Gold Silver : ભારતીય બજારમાં છેલ્લા કેટલાક સમયથી કિંમતી ધાતુઓના ભાવમાં ભારે વોલેટિલિટી જોવા મળી રહી છે. સામાન્ય રીતે સોનાના ભાવમાં વધારો થતો હોય છે, પરંતુ આ વખતે ચાંદીએ તમામ રેકોર્ડ તોડી નાખ્યા છે. વડાપ્રધાન નરેન્દ્ર મોદીએ દેશના અર્થતંત્રને મજબૂત કરવાના હેતુથી લોકોને એક વર્ષ સુધી સોનું ન ખરીદવા માટે કરેલી ભાવુક અપીલની સીધી અસર બજારના સેન્ટિમેન્ટ પર જોવા મળી છે. લોકોએ સોનાના વિકલ્પ તરીકે ચાંદીમાં રોકાણ વધારતા માંગ અને પુરવઠાના ગણિતને કારણે કિંમતોમાં જંગી ઉછાળો આવ્યો છે.
કિંમતમાં તોતિંગ ઉછાળો : આજના લેટેસ્ટ ભાવ
મંગળવારે બજાર ખુલતાની સાથે જ ચાંદીના ભાવમાં રોકેટ ગતિએ વધારો જોવા મળ્યો હતો. ઈન્ડિયા બુલિયન એન્ડ જ્વેલર્સ એસોસિએશન (IBJA) ના ડેટા મુજબ, એક કિલો ચાંદીની કિંમત ₹11,620 વધીને ₹2,67,820 પર પહોંચી ગઈ છે. આ પહેલા સોમવારે ચાંદી ₹2.56 લાખના સ્તરે બંધ રહી હતી. માત્ર ચાંદી જ નહીં, સોનાના ભાવમાં પણ તેજી જોવા મળી છે. 24 કેરેટ સોનું ₹1,592 વધીને ₹1,51,954 પ્રતિ 10 ગ્રામના સ્તરે પહોંચી ગયું છે, જે ગઇકાલે ₹1.50 લાખની આસપાસ હતું.
વર્ષ 2026 નું રિપોર્ટ કાર્ડ : કેટલું મોંઘું થયું રોકાણ?
ચાલુ વર્ષ એટલે કે, 2026 રોકાણકારો માટે સોનાના ઈંડા આપતી મરઘી સમાન સાબિત થયું છે. જાન્યુઆરીથી અત્યાર સુધીના આંકડા જોઈએ તો સોનામાં ₹18,755 નો વધારો થયો છે, જ્યારે ચાંદીમાં ₹37,400 નો તોતિંગ ઉછાળો આવ્યો છે. 31 ડિસેમ્બર 2025 ના રોજ જે સોનું ₹1.33 લાખ પર હતું, તે હવે ₹1.52 લાખે પહોંચ્યું છે. તેવી જ રીતે ₹2.30 લાખવાળી ચાંદી હવે ₹2.68 લાખે પહોંચી છે. નિષ્ણાતોના મતે 29 જાન્યુઆરીએ સોનાએ ₹1.76 લાખ અને ચાંદીએ ₹3.86 લાખનો જે ઓલટાઈમ હાઇ બનાવ્યો હતો, બજાર ફરી તે દિશામાં આગળ વધી રહ્યું હોય તેમ લાગે છે.
સોનાના ભાવ વધવા પાછળના 3 મુખ્ય કારણો
સોનાના ભાવમાં તેજી આવવા માટે વૈશ્વિક અને સ્થાનિક એમ બંને પરિબળો જવાબદાર છે. પ્રથમ કારણ મિડલ ઈસ્ટમાં ઈરાન અને ઈઝરાયેલ વચ્ચે વધતો જતો યુદ્ધનો તણાવ છે, જેના કારણે રોકાણકારો શેરબજાર જેવા જોખમી સાધનોમાંથી પૈસા કાઢીને સોનામાં રોકાણ કરી રહ્યા છે. બીજું કારણ આંતરરાષ્ટ્રીય બજારમાં ડોલર ઇન્ડેક્સમાં જોવા મળેલો ઘટાડો છે, જે સીધી રીતે સોનાની માંગ વધારે છે. ત્રીજું કારણ ભારતમાં શરૂ થઈ રહેલી લગ્નની સિઝન છે, જેને કારણે સ્થાનિક જ્વેલર્સ તરફથી સોનાની માંગમાં જબરદસ્ત વધારો નોંધાયો છે.
ચાંદીમાં આટલી બધી તેજી કેમ?
ચાંદી માત્ર આભૂષણ જ નહીં પણ ઔદ્યોગિક ધાતુ તરીકે પણ ઉભરી રહી છે. હાલમાં ઇલેક્ટ્રિક વ્હીકલ (EV) અને સોલર એનર્જી સેક્ટરમાં ચાંદીનો વપરાશ ખૂબ વધ્યો છે, જેના કારણે વૈશ્વિક સ્તરે ચાંદીની તંગી સર્જાઈ છે. બીજું કારણ એ છે કે, જ્યારે સોનાના ભાવ મધ્યમ વર્ગની પહોંચની બહાર જાય છે, ત્યારે લોકો ચાંદીમાં રોકાણ કરવાનું વધુ પસંદ કરે છે. વધુમાં, ગ્લોબલ એક્સચેન્જો પર ચાંદીનો સ્ટોક ઘટતા વેપારીઓએ 'શોર્ટ કવરિંગ' એટલે કે ઝડપી ખરીદી શરૂ કરી છે, જેના કારણે ભાવમાં ઉછાળો આવ્યો છે.
સોનું ખરીદતા પહેલા આ સાવચેતી રાખો
જ્યારે તમે સોનામાં રોકાણ કરવા જાવ, ત્યારે છેતરામણીથી બચવા માટે બે બાબતો ખાસ ધ્યાનમાં રાખો. હંમેશા BIS હોલમાર્કવાળું સોનું જ ખરીદો. આ સોના પર એક વિશિષ્ટ આલ્ફાન્યુમેરિક કોડ (જેમ કે AZ4524) હોય છે, જે તેની શુદ્ધતાની ગેરંટી આપે છે. બીજું, ખરીદી કરતાં પહેલા તે દિવસના લાઇવ ભાવ IBJA જેવી વિશ્વસનીય વેબસાઇટ પરથી તપાસો. યાદ રાખો કે 24 કેરેટ, 22 કેરેટ અને 18 કેરેટ સોનાના ભાવમાં મોટો તફાવત હોય છે, તેથી ઘરેણાં માટે હંમેશા 22 કેરેટના ભાવની જ ગણતરી કરવી.
અસલી ચાંદી ઓળખવાની 4 માસ્ટર ટિપ્સ
બજારમાં નકલી ચાંદીનું પ્રમાણ વધતા સાવધ રહેવું જરૂરી છે. અસલી ચાંદીની ઓળખ ઘરે બેઠા કરી શકાય છે:
મેગ્નેટ ટેસ્ટ : ચાંદી ક્યારેય ચુંબક તરફ આકર્ષિત થતી નથી. જો તમારો સિક્કો કે ઘરેણું ચુંબક સાથે ચોંટે તો સમજી લેવું કે તેમાં લોખંડ કે અન્ય ધાતુની ભેળસેળ છે.
આઇસ ટેસ્ટ : ચાંદી એ ઉષ્માનું ઉત્તમ વાહક છે. જો તમે ચાંદી પર બરફનો ટુકડો મૂકશો, તો તે સામાન્ય તાપમાન કરતાં ખૂબ ઝડપથી પીગળવા લાગશે.
સ્મેલ ટેસ્ટ : અસલી શુદ્ધ ચાંદીમાં કોઈ ગંધ હોતી નથી. જો તમને ધાતુ જેવી કે કોપર જેવી તીક્ષ્ણ ગંધ આવે તો તે ભેળસેળવાળી હોઈ શકે છે.
ક્લોથ ટેસ્ટ : શુદ્ધ ચાંદીના સિક્કાને સફેદ સુતરાઉ કાપડથી ઘસવાથી તેના પર હળવો કાળો ડાઘ પડે છે, જે ઓક્સિડેશનની પ્રક્રિયાને કારણે થાય છે અને અસલી હોવાની નિશાની છે.
