SEBIની JANE STREET પર મોટી કાર્યવાહી : 4800 કરોડથી વધુ રૂપિયા જપ્ત કરવાનો આદેશ

ભારતીય શેરબજારના નિયમનકારી સંસ્થાન સિક્યોરિટીઝ એન્ડ એક્સચેન્જ બોર્ડ ઓફ ઇન્ડિયા (SEBI)એ અમેરિકાની જાણીતી ટ્રેડિંગ ફર્મ Jane Street Group સામે ગંભીર કાર્યવાહી હાથ ધરી છે. SEBIએ Jane Street પર ભારતીય બજારમાં વ્યવસાય કરવા પર પ્રતિબંધ મૂકતા, કંપનીએ ગેરકાયદેસર રીતે કમાયેલાં ₹4843 કરોડ રિફંડ કરવાનો આદેશ કર્યો છે.

SEBIનો આદેશ : કોઈપણ પ્રકારના સોદામાં પ્રતિબંધ
SEBIના તાજેતરના આદેશમાં સ્પષ્ટ કરાયું છે કે Jane Street હવે ભારતીય શેરબજારમાં કોઈપણ પ્રકારના ખરીદી-વેચાણ અથવા અન્ય સોદામાં, પ્રત્યક્ષ કે પરોક્ષ રીતે ભાગ લઈ શકશે નહીં. ઉપરાંત, SEBIએ બેંકોને પણ સૂચના આપી છે કે Jane Street પોતાના ખાતામાંથી નિયમનકારની મંજૂરી વિના પૈસા ઉપાડી ન શકે.

આદેશ અનુસાર, SEBI Jane Street દ્વારા કુલ ₹4,843.57 કરોડ (48.4 અબજ રૂપિયા) ગેરરીતે કમાઈ હોવાનું માને છે, જે નાણાં હવે સંપૂર્ણપણે જપ્ત કરવામાં આવશે.

SEBIએ સમયગાળો જાહેર કર્યો નહીં, પણ સંદેશ સ્પષ્ટ
આ દરમિયાન SEBIએ હજુ સુધી સ્પષ્ટ રીતે જાહેર કરેલું નથી કે Jane Street દ્વારા કયા સમયગાળામાં આ ઉલ્લંઘનો કરવામાં આવ્યા હતા. તેમ છતાં, આ પગલું એ દર્શાવે છે કે ભારતીય નિયમનકાર વિદેશી પેઢીઓના અપાર વ્યાપાર પર બાજ નજર રાખી રહ્યો છે અને જરૂર પડે ત્યારે તાકીદે પગલાં ભરી રહ્યો છે.

વિશ્વભરમાં પ્રતિષ્ઠિત Jane Street હવે દબાણ હેઠળ
Jane Street દુનિયાભરની સૌથી મોટી અને પ્રભાવશાળી ટ્રેડિંગ ફર્મોમાંથી એક ગણાય છે. તેનો વ્યાપાર ઈક્વિટી, બોન્ડ, ETF અને ડેરિવેટિવ્ઝ સેગમેન્ટ્સ સુધી વિસ્તરેલો છે. બ્લૂમબર્ગના અહેવાલ પ્રમાણે, માત્ર ગયા વર્ષે Jane Streetએ ભારતીય બજારમાંથી લગભગ 2.3 ટ્રિલિયન ડોલરનું ટ્રેડિંગ કર્યું હતું.

SEBIની આ કાર્યવાહી ફક્ત Jane Street માટે નહીં, પરંતુ અત્યંત આક્રમક વ્યૂહરચના અપનાવતી અન્ય વિદેશી કંપનીઓ માટે પણ એક ચેતવણીરૂપ સંદેશ બની રહી છે — કે ભારતીય બજારના નિયમો સાથે છેડછાડ કરવી હવે ભારે પડી શકે છે.