ગ્લોબલ માર્કેટમાં તેજી છતાં કેમ ભારતીય શેરમાર્કેટ પડ્યું? : આ છે ત્રણ મુખ્ય કારણો

ટ્રેડિંગ સપ્તાહના છેલ્લા દિવસે એટલે કે શુક્રવાર 25મી એપ્રિલે પહેલગામમાં આતંકવાદી હુમલા બાદ ભારત અને પાકિસ્તાન વચ્ચે સતત વધી રહેલા તણાવની અસર ભારતીય શેરબજાર પર જોવા મળી રહી છે. શુક્રવારે નિફ્ટી ફરી એકવાર 24000ની નીચે ગબડ્યો, જ્યારે સેન્સેક્સમાં પણ 900થી વધુ પોઈન્ટનો જંગી ઘટાડો જોવા મળ્યો.

સૌથી મોટો ઘટાડો મિડ અને સ્મોલ કેપ ઈન્ડેક્સમાં જોવા મળી રહ્યો છે, બજારમાં ઘટાડાથી રોકાણકારોના કરોડો રૂપિયા પણ ધોવાઈ ગયા છે. વૈશ્વિક બજારોમાં સારી વૃદ્ધિના સંકેતો છતાં સ્થાનિક બજાર તૂટ્યું હતું. સવારે 10 વાગ્યે સેન્સેક્સ 881.49 પોઈન્ટ ઘટીને 78,919.94 પર જ્યારે નિફ્ટી 285.05 પોઈન્ટ ઘટીને 23,961.65 પર હતો.

રોકાણકારોને રૂ. 9 લાખ કરોડનું નુકસાન

વિદેશી મૂડીના સતત પ્રવાહ અને વૈશ્વિક બજારોમાં લાભો વચ્ચે શુક્રવારે શરૂઆતના વેપારમાં સેન્સેક્સ અને નિફ્ટીમાં વધારો થયો હતો, પરંતુ ટૂંક સમયમાં બજારોએ ફરીથી ઘટાડા સાથે વેપાર કરવાનું શરૂ કર્યું હતું. ટૂંક સમયમાં જ બંનેએ તેમનો પ્રારંભિક લાભ ગુમાવ્યો અને ઘટાડા સાથે વેપાર કરવાનું શરૂ કર્યું. BSE પર લિસ્ટેડ શેરોનું માર્કેટ કેપ અગાઉના સત્રમાં રૂ. 429.63 લાખ કરોડથી ઘટીને રૂ. 420.57 લાખ કરોડ થયું છે. આવી સ્થિતિમાં રોકાણકારોને એક જ ઝાટકે 9 લાખ કરોડ રૂપિયાનું નુકસાન થયું છે.

આ શેરોને સૌથી વધુ નુકસાન થયું છે
સેન્સેક્સમાં સામેલ 30 કંપનીઓમાં એક્સિસ બેન્કનો શેર 3.50 ટકા ઘટ્યો હતો. અદાણી પોર્ટ્સ, બજાજ ફાઈનાન્સ, બજાજ ફિનસર્વ, ટાટા મોટર્સ, ટેક મહિન્દ્રા અને ઈટર્નલના શેર પણ ખોટમાં રહ્યા હતા.

જોકે, ટાટા કન્સલ્ટન્સી સર્વિસીસ, ઈન્ફોસિસ, રિલાયન્સ ઈન્ડસ્ટ્રીઝ, એચસીએલ ટેક, એચડીએફસી બેંક અને આઈસીઆઈસીઆઈ બેંકના શેરો ટોચના ગેનર્સમાં હતા. એશિયન બજારોમાં હોંગકોંગનો હેંગસેંગ, જાપાનનો નિક્કી 225, ચીનનો શાંઘાઈ એસએસઈ કમ્પોઝીટ અને દક્ષિણ કોરિયાનો કોસ્પી નફામાં હતો.

વૈશ્વિક બજારોમાં તેજી
વૈશ્વિક બજારોમાં ઉછાળાના સંકેતો છતાં ભારતીય શેરબજારો આજે તૂટ્યા છે. ડાઉ જોન્સ +1.3%, S&P 500 +2.1%, Nasdaq +2.7% વધીને બંધ થયા. આલ્ફાબેટ (Google)એ ઉત્તમ પરિણામો આપ્યા, જેના કારણે ટેક શેરોમાં વધારો થયો. જાપાનનો નિક્કી: +1.4% અપ. દક્ષિણ કોરિયાની કોસ્પી: +1.1% અપ. તાઇવાન ઇન્ડેક્સ: +2.6% અપ. યુએસ-દક્ષિણ કોરિયા વેપાર સોદા પર પ્રગતિના સંકેતો બાદ રાહતના સમાચાર આવ્યા છે.

બજાર ઘટવાના 3 મોટા કારણો
પ્રથમ કારણઃ ટ્રેડિંગ સપ્તાહના છેલ્લા દિવસે બેંકિંગ શેરોમાં વેચવાલી જોવા મળી રહી છે. બેન્ક નિફ્ટી, નિફ્ટી પ્રાઈવેટ બેન્ક અને પીએસયુ બેન્ક ઈન્ડેક્સમાં ભારે ઘટાડો જોવા મળ્યો છે. રોકાણકારો આ સમયે બેંકો વિશે સૌથી વધુ ચિંતિત છે.

બીજું કારણઃ પહેલગામ આતંકી હુમલા બાદ ભારત અને પાકિસ્તાન વચ્ચે તણાવ વધી ગયો છે. ભારતે સિંધુ જળ સંધિ અટકાવી અને રાજદ્વારી સંબંધો ઘટાડ્યા. જેની અસર બજાર પર જોવા મળી હતી.

ત્રીજું કારણ: નિષ્ણાતો મેને લઈને પણ સાવચેત રહેવાની સલાહ આપી રહ્યા છે. શેરબજારમાં મે મહિનાની શરૂઆત સાથે જ ફરી એક સવાલ ઉઠી રહ્યો છે કે શું આ વખતે “સેલ ઇન મે એન્ડ ગો અવે” ફોર્મ્યુલા કામ કરશે કે તેજી ફરી બજારને ઉપર લઈ જશે? જો તમે વેપાર અથવા રોકાણ કરો છો, તો આ રિપોર્ટ તમારા માટે ખૂબ જ મહત્વપૂર્ણ છે.