મોંઘવારીનો વધુ એક માર: શાળાઓ શરૂ થતાં જ ફી : પુસ્તકો અને યુનિફોર્મ બાદ હવે ટ્રાન્સપોર્ટ ખર્ચમાં પણ વધારાના એંધાણ

નવા શૈક્ષણિક સત્રની શરૂઆતને હવે ગણતરીના દિવસો બાકી રહ્યા છે, ત્યારે રાજ્યભરના વાલીઓ માટે વધુ એક ચિંતાજનક સમાચાર સામે આવ્યા છે. શાળા ફી, પુસ્તકો, નોટબુક, યુનિફોર્મ અને અન્ય શૈક્ષણિક ખર્ચના ભાર નીચે દબાયેલા વાલીઓના ખિસ્સા પર હવે સ્કૂલ ટ્રાન્સપોર્ટના વધતા ભાડાનો પણ સીધો માર પડવાની શક્યતા ઉભી થઈ છે. ઈંધણના સતત વધી રહેલા ભાવો અને ખાસ કરીને સીએનજીના દરોમાં થયેલા વધારાને કારણે આગામી દિવસોમાં સ્કૂલ વાન અને રિક્ષાના ભાડામાં 10 થી 15 ટકા સુધીનો વધારો થઈ શકે છે.

શાળાઓ શરૂ થાય તે પહેલાં જ મધ્યમવર્ગીય પરિવારોમાં આ મુદ્દે ચિંતા વધી રહી છે. વાલીઓનું કહેવું છે કે દર વર્ષે નવા શૈક્ષણિક સત્ર પહેલા જ ઘરનું બજેટ ખોરવાઈ જાય છે, પરંતુ આ વખતે મોંઘવારીનો બોજ વધુ ગંભીર બન્યો છે. શિક્ષણ સાથે જોડાયેલા લગભગ દરેક ખર્ચમાં વધારો નોંધાતા પરિવારોને માસિક ખર્ચનું સંતુલન જાળવવું મુશ્કેલ બની રહ્યું છે.

આ પણ વાંચો: મોંઘવારીનાં ડબલ એટેકે વગાડી બજેટની બેન્ડ! : હોર્મુઝ સંકટ વચ્ચે દેશમાં પેટ્રોલ-ડીઝલની અછત, હવે કરિયાણાથી દવાઓ સુધી બધું જ થશે મોંઘું!

CNGના વધતા ભાવનો સીધો પ્રભાવ

ટ્રાન્સપોર્ટ વ્યવસાય સાથે જોડાયેલા લોકોના જણાવ્યા મુજબ, છેલ્લા એક વર્ષ દરમિયાન સીએનજીના ભાવમાં નોંધપાત્ર વધારો થયો છે. વર્ષ 2024ની સરખામણીએ હાલમાં પ્રતિ કિલો સીએનજીના ભાવમાં અંદાજે 10 રૂપિયાનો વધારો નોંધાયો હોવાનું કહેવામાં આવી રહ્યું છે. તેના કારણે સ્કૂલ વાન અને રિક્ષા ચલાવતા ડ્રાઈવરોના દૈનિક ખર્ચમાં મોટો વધારો થયો છે.

સ્કૂલ ટ્રાન્સપોર્ટ ચલાવતા સંચાલકોનું કહેવું છે કે માત્ર ઈંધણ જ નહીં, પરંતુ વાહનોની જાળવણી, સ્પેર પાર્ટ્સ, ઈન્સ્યોરન્સ અને મરામત ખર્ચમાં પણ સતત વધારો થઈ રહ્યો છે. આવી સ્થિતિમાં જૂના ભાડે સેવા ચાલુ રાખવી મુશ્કેલ બની રહી છે. પરિણામે, નવા શૈક્ષણિક સત્રથી ભાડામાં વધારો લગભગ નિશ્ચિત માનવામાં આવી રહ્યો છે.

હાલમાં શહેરોમાં સ્કૂલ વાનનું માસિક ભાડું અંદાજે 1200 રૂપિયા સુધી પહોંચ્યું છે, જ્યારે રિક્ષાના ભાડા 750 રૂપિયા કે તેથી વધુ વસૂલવામાં આવી રહ્યા છે. જો આગામી દિવસોમાં 10 થી 15 ટકા સુધીનો વધારો અમલમાં આવશે, તો વાલીઓએ દર મહિને વધુ ખર્ચ માટે તૈયાર રહેવું પડશે.

આ પણ વાંચો: વાયરલ ક્લિપ મુદ્દે મહેસાણાના રાજકારણમાં ગરમાવો : ભાજપ નેતા પિન્ટુ પટેલની અટકાયત

એકથી વધુ બાળકો ધરાવતા પરિવારો પર સૌથી વધુ અસર

મધ્યમવર્ગીય અને નોકરીયાત પરિવારો માટે આ વધારાનો બોજ વધુ ગંભીર બની શકે છે. ખાસ કરીને જેમના એકથી વધુ બાળકો શાળામાં અભ્યાસ કરે છે, તેમના માટે શિક્ષણ ખર્ચ હવે મોટું આર્થિક પડકાર બની રહ્યો છે. વાલીઓનું કહેવું છે કે સ્કૂલ ફી, એડમિશન ચાર્જ, પુસ્તકો અને યુનિફોર્મ પાછળ પહેલેથી જ હજારો રૂપિયાનો ખર્ચ થઈ ગયો છે. હવે ટ્રાન્સપોર્ટના વધતા ભાડા કારણે માસિક બજેટમાં વધુ ખાડો પડશે. કેટલાક વાલીઓએ ચિંતા વ્યક્ત કરી છે કે જો આ જ રીતે દરેક ક્ષેત્રમાં ભાવવધારો ચાલુ રહેશે, તો બાળકોને ગુણવત્તાસભર શિક્ષણ આપવું પણ મુશ્કેલ બની શકે છે.

શહેરોમાં વધતી ટ્રાફિક સમસ્યાઓ અને લાંબા અંતરને કારણે ઘણા વાલીઓ પાસે સ્કૂલ ટ્રાન્સપોર્ટનો ઉપયોગ કરવા સિવાય કોઈ વિકલ્પ રહેતો નથી. ખાસ કરીને કામકાજ કરતા માતા-પિતાને બાળકોને જાતે સ્કૂલ મુકવા-લાવવા મુશ્કેલ પડતું હોવાથી તેઓ વાન અને રિક્ષા પર નિર્ભર રહે છે.

આ પણ વાંચો: ગુજરાતના શિક્ષણ વિભાગમાં બમ્પર ભરતી : વિદ્યાસહાયકથી મુખ્ય શિક્ષક સુધીની જગ્યાઓ માટે આ તારીખથી અરજી શરૂ

સત્તાવાર જાહેરાત થઈ નથી

હાલ સુધી સ્કૂલ વાન અને રિક્ષા એસોસિએશન દ્વારા ભાડા વધારા અંગે કોઈ સત્તાવાર જાહેરાત કરવામાં આવી નથી. જોકે, ટ્રાન્સપોર્ટ ક્ષેત્ર સાથે જોડાયેલા સૂત્રોનું કહેવું છે કે વધેલા ઈંધણ ખર્ચને ધ્યાનમાં લેતા આ વખતે ભાડામાં વધારો ટાળવો મુશ્કેલ બની ગયો છે. જૂન મહિનાથી નવા શૈક્ષણિક સત્રની શરૂઆત સાથે જ નવા દર લાગુ થઈ શકે તેવી શક્યતા વ્યક્ત કરવામાં આવી રહી છે. જો આવું થશે તો વાલીઓ માટે આર્થિક દબાણ વધુ વધી શકે છે.

આર્થિક નિષ્ણાતોના મતે, સતત વધતી મોંઘવારીનો સૌથી વધુ પ્રભાવ મધ્યમવર્ગ પર પડે છે, કારણ કે તેમની આવક મર્યાદિત હોય છે જ્યારે શિક્ષણ, આરોગ્ય અને પરિવહન જેવા આવશ્યક ખર્ચ સતત વધી રહ્યા છે. આવી સ્થિતિમાં સરકાર દ્વારા શિક્ષણ અને જાહેર પરિવહન ક્ષેત્રે રાહતભર્યા પગલાં ભરવાની માંગ પણ ઉઠી રહી છે.