Ram Temple Donation Controversy : અયોધ્યામાં ભવ્ય રામ મંદિરના નિર્માણ અને પ્રાણ પ્રતિષ્ઠા બાદ હવે મંદિરના દાન વ્યવસ્થાપનને લઈને ઊભા થયેલા વિવાદે નવા પ્રશ્નો ઊભા કર્યા છે. મંદિરને મળતા દાન અને ચઢાવામાં કથિત અનિયમિતતાઓ તથા ગેરવહીવટના આરોપો વચ્ચે આજે શ્રી રામ જન્મભૂમિ તીર્થ ક્ષેત્ર ટ્રસ્ટની મહત્વપૂર્ણ બેઠક યોજાવા જઈ રહી છે. આ બેઠકમાં પૂર્વ મહાસચિવ ચંપત રાય અને પૂર્વ ટ્રસ્ટી અનિલ મિશ્રાના ભવિષ્ય અંગે નિર્ણય લેવાય તેવી શક્યતા વ્યક્ત કરવામાં આવી રહી છે. ટ્રસ્ટ સાથે સંકળાયેલા સૂત્રોના જણાવ્યા મુજબ, બંને અધિકારીઓએ 26 જૂનના રોજ પોતાના રાજીનામા સુપરત કર્યા હતા, જ્યારે 27 જૂને ટ્રસ્ટના ખજાનચી સ્વામી ગોવિંદ દેવ ગિરીએ તેના સ્વીકારની પ્રક્રિયા અંગે માહિતી આપી હતી. હવે આ રાજીનામાઓને ઔપચારિક મંજૂરી આપવામાં આવે છે કે નહીં, તે અંગે સૌની નજર આજની બેઠક પર ટકેલી છે.
નૃત્ય ગોપાલ દાસનો કડક સંદેશ
આ સમગ્ર મામલે શ્રી રામ જન્મભૂમિ તીર્થ ક્ષેત્રના પ્રમુખ મહંત નૃત્ય ગોપાલ દાસે ભાવુક અને કડક પ્રતિસાદ આપ્યો છે. તેમણે જાહેર કરેલા નિવેદનમાં જણાવ્યું કે રામલલા મંદિરમાં દાનની કથિત ચોરીથી તેમને અત્યંત દુઃખ થયું છે અને આ પ્રકારનું કૃત્ય કરોડો શ્રદ્ધાળુઓની ભાવનાઓને ઠેસ પહોંચાડનારું છે. તેમણે સ્પષ્ટ શબ્દોમાં કહ્યું કે, “આ પાપમાં જે કોઈ પણ વ્યક્તિ સામેલ હશે, તેને કોઈ પણ સંજોગોમાં છોડવામાં નહીં આવે અને કાયદા અનુસાર કડક સજા અપાવવામાં આવશે.” તેમણે આ મુદ્દાને ધાર્મિક આસ્થા સાથે જોડાયેલો સંવેદનશીલ વિષય ગણાવ્યો અને વ્યક્તિગત અથવા રાજકીય લાભ માટે તેનો ઉપયોગ ન કરવાની અપીલ કરી. મહંત નૃત્ય ગોપાલ દાસે વડાપ્રધાન નરેન્દ્ર મોદી અને ઉત્તર પ્રદેશના મુખ્યમંત્રી યોગી આદિત્યનાથ પર વિશ્વાસ વ્યક્ત કરતાં જણાવ્યું કે દોષિતો સામે નિષ્પક્ષ કાર્યવાહી થશે અને ભક્તોની શ્રદ્ધા સાથે કોઈ સમાધાન કરવામાં આવશે નહીં.
આ પણ ખાસ વાંચો : નવવિવાહિતાના મોતે ઉઠાવ્યા અનેક સવાલ : ઓફિસમાં પાર્ટી પછી થયું મોત, પરિવારનો હત્યાનો આરોપ
આજે બપોરે 3 વાગ્યે ટ્રસ્ટની મહાબેઠક
રામ મંદિર સંકુલમાં બપોરે 3 વાગ્યે યોજાનારી આ બેઠકને અત્યંત મહત્વપૂર્ણ માનવામાં આવી રહી છે. બેઠકમાં માત્ર રાજીનામાઓ પર ચર્ચા જ નહીં, પરંતુ મંદિરની દાનપેટીઓમાંથી પ્રાપ્ત થતી રકમની ગણતરી, હિસાબી પ્રક્રિયા અને સુરક્ષા વ્યવસ્થાઓ અંગે પણ વિશેષ ચર્ચા થવાની છે. સૂત્રો મુજબ, ટ્રસ્ટ સમક્ષ સ્પેશિયલ ઇન્વેસ્ટિગેશન ટીમ (SIT)ના પ્રાથમિક અહેવાલની સમીક્ષા પણ રજૂ થઈ શકે છે. આ ઉપરાંત નાણાકીય વર્ષ 2025-26 માટેની ઓડિટ વ્યવસ્થા વધુ મજબૂત બનાવવા અને ભવિષ્યમાં પારદર્શિતા વધારવા માટેના વહીવટી સુધારાઓ અંગે પણ ચર્ચા થશે. તાજેતરમાં ટ્રસ્ટના ખજાનચી સ્વામી ગોવિંદ દેવ ગિરીએ પણ સ્પષ્ટતા કરી હતી કે તેઓ દૈનિક દાન ગણતરી પ્રક્રિયામાં સીધા રીતે સામેલ નહોતા અને તમામ ઓડિટ દસ્તાવેજો સુરક્ષિત હોવાનું જણાવ્યું હતું.
તપાસ અને ધરપકડો બાદ વધ્યું દબાણ
દાનમાં થયેલી કથિત ગેરરીતિઓના કેસમાં અત્યાર સુધી અનેક લોકોની પૂછપરછ કરવામાં આવી છે અને કેટલાક આરોપીઓની ધરપકડ પણ થઈ ચૂકી છે. તપાસ એજન્સીઓ મંદિર સુધી પહોંચતી રકમ, તેની ગણતરી, સંગ્રહ અને બેંક જમા કરવાની સમગ્ર પ્રક્રિયાની તપાસ કરી રહી છે. પૂર્વ મહાસચિવ ચંપત રાયની પણ પૂછપરછ થઈ હોવાનું સામે આવ્યું છે. જોકે તેમણે પોતાના પર લાગેલા આરોપોને નકારી કાઢ્યા છે અને તપાસમાં સહકાર આપવાની વાત કરી છે. અહેવાલો અનુસાર તેમણે આ સમગ્ર ઘટનાને ‘વિશ્વાસઘાત’ ગણાવ્યો હોવાનું પણ જાણવા મળ્યું છે.
આ પણ ખાસ વાંચો : 3550 પગથિયાં ચઢી તિરુમલા 116 વર્ષના માજી : દ્રશ્ય જોઈ ભાવુક થયા મુખ્યમંત્રી, વૃદ્ધાના હોંસલાને આખા દેશની સલામ
નવા હોદ્દેદારોના નામ પર ચર્ચા
ચંપત રાય અને અનિલ મિશ્રાના રાજીનામા મંજૂર થાય તો ટ્રસ્ટમાં સર્જાનારી ખાલી જગ્યાઓ માટે નવા ચહેરાઓની પસંદગી પણ મહત્વપૂર્ણ મુદ્દો બની શકે છે. સૂત્રો અનુસાર, બજરંગ બાંગરા અને નીરજ દૌનેરિયાના નામ ચર્ચામાં હોવાનું કહેવાઈ રહ્યું છે, જોકે હજુ સુધી કોઈ સત્તાવાર જાહેરાત કરવામાં આવી નથી. આ બેઠકમાં ટ્રસ્ટના ખજાનચી સ્વામી ગોવિંદ દેવ ગિરી, નૃપેન્દ્ર મિશ્રા અને સ્વામી વિશ્વપ્રસન્નતીર્થ ઉપસ્થિત રહે તેવી શક્યતા છે, જ્યારે વરિષ્ઠ કાનૂની નિષ્ણાત અને ટ્રસ્ટી કે. પરાશરન સહિત કેટલાક સભ્યો વીડિયો કોન્ફરન્સિંગ મારફતે જોડાઈ શકે છે.
ભક્તોની નજર ટ્રસ્ટના નિર્ણય પર
અયોધ્યાના રામ મંદિર સાથે કરોડો લોકોની ધાર્મિક આસ્થા જોડાયેલી હોવાથી દાન સંબંધિત વિવાદે દેશભરમાં ચર્ચા જગાવી છે. ટ્રસ્ટની આજની બેઠક માત્ર વહીવટી કાર્યવાહી પૂરતી સીમિત નહીં રહે, પરંતુ ભક્તોમાં વિશ્વાસ પુનઃસ્થાપિત કરવા માટે પણ મહત્વપૂર્ણ માનવામાં આવી રહી છે. ટ્રસ્ટ દ્વારા લેવામાં આવનારા નિર્ણયો ભવિષ્યમાં મંદિરના દાન સંચાલન અને પારદર્શિતા માટે એક નવા માપદંડ તરીકે જોવામાં આવી શકે છે. આગામી દિવસોમાં SITની અંતિમ તપાસ અને ટ્રસ્ટના સત્તાવાર નિવેદનો પર સમગ્ર દેશની નજર રહેશે.
