાં જોઈ શકાય છે કે, એક રૂમમાં જમીન પર સાપ-સીડીનું આખું સેટઅપ તૈયાર કરવામાં આવ્યું છે. અહીં રમતની 'ગોટી' કોઈ નિર્જીવ વસ્તુ નથી, પરંતુ મહિલા પોતે છે. જેવો પાસો (Dice) ફેંકવામાં આવે અને જે નંબર આવે, તેટલા સ્ટેપ મહિલાએ જીવતા સાપની વચ્ચે ચાલવાનું હોય છે. આ દ્રશ્ય એટલું ભયાનક છે કે જોનારાના શ્વાસ અધ્ધર થઈ જાય છે. વીડિયોમાં મહિલા જેવી ચાલ ચાલે છે કે તરત જ તેની આસપાસ રહેલા અસલી સાપ ઉછળવા અને ફેણ ચડાવવા લાગે છે. આ વીડિયો અત્યારે ઈન્સ્ટાગ્રામ પર લાખોની સંખ્યામાં જોવામાં આવી રહ્યો છે.
જીવના જોખમે 'રિયલ લાઈફ' સાપ-સીડી
વાયરલ થઈ રહેલા આ વીડિયોમાં એક બંધ રૂમમાં જમીન પર સીડીઓ ગોઠવવામાં આવી છે અને ચારેતરફ સાપ રખડતા મૂકવામાં આવ્યા છે. મહિલા જ્યારે પાસાના નંબર મુજબ આગળ વધે છે, ત્યારે સાપ તેના પગ પાસે જ હોય છે. આ અનોખી પણ ડરામણી રમત જોઈને સોશિયલ મીડિયા યુઝર્સ સ્તબ્ધ થઈ ગયા છે. જોકે, એવી અપેક્ષા રાખવામાં આવે છે કે આ સાપ બિનઝેરી હશે, પરંતુ તેમ છતાં સાપનો ડર કોઈની પણ ચીસ પડાવવા માટે પૂરતો છે.
નિયમો એ જ પણ જોખમ અનેકગણું
આ રમત જીતવાના નિયમો મોબાઈલ કે બોર્ડ ગેમ જેવા જ છે, પણ અહીં ભૂલની કોઈ ગુંજાઈશ નથી. વીડિયોમાં એક વ્યક્તિ ડાઈસ ફેંકે છે અને જે આંકડો આવે તેટલા ખાના મહિલાએ કૂદીને આગળ વધવાનું હોય છે. જેવી મહિલા કૂદકો મારે છે કે તરત જ સાપ તેની તરફ ઉછળે છે. આ દ્રશ્ય જોઈને વીડિયોમાં હાજર અન્ય લોકો ચીસો પાડવા લાગે છે અને હસવા પણ લાગે છે, પરંતુ ઓનલાઇન જોનારા લોકો માટે આ કોઈ હોરર ફિલ્મથી ઓછું નથી.
સોશિયલ મીડિયા પર વાયરલ થયો વીડિયો
આ વીડિયો રાહિલા રશીદ (@_shilpi_rahila) નામના ઈન્સ્ટાગ્રામ એકાઉન્ટ પરથી શેર કરવામાં આવ્યો છે, જેના કેપ્શનમાં લખ્યું છે, 'હવે રમો સાપ-સીડી.' માત્ર બે દિવસમાં જ આ રીલને 42 લાખથી વધુ વ્યુઝ અને 60 હજારથી વધુ લાઈક્સ મળી ચૂક્યા છે. વીડિયો પર કોમેન્ટ્સનો પણ વરસાદ થઈ રહ્યો છે, જેમાં લોકો પોતાની મિશ્ર પ્રતિક્રિયા આપી રહ્યા છે.
યુઝર્સની પ્રતિક્રિયા: "તું રમે છે અને પગ મારા ધ્રૂજે છે"
આ ખતરનાક સ્ટંટ જોઈને ઈન્ટરનેટ પર લોકો જાતજાતની કોમેન્ટ કરી રહ્યા છે. એક યુઝરે લખ્યું, "આ ડુપ્લીકેટ નહીં પણ ઓરિજિનલ ગેમ છે." બીજી એક મહિલા યુઝરે લખ્યું, "બહેન રમત તું રમે છે પણ ચીસો હું પાડી રહી છું." અન્ય એક યુઝરે રમૂજી અંદાજમાં કહ્યું, "વીડિયો એવો બનાવો કે કોઈ કોપી ના કરી શકે." જોકે, મોટાભાગના લોકોએ આવી જોખમી રમતોથી દૂર રહેવાની સલાહ પણ આપી છે.
