ગુપ્તચર એજન્સીઓ સતર્ક : તહવ્વુર રાણા દિલ્હી પહોંચતા જ લાલ કિલ્લા-જામા મસ્જિદને બોમ્બથી ઉડાવવાની ધમકી

26/11 મુંબઈ આતંકવાદી હુમલાના માસ્ટરમાઇન્ડ તહવ્વુર રાણાને અમેરિકાથી ભારત લાવવામાં આવી રહ્યો છે. તેને ખાસ વિમાન દ્વારા લાવવામાં આવી રહ્યો છે. દિલ્હીના પાલમ એરપોર્ટ પર તેમના વિમાનના ઉતરાણ પહેલાં લાલ કિલ્લા અને જામા મસ્જિદને બોમ્બથી ઉડાવી દેવાની ધમકી આપવામાં આવી હતી. આ અંગે ગુપ્તચર એજન્સીઓ સતર્ક છે. પોલીસે આ મામલાની તપાસ શરૂ કરી દીધી છે.

તહવ્વુર રાણાને દિલ્હી લાવવામાં આવી રહ્યા હતા ત્યારે લાલ કિલ્લા અને જામા મસ્જિદ પર બોમ્બથી ઉડાવી દેવાની ધમકીભર્યો કોલ આવ્યો. ધમકીભર્યો ફોન આવતાની સાથે જ દિલ્હી પોલીસ અને ગુપ્તચર એજન્સીઓ સક્રિય થઈ ગઈ હતી. દિલ્હી પોલીસના જણાવ્યા અનુસાર તપાસ એજન્સીઓએ બંને સ્થળોએ સંપૂર્ણ તપાસ કરી હતી, પરંતુ કંઈપણ શંકાસ્પદ મળ્યું ન હતું. દિલ્હી પોલીસે કહ્યું કે આ કોલ નકલી હતો.

કોણે કર્યો ફોન? પોલીસ કરી રહી છે તપાસ
દિલ્હી ફાયર વિભાગના અધિકારીએ જણાવ્યું હતું કે ગુરુવારે સવારે 9.03 વાગ્યે સ્મારક પરિસરમાં બોમ્બ હોવાની માહિતી મળી હતી. ટીમો તાત્કાલિક ઘટનાસ્થળે પહોંચી ગઈ અને દરેક ખૂણાની તપાસ કરી. ચેકિંગ દરમિયાન ક્યાંય પણ શંકાસ્પદ વસ્તુઓ મળી ન હતી. હવે પોલીસ એ જાણવાનો પ્રયાસ કરી રહી છે કે ફોન કોણે કર્યો હતો? તેની શોધ ચાલી રહી છે.

અમેરિકાથી દિલ્હી લાવવામાં આવી રહ્યા છે તેહવુર રાણા
તમને જણાવી દઈએ કે રાષ્ટ્રીય તપાસ એજન્સી (NIA) ના પ્રયાસો બાદ યુએસ કોર્ટે મુંબઈ હુમલાના આરોપી તહવ્વુર રાણાના પ્રત્યાર્પણનો આદેશ આપ્યો હતો. તેમને કડક સુરક્ષા વચ્ચે અમેરિકાથી ભારત લાવવામાં આવી રહ્યા છે. તે થોડા સમયમાં દિલ્હી પહોંચશે. આ પછી NIA દ્વારા રાણાને કોર્ટમાં રજૂ કરવામાં આવશે, જ્યાં તેના રિમાન્ડ માંગવામાં આવશે.