MI vs RCB WPL 2026: વિમેન્સ પ્રીમિયર લીગ 2026ની પહેલી મેચ અદ્ભુત રોમાંચથી ભરેલી રહી. રોયલ ચેલેન્જર્સ બેંગ્લોરુ (RCB)એ મુંબઈ ઈન્ડિયન્સ (MI)ને છેલ્લા બોલ પર ત્રણ વિકેટથી હરાવીને સીઝનની શાનદાર શરૂઆત કરી. નવી મુંબઈના ડીવાય પાટીલ સ્ટેડિયમમાં રમાયેલા આ મેચમાં નાદિન ડી ક્લાર્કની ઓલરાઉન્ડ પર્ફોર્મનસે મેચનું પરિણામ બદલી નાખ્યું. તેણે બોલિંગમાં 4 વિકેટ લીધી અને બેટિંગમાં અણનમ 63 રન બનાવીને RCBને અશક્ય જીત અપાવી.
મુંબઈ ઈન્ડિયન્સે બનાવ્યા 154 રન
ટોસ હારીને પહેલા બેટિંગ કરવા ઉતરેલી મુંબઈ ઈન્ડિયન્સની શરૂઆત ખરાબ રહી. અમેલિયા કેર માત્ર 4 રન બનાવીને આઉટ થઈ ગઈ. ત્યારબાદ નેટ સિવર-બ્રન્ટ, ગુનલાન કમલિની અને કેપ્ટન હરમનપ્રીત કૌર પણ ઝડપથી આઉટ થતાં ટીમ 67 રન પર 4 વિકેટ ગુમાવી બેઠી. આ સમયે મેચ મુંબઈથી દૂર જતો દેખાતો હતો, પરંતુ સજીવન સજના અને નિકોલા કેરીની જોડીએ શાનદાર કમબેક કર્યું. સજનાએ 25 બોલમાં 7 ચોગ્ગા અને 1 છગ્ગા સાથે 45 રન બનાવ્યા, જ્યારે કેરીએ 29 બોલમાં 40 રન ફટકાર્યા. આથી મુંબઈએ 20 ઓવરમાં 6 વિકેટે 154 રન બનાવ્યા.
નાદિન ડી ક્લાર્કની શાનદાર બોલિંગ
RCB તરફથી બોલિંગમાં નાદિન ડી ક્લાર્કે અદ્ભુત પ્રદર્શન કર્યું. તેણે 4 ઓવરમાં 26 રન આપીને 4 મહત્વની વિકેટ ઝડપી. લોરેન બેલે પણ કડક બોલિંગ કરીને 4 ઓવરમાં માત્ર 14 રન આપ્યા અને 19 ડોટ બોલ ફેંકીને 1 વિકેટ લીધી. આ ઉપરાંત શ્રેયંકા પાટીલે પણ 1 સફળતા મેળવી. આ બોલિંગ પ્રદર્શને મુંબઈને મોટા સ્કોરથી રોકી દીધો.
નાદિન ડી ક્લાર્કે રમી મેચ વિનિંગ પારી
155 રનના ટાર્ગેટનો ચેઝ કરતી વખતે RCBની શરૂઆત સારી રહી. ગ્રેસ હેરિસ અને કેપ્ટન સ્મૃતિ મંધાનાએ પ્રથમ વિકેટ માટે 40 રન જોડ્યા. પરંતુ ત્યારબાદ ટીમે ઝડપથી વિકેટ ગુમાવી અને 121 રન પર 7 વિકેટ પડી ગઈ. મેચ હાથમાંથી નીકળી જતી દેખાતી હતી, પરંતુ નાદિન ડી ક્લાર્કે અદ્ભુત ઇનિંગ રમીને બધું બદલી નાખ્યું. તેણે 44 બોલમાં 7 ચોગ્ગા અને 2 છગ્ગા સાથે 63 રનની અણનમ ઇનિંગ રમી.આખરી 2 ઓવરમાં 29 રનની જરૂર હતી. ડી ક્લાર્કે પ્રેમા રાવત સાથે મળીને 19મી ઓવરમાં 11 રન બનાવ્યા. આખરી ઓવરમાં 18 રનની જરૂર હતી, જ્યાં તેણે શાનદાર હીરો બનીને બે છગ્ગા અને બે ચોગ્ગા ફટકારીને મેચ જીતી લીધી. આ રોમાંચક જીતથી RCBએ સીઝનની શાનદાર શરૂઆત કરી છે અને નાદિન ડી ક્લાર્કને પ્લેયર ઓફ ધ મેચનો એવોર્ડ મળ્યો છે.
