રશિયામાં 9/11 જેવો હુમલો : 3 હાઈરાઈઝ બિલ્ડિંગને કિલર ડ્રોનથી બનાવાઈ નિશાન

રશિયાના કઝાન શહેરમાં એક ભયાનક હુમલો થયો છે જેણે દુનિયાને અમેરિકાના ઈતિહાસના સૌથી ભયાનક 9/11 હુમલાની યાદ અપાવી દીધી છે. રશિયાના કઝાન શહેરમાં સીરીયલ ડ્રોન (UAV) હુમલા કરવામાં આવ્યા છે. આ હુમલા કઝાન શહેરની ત્રણ બહુમાળી ઈમારતોમાં થયા હતા. હુમલાને કારણે મોટું નુકસાન થયું હોવાનું સામે આવી રહ્યું છે. જો કે, રશિયાનું કહેવું છે કે, તેમણે એક ડ્રોનને નષ્ટ કરી દીધું છે.

કાઝાનમાં બહુમાળી ઇમારતો પર UAV હુમલાની તસવીરો અને વીડિયો સોશિયલ મીડિયા પર શેર કરવામાં આવી રહ્યા છે. તેમાં સ્પષ્ટપણે જોઈ શકાય છે કે, જુદી જુદી દિશામાંથી આવતા કિલર ડ્રોન (UAV) હવામાં ઈમારતો સાથે અથડાઈ રહ્યા છે. ડ્રોન ઈમારત સાથે અથડાયા બાદ મોટો વિસ્ફોટ પણ જોવા મળી રહ્યો છે. રશિયાએ આ હુમલા માટે યુક્રેન પર સીધો આરોપ લગાવ્યો છે. રશિયાના રક્ષા મંત્રાલયે ટ્વીટ કરીને કહ્યું છે કે, આ ડ્રોન હુમલો યુક્રેન દ્વારા કરવામાં આવ્યો છે.

ખાલી કરાવવામાં આવી આસપાસની અન્ય ઈમારતો
રશિયાથી આવી રહેલી માહિતી પરથી એવી અટકળો લગાવવામાં આવી રહી છે કે, આ ઈમારતોમાં રહેવાસીઓ રહેતા હતા. તેથી આ હુમલામાં જાનહાનિ થવાની શક્યતા નકારી શકાતી નથી. જો કે, હજુ સુધી કોઈના મોત અંગે કોઈ માહિતી સામે આવી નથી. અન્ય હુમલાની સંભાવનાને કારણે સાવચેતીના ભાગરૂપે નજીકની ઊંચી ઇમારતોને પણ ખાલી કરાવવામાં આવી છે.

મકાનોમાં લાગી આગ
રશિયાના રક્ષા મંત્રાલયે પણ આ હુમલાનો જવાબ આપ્યો છે. રશિયાના રક્ષા મંત્રાલયે દાવો કર્યો છે કે, રશિયાની હવાઈ રક્ષા પ્રણાલીએ કઝાન શહેર ઉપર યુક્રેનના એક ડ્રોનને નષ્ટ કરી દીધું છે. રશિયન મીડિયા એજન્સી સ્પુટનિકને કઝાનના મેયર કાર્યાલય તરફથી કહેવામાં આવ્યું છે કે ડ્રોન હુમલાના કારણે સોવેત્સ્કી, કિરોવસ્કી અને પ્રીવોલ્ઝસ્કી ત્રણ જિલ્લાઓમાં ઘરોમાં આગ લાગી છે. ડ્રોન હુમલાને કારણે જે ઈમારતોમાં આગ લાગી હતી ત્યાં ઓપરેશનલ સેવાઓ ચાલુ છે. જરૂરી તમામ મદદ પૂરી પાડવામાં આવી રહી છે. બિલ્ડિંગમાંથી બહાર કાઢવામાં આવેલા લોકોને રહેવા માટે ભોજન અને આશ્રય આપવામાં આવી રહ્યો છે.

કઝાનમાં જ યોજાઈ હતી 2024ની BRICS સમિટ
કાઝાન શહેર પર થયેલા આ હુમલાની ચર્ચા આખી દુનિયામાં થઈ રહી છે કારણ કે આ જ વર્ષે 2024માં રશિયાના આ શહેરમાં બ્રિક્સ સંમેલન યોજાયું હતું. આ વખતે કઝાનમાં આયોજિત 16મી બ્રિક્સ સંમેલનમાં પ્રથમ વખત સંયુક્ત આરબ અમીરાત, ઈરાન, ઈજિપ્ત અને ઈથોપિયાને સભ્ય તરીકે સામેલ કરવામાં આવ્યા હતા. આ હુમલાને અમેરિકામાં 9/11 (વર્લ્ડ ટ્રેડ સેન્ટર) હુમલા જેવો જ ગણાવવામાં આવી રહ્યો છે.