Salman Khan craze in Surat : ડાયમંડ સિટી સુરતમાં આજે બોલિવૂડ સુપરસ્ટાર સલમાન ખાનના આગમનથી દિવાળી જેવો માહોલ સર્જાયો હતો. ઇન્ડિયન સ્ટ્રીટ પ્રીમિયર લીગ (ISPL) ના પ્રમોશન અને પોતાની ટીમને સપોર્ટ કરવા માટે સલમાન ખાન સુરત પહોંચતા જ આખું શહેર ગુંજી ઉઠ્યું હતું. એરપોર્ટથી લઈને લાલભાઈ કોન્ટ્રાક્ટર સ્ટેડિયમ સુધી માત્ર ને માત્ર 'ભાઈજાન' ના ચાહકો જ નજરે પડતા હતા.
એરપોર્ટ પર ફેન્સની ભીડ
સલમાન ખાન સુરત એરપોર્ટ પર ઉતરવાના છે તેવા સમાચાર મળતા જ હજારોની સંખ્યામાં ફેન્સ ત્યાં ઉમટી પડ્યા હતા. સલમાન ખાન બહાર આવતાની સાથે જ 'સલમાન ભાઈ-સલમાન ભાઈ' ના નારા લાગ્યા હતા. ભીડ એટલી પ્રચંડ હતી કે, સુરક્ષાકર્મીઓએ તેમને ગાડી સુધી પહોંચાડવા માટે ભારે સંઘર્ષ કરવો પડ્યો હતો. આ દરમિયાન વધુ પડતી ધક્કામુક્કી થતા થોડીવાર માટે અફરાતફરીનો માહોલ પણ સર્જાયો હતો.
સ્ટેડિયમમાં જીત્યા દિલ
લાલભાઈ કોન્ટ્રાક્ટર સ્ટેડિયમ ખાતે સલમાન ખાને લગભગ 15 મિનિટ સુધી મેદાનમાં રાઉન્ડ લગાવીને પ્રેક્ષકોનું અભિવાદન ઝીલ્યું હતું. ખાસ વાત એ હતી કે, સલમાન ખાને પોતાની સાઈન કરેલા બોલ ફેન્સ તરફ ફેંકીને સૌના દિલ જીતી લીધા હતા. તેમની સાથે બહેન અર્પિતા ખાન શર્મા પણ હાજર રહી હતી. સલમાન ખાન અહીં પોતાની દિલ્હીની ટીમને પ્રોત્સાહિત કરવા ખાસ ઉપસ્થિત રહ્યા હતા.
ફેનનો અનોખો પ્રેમ
સલમાન ખાનના આગમન વચ્ચે એક ફેન આકર્ષણનું કેન્દ્ર બન્યો હતો. આ યુવક પોતાના આખા પરિવાર સાથે સલમાન ખાનને મળવા પહોંચ્યો હતો. તે પોતાના હાથે બનાવેલું સલમાન ખાનનું સુંદર પેઇન્ટિંગ ભેટ આપવા માટે લાવ્યો હતો. તેણે જણાવ્યું હતું કે, તે સલમાન સરનો ખૂબ મોટો ચાહક છે અને ખાસ આ દિવસ માટે તેણે પેઇન્ટિંગ તૈયાર કર્યું હતું.
ચુસ્ત સુરક્ષા વ્યવસ્થા
સલમાન ખાનની સુરક્ષામાં કોઈ કમી ન રહી જાય તે માટે ખાનગી બાઉન્સર્સ અને સ્થાનિક પોલીસનો કાફલો ખડેપગે રહ્યો હતો. સુરક્ષાના કારણોસર સલમાન ખાન સુરતમાં પોતાની ખાસ બુલેટપ્રૂફ કારમાં ફરતા જોવા મળ્યા હતા, જેના વીડિયો સોશિયલ મીડિયા પર ખુબ વાયરલ થઈ રહ્યા છે.
ખેલાડીઓ અને રોબોટ સાથે મુલાકાત
મેદાન પર સલમાન ખાનનો એક અલગ જ અંદાજ જોવા મળ્યો હતો. તેમણે મેચ રમી રહેલા ટીમના ખેલાડીઓ પાસે જઈને તેમનો ઉત્સાહ વધાર્યો હતો અને દરેક પ્લેયર સાથે હાથ મિલાવ્યા હતા. ખેલાડીઓ સાથે ટૂંકી વાતચીત કર્યા બાદ, સલમાન ખાને ત્યાં હાજર એક 'રોબોટ' સાથે પણ હાથ મિલાવીને હળવાશની પળો માણી હતી. ટેકનોલોજી અને સ્પોર્ટ્સના આ અનોખા સંગમને જોઈને સ્ટેડિયમમાં હાજર પ્રેક્ષકોમાં ભારે રોમાંચ જોવા મળ્યો હતો.
ટેનિસ ક્રિકેટનો ઉત્સાહ
ISPL એટલે કે, ટેનિસ બોલ ક્રિકેટને પ્રોત્સાહન આપવા માટે સલમાન ખાનનું સુરત આવવું શહેર માટે ગર્વની વાત છે. સલમાન ખાનની હાજરીને કારણે સ્ટેડિયમ આગામી મેચોમાં હાઉસફૂલ રહે તેવી પૂરેપૂરી શક્યતા છે.
