Sikkim tunnel accident: સિક્કિમના નામચી જિલ્લામાં નિર્માણાધીન સમરડુંગ ટનલમાં થયેલી ગંભીર દુર્ઘટનાએ સમગ્ર દેશને ચોંકાવી દીધો છે. લેન્ડસ્લાઇડ બાદ ટનલનું પ્રવેશદ્વાર બંધ થઈ જતાં અનેક મજૂરો અંદર ફસાઈ ગયા હતા. જિલ્લા પ્રશાસનના જણાવ્યા મુજબ અત્યાર સુધીમાં 7થી વધુ મજૂરોના મોત થયા છે, જ્યારે અનેક મજૂરોને સુરક્ષિત બહાર કાઢવા માટે NDRF, SDRF, સિક્કિમ પોલીસ અને ફાયર વિભાગની ટીમો સતત બચાવ કામગીરીમાં જોડાયેલી છે. જોકે ટનલમાં મિથેન ગેસના લીકને કારણે રેસ્ક્યુ ઓપરેશન અત્યંત જોખમી બની ગયું છે.
કેવી રીતે સર્જાઈ દુર્ઘટના?
પ્રાથમિક માહિતી અનુસાર સોમવારે બપોરે લગભગ 3:09 વાગ્યે તીસ્તા સ્ટેજ-6 હાઇડ્રોઇલેક્ટ્રિક પ્રોજેક્ટ હેઠળ બની રહેલી સમરડુંગ ટનલમાં અચાનક લેન્ડસ્લાઇડ થઈ હતી. આ પ્રોજેક્ટનું નિર્માણ પટેલ એન્જિનિયરિંગ દ્વારા કરવામાં આવી રહ્યું છે.
લેન્ડસ્લાઇડને કારણે ટનલનો પ્રવેશ માર્ગ સંપૂર્ણપણે બંધ થઈ ગયો, જેના કારણે અંદર કામ કરી રહેલા મજૂરો બહાર નીકળી શક્યા નહીં. ત્યારબાદ ટનલમાં મિથેન ગેસ લીક શરૂ થતાં પરિસ્થિતિ વધુ ગંભીર બની ગઈ.
અત્યાર સુધી 7થી વધુ મજૂરોના મોતની પુષ્ટિ
જિલ્લા પ્રશાસને જણાવ્યું છે કે આ દુર્ઘટનામાં અત્યાર સુધી 7થી વધુ મજૂરોનાં મોત થયા છે. મૃતદેહોને સિંગતમ જિલ્લા હોસ્પિટલ, STNM હોસ્પિટલ (ગંગટોક) અને નામચી જિલ્લા હોસ્પિટલમાં મોકલવામાં આવ્યા છે.
સિક્કિમ સ્ટેટ ડિઝાસ્ટર મેનેજમેન્ટ ઓથોરિટી (SSDMA) સમગ્ર પરિસ્થિતિ પર સતત નજર રાખી રહી છે.
મિથેન ગેસ લીકથી બચાવ કામગીરીમાં મુશ્કેલી
બચાવ કામગીરી દરમિયાન સૌથી મોટો પડકાર ટનલની અંદર ફેલાયેલો મિથેન ગેસ છે. ગેસનું પ્રમાણ વધુ હોવાને કારણે રેસ્ક્યુ ટીમો માટે અંદર જવું જોખમી બની રહ્યું છે.
માહિતી અનુસાર ટનલમાં પ્રવેશ કરનારા કેટલાક બચાવકર્મીઓ પણ ગેસની અસરથી ચક્કર આવી બેભાન થઈ ગયા હતા. જેના કારણે સુરક્ષા સાધનો સાથે અત્યંત સાવચેતીપૂર્વક બચાવ કામગીરી આગળ ધપાવવામાં આવી રહી છે.
NDRF, SDRF અને અન્ય એજન્સીઓ સતત કામગીરીમાં
નામચી જિલ્લા કલેક્ટર અનુપા તામલિંગના જણાવ્યા અનુસાર ઘટનાની જાણ થતાં જ સિલિગુડી અને પાક્યોંગમાં તૈનાત NDRF અને SDRFની ટીમોને તાત્કાલિક ઘટનાસ્થળે મોકલવામાં આવી હતી.
શરૂઆતમાં ફાયર વિભાગ અને પોલીસના જવાનોએ ખાસ સુરક્ષા સાધનો વિના અંદર જવાનો પ્રયાસ કર્યો હતો, પરંતુ જોખમી પરિસ્થિતિને કારણે તેઓ અંદર સુધી પહોંચી શક્યા નહોતા. બાદમાં વિશેષ સુરક્ષા સાધનો સાથે NDRFની ટીમોએ બચાવ અભિયાન આગળ વધાર્યું.
ટનલની અંદર વિસ્ફોટ જેવો અવાજ સાંભળ્યાનો દાવો
જિલ્લા કલેક્ટરના જણાવ્યા અનુસાર સુરક્ષિત બહાર આવેલા કેટલાક મજૂરોએ જણાવ્યું હતું કે દુર્ઘટના પહેલાં ટનલની અંદર જોરદાર વિસ્ફોટ જેવો અવાજ સંભળાયો હતો. ત્યારબાદ તેઓ બહાર દોડી આવ્યા, પરંતુ ઘણા મજૂરો અંદર જ ફસાઈ ગયા. હાલ લેન્ડસ્લાઇડનું ચોક્કસ કારણ શું હતું તેની તપાસ ચાલી રહી છે અને સત્તાવાર રીતે કોઈ કારણ જાહેર કરવામાં આવ્યું નથી.
સમગ્ર ઘટનાની તપાસ શરૂ
દુર્ઘટના બાદ સંબંધિત એજન્સીઓએ તપાસ શરૂ કરી છે. બચાવ કામગીરી પૂર્ણ થયા બાદ લેન્ડસ્લાઇડ, ગેસ લીક અને સુરક્ષા વ્યવસ્થાને લઈને વિગતવાર તપાસ કરવામાં આવશે. હાલમાં પ્રશાસનની પ્રથમ પ્રાથમિકતા ટનલમાં ફસાયેલા તમામ લોકોને સુરક્ષિત બહાર કાઢવાની છે.
આ પણ વાંચો: જંતર-મંતર પર CJPનું પ્રદર્શન બન્યું હિંસક : 118થી વધુ પોલીસકર્મી ઘાયલ, 70 લોકો પોલીસ કસ્ટડીમાં
ટનલોમાં સુરક્ષા વ્યવસ્થાને લઈને ગંભીર પ્રશ્નો
સિક્કિમમાં ચાલી રહેલા મોટા હાઇડ્રોઇલેક્ટ્રિક પ્રોજેક્ટ દરમિયાન બનેલી આ દુર્ઘટનાએ નિર્માણાધીન ટનલોમાં સુરક્ષા વ્યવસ્થાને લઈને ગંભીર પ્રશ્નો ઉભા કર્યા છે. મિથેન ગેસ લીક જેવી પરિસ્થિતિમાં બચાવ કામગીરી કેટલી જોખમી બની શકે છે તેનો પણ આ બનાવ જીવંત દાખલો છે.
