Spelling Bee 2026: અમેરિકાની સૌથી પ્રતિષ્ઠિત અને કપરી શૈક્ષણિક સ્પર્ધા ગણાતી 'સ્ક્રિપ્સ નેશનલ સ્પેલિંગ બી 2026' માં આ વર્ષે કેલિફોર્નિયાના 14 વર્ષીય ભારતીય મૂળના કિશોર શ્રેય પરીખે શાનદાર જીત મેળવીને ઇતિહાસ રચી દીધો છે. વોશિંગ્ટન ડીસીના ઐતિહાસિક ડીએઆર કોન્સ્ટિટ્યુશન હોલમાં યોજાયેલી આ સ્પર્ધામાં શ્રેયે પોતાના અસાધારણ જ્ઞાન, એકાગ્રતા અને અડગ આત્મવિશ્વાસના જોરે વિશ્વભરના સ્પર્ધકોને પાછળ છોડી વિજેતાનો તાજ પોતાના નામે કર્યો છે. શ્રેયની આ સફર માત્ર એક જીત નથી, પરંતુ નિષ્ફળતામાંથી શીખીને સફળતા મેળવવાની એક પ્રેરણાદાયી ગાથા છે.
આ સ્પર્ધામાં ભારતીય મૂળના બાળકોનું વર્ચસ્વ વર્ષોથી અકબંધ છે, જે ફરી એકવાર સાબિત થયું છે. છેલ્લા 37 વર્ષના ઇતિહાસમાં 31 ચેમ્પિયન ભારતીય મૂળના જ રહ્યા છે, જે આ સમુદાયમાં શિક્ષણ અને કઠોર પરિશ્રમ પ્રત્યેના લગાવને દર્શાવે છે. આ વર્ષે વિશ્વના વિવિધ દેશોના 247 સ્પર્ધકો સામે શ્રેયે જે રીતે પ્રદર્શન કર્યું, તે તેના માટે માત્ર એક વ્યક્તિગત સિદ્ધિ નથી, પરંતુ સમગ્ર ભારતીય સમુદાય માટે ગૌરવની ક્ષણ છે.
'સ્પેલ-ઓફ' રાઉન્ડમાં 90 સેકન્ડમાં તોડ્યો રેકોર્ડ
આ વર્ષની ફાઇનલ અત્યંત રોમાંચક રહી હતી. જ્યારે શ્રેય પરીખ અને ઇશાન ગુપ્તા વચ્ચે ટાઈ થઈ, ત્યારે વિજેતા નક્કી કરવા માટે 'સ્પેલ-ઓફ' (ટાઇબ્રેકર) રાઉન્ડ યોજાયો હતો. આ રેપિડ-ફાયર રાઉન્ડમાં ટેકનિકલ ખામીને કારણે શ્રેયને થોડો સમય સ્ટેજ પર રાહ જોવી પડી હતી, તેમ છતાં તેણે માનસિક મક્કમતા જાળવી રાખી હતી. ખામી સુધર્યા બાદ શ્રેયે ધમાકેદાર વાપસી કરતા 90 સેકન્ડમાં 32 સ્પેલિંગના સાચા જવાબ આપીને નવો રેકોર્ડ સ્થાપિત કર્યો હતો. તેને વિજેતા બનાવનારો છેલ્લો શબ્દ 'Bromocriptine' હતો.
નિષ્ફળતામાંથી શીખ અને સફળતાનું રહસ્ય
શ્રેય માટે આ જીત સરળ નહોતી. વર્ષ 2022 અને 2024 માં સ્પર્ધામાં ભાગ લીધા બાદ પણ તેને સફળતા મળી નહોતી. ગયા વર્ષે પોતાની સ્કૂલ લેવલની સ્પર્ધામાં માત્ર એક શબ્દના કારણે બહાર ફેંકાઈ જનાર શ્રેય તે સમયે તાવ અને હતાશામાં હતો. જોકે, તેણે હિંમત ન હારતા પોતાની ભૂલોનું ઊંડું વિશ્લેષણ કર્યું. તેના કોચના મતે, શ્રેયની સૌથી મોટી તાકાત તેની ભૂલોમાંથી શીખવાની વૃત્તિ અને અવિરત મહેનત છે. તે માત્ર સ્પેલિંગમાં જ નહીં, પરંતુ ટેનિસ, ચેસ અને મ્યુઝિકમાં પણ એટલો જ માહિર છે.
આ પણ વાંચો: અમેરિકાના વર્જિનિયામાં કાળજું કંપાવતો અકસ્માત: હાઈવે પર બેકાબૂ બસે 6 વાહનોને કચડ્યા, 5 લોકોના મોત; 34 ઘાયલ
ઇનામો અને સન્માનનો વરસાદ
આ ભવ્ય વિજય બદલ શ્રેય પર ઇનામોની વર્ષા થઈ છે. તેને 50,000 ડૉલરનો મુખ્ય રોકડ પુરસ્કાર, મરિયમ વેબસ્ટર ડિક્શનરી તરફથી 2,500 ડૉલર અને અન્ય સંદર્ભ ગ્રંથો મળ્યા છે. આ ઉપરાંત ડેલ્ટા એરલાઇન્સ તરફથી તેને ફ્લાઇટ ક્રેડિટ પણ એનાયત કરવામાં આવી છે. આ ઇનામો કરતાં પણ વધુ મહત્વનું છે કે શ્રેયે વિશ્વભરના સ્પર્ધકોની સામે પોતાની બૌદ્ધિક ક્ષમતાનો પરચો આપીને એક વૈશ્વિક ઓળખ બનાવી છે.
