Closing Bell: ભારતીય શેરબજારમાં આજે ફરી એકવાર મસમોટું ગાબડું જોવા મળ્યું છે, જેને કારણે રોકાણકારોના અબજો રૂપિયા ધોવાઈ ગયા છે. વૈશ્વિક સ્તરે ઈરાન-ઈઝરાયેલ યુદ્ધના વધતા તણાવ અને ક્રૂડ ઓઈલના પુરવઠામાં સર્જાયેલા અવરોધોની સીધી અસર ભારતીય બજાર પર જોવા મળી રહી છે. સતત બીજા દિવસે બજાર લાલ નિશાનમાં બંધ રહ્યું છે, જેમાં બેન્કિંગ અને ઓટો સેક્ટરના શેરોમાં સૌથી વધુ વેચવાલી જોવા મળી હતી. સેન્સેક્સ 800થી વધુ પોઈન્ટ્સ ગગડ્યો છે, જ્યારે નિફ્ટી 23,650ની મહત્વની સપાટી તોડી નીચે ઉતરી ગઈ છે.
બજારની આ પડતી પાછળ મુખ્યત્વે ઓટોમોબાઈલ ઇન્ડસ્ટ્રી પર આવેલું દબાણ જવાબદાર છે, જ્યાં છેલ્લા બે દિવસમાં ઈન્ડેક્સમાં 6%થી વધુનો ઘટાડો નોંધાયો છે. આ ઉપરાંત, આંતરરાષ્ટ્રીય ઉર્જા એજન્સી (IEA) દ્વારા તેલના પુરવઠામાં ઐતિહાસિક વિક્ષેપની ચેતવણીએ રોકાણકારોમાં ગભરાટ ફેલાવ્યો છે. મધ્ય પૂર્વમાં ચાલી રહેલા સંઘર્ષને કારણે 'સ્ટ્રેટ ઓફ હોર્મુઝ' મારફતે થતો ઓઈલનો સપ્લાય ખોરવાતા અને ગલ્ફ દેશો દ્વારા ઉત્પાદનમાં કાપ મૂકવામાં આવતા વૈશ્વિક સ્તરે આર્થિક મંદીનો ભય તોળાઈ રહ્યો છે.
શેરબજારના મુખ્ય આંકડા: સેન્સેક્સ અને નિફ્ટીમાં કડાકો
આજના કારોબારી સત્રના અંતે મુંબઈ શેરબજારનો સૂચકાંક સેન્સેક્સ 829 પોઈન્ટ્સ તૂટીને 76,034 પર બંધ રહ્યો હતો. તેવી જ રીતે, નેશનલ સ્ટોક એક્સચેન્જનો સૂચકાંક નિફ્ટી 228 પોઈન્ટ્સના ઘટાડા સાથે 23,639 પર સ્થિર થયો હતો. નિફ્ટીના 50 માંથી 37 શેરો ઘટાડા સાથે બંધ રહ્યા હતા, જે બજારની નબળી સ્થિતિ દર્શાવે છે. બેન્ક નિફ્ટી પણ 635 પોઈન્ટ્સ ગગડીને 55,101 ના સ્તરે પહોંચી ગઈ હતી.
ઓટો અને બેન્કિંગ સેક્ટરમાં ભારે ધોવાણ
આજે ઓટો શેરોમાં જોરદાર વેચવાલી જોવા મળી હતી. M&M, મારુતિ સુઝુકી અને આઈશર મોટર્સ આજના ટોપ લૂઝર્સમાં સામેલ રહ્યા હતા. છેલ્લા બે દિવસમાં ઓટો ઈન્ડેક્સમાં નોંધપાત્ર ગાબડું પડ્યું છે. બીજી તરફ, બેન્કિંગ સેક્ટરમાં પણ નબળાઈ જોવા મળી હતી, જેના કારણે બેન્ક નિફ્ટી પર દબાણ વધ્યું હતું. મિડકેપ ઈન્ડેક્સ પણ 207 પોઈન્ટ્સના ઘટાડા સાથે બંધ રહ્યો હતો.
વધનારા અને ઘટનારા શેરો (Top Gainers & Losers)
બજારમાં આટલા મોટા ઘટાડા વચ્ચે પણ કેટલાક શેરોએ મજબૂતી બતાવી હતી:
Gainers: કોલ ઈન્ડિયા (Coal India) લગભગ 5% વધ્યો હતો. આરતી ઇન્ડસ્ટ્રીઝ (Aarti Industries) ને $150 મિલિયનનો એગ્રોકેમિકલ સપ્લાય કોન્ટ્રાક્ટ મળતા તેના શેરમાં 5% થી વધુનો ઉછાળો આવ્યો હતો.
Losers: એલએન્ડટી (L&T) ના ટાર્ગેટ પ્રાઈસમાં કાપ મૂકાતા તે 3% ઘટ્યો હતો. કોલગેટના શેરમાં છેલ્લા બે દિવસમાં 10% થી વધુનો ઘટાડો નોંધાયો છે. સ્વિગી (Swiggy) અને ઇટરનલ (Eternal) ના શેરોમાં પણ 3% સુધીનો ઘટાડો જોવા મળ્યો હતો.
ક્રૂડ ઓઈલ સંકટ: IEA ની ગંભીર ચેતવણી
આંતરરાષ્ટ્રીય ઉર્જા એજન્સી (IEA) એ ચેતવણી આપી છે કે, મધ્ય પૂર્વમાં યુદ્ધને કારણે તેલના બજારમાં ઇતિહાસનો સૌથી મોટો સપ્લાય શોક આવી શકે છે. યુદ્ધના કારણે એરલાઇન્સ ગ્રાઉન્ડેડ થઈ છે અને ઔદ્યોગિક પ્રવૃત્તિઓ ધીમી પડી છે. 'સ્ટ્રેટ ઓફ હોર્મુઝ' માંથી ઓઈલની હેરફેર 20 મિલિયન બેરલ પ્રતિ દિવસથી ઘટીને નજીવી રહી ગઈ છે, જેના કારણે વૈશ્વિક સ્તરે મોંઘવારી વધવાની આશંકા છે.
રૂપિયાની સ્થિતિ અને અન્ય અપડેટ્સ
ભારતીય ચલણ અને કોર્પોરેટ જગતની અન્ય મહત્વની હિલચાલ પર નજર કરીએ તો, આજે ડોલર સામે રૂપિયામાં ફરી નબળાઈ જોવા મળી છે. શેરબજારમાં રહેલા ભારે વેચાણના દબાણ વચ્ચે રૂપિયો ૧૫ પૈસા નબળો પડીને 92.19/$ ના સ્તર પર બંધ રહ્યો હતો, જે રોકાણકારો માટે ચિંતાનો વિષય છે. બીજી તરફ, આઈટી ક્ષેત્રની દિગ્ગજ કંપની HCLTech એ ગૂગલ ક્લાઉડ સાથે હાથ મિલાવ્યા છે. આ વ્યૂહાત્મક ભાગીદારી હેઠળ કંપની આગામી ત્રણ વર્ષમાં પોતાના ગૂગલ ક્લાઉડ-સર્ટિફાઇડ વર્કફોર્સને 12,000 થી વધારીને ૩૫,૦૦૦ થી વધુ કરવાની યોજના ધરાવે છે, જે આર્ટિફિશિયલ ઇન્ટેલિજન્સ (AI) ના વધતા ઉપયોગને વેગ આપશે.
ફાર્મા ક્ષેત્રની વાત કરીએ તો, જેકસનપાલ (Jagsonpal) ના રોકાણકારો માટે સારા સમાચાર આવ્યા છે. કંપનીના બોર્ડ ઓફ ડિરેક્ટર્સે રૂ.250 પ્રતિ શેરના ભાવે શેર બાયબેક કરવાની મંજૂરી આપી દીધી છે. આ જાહેરાત બાદ બજારમાં હકારાત્મક માહોલ સર્જાયો હતો અને કંપનીના શેરમાં 6% થી વધુનો જોરદાર ઉછાળો નોંધાયો હતો. આમ, બજારના એકંદર ઘટાડા વચ્ચે પણ પસંદગીના શેરોમાં એક્શન જોવા મળી હતી.
