Rajkot News: દિલ્હીમાં કોંગ્રેસના નેતા રાહુલ ગાંધી અને કોંગ્રેસ અધ્યક્ષ મલ્લિકાર્જુન ખડગેની અટકાયતના વિરોધમાં રાજકોટ શહેર કોંગ્રેસ દ્વારા જિલ્લા પંચાયત ચોક ખાતે વિરોધ પ્રદર્શન કરવામાં આવ્યું હતું. શહેર કોંગ્રેસ પ્રમુખની આગેવાનીમાં યોજાયેલા આ કાર્યક્રમમાં મોટી સંખ્યામાં કોંગ્રેસના આગેવાનો અને કાર્યકરો જોડાયા હતા. કાર્યકરોએ કેન્દ્ર સરકાર વિરુદ્ધ સૂત્રોચ્ચાર કરીને પોતાની નારાજગી વ્યક્ત કરી હતી.
વિરોધ દરમિયાન કોંગ્રેસના કાર્યકરોએ કેન્દ્રીય શિક્ષણ મંત્રી ધર્મેન્દ્ર પ્રધાનના પ્રતિક મુખવટાને ઝાપટ મારીને વિરોધ નોંધાવ્યો હતો. કાર્યકરોનું કહેવું હતું કે વિદ્યાર્થીઓના મુદ્દે સરકાર નિષ્ફળ ગઈ છે અને વિરોધના અવાજને દબાવવાનો પ્રયાસ કરી રહી છે.
30થી વધુ કોંગ્રેસી કાર્યકરોની અટકાયત
વિરોધ પ્રદર્શન દરમિયાન સ્થિતિ વધુ ઉગ્ર બનતા પોલીસે કાર્યવાહી હાથ ધરી હતી. પોલીસ દ્વારા કોંગ્રેસના 30થી વધુ આગેવાનો અને કાર્યકરોની અટકાયત કરવામાં આવી હતી. અટકાયત દરમિયાન કાર્યકરો અને પોલીસ વચ્ચે ધક્કામુક્કી તથા ઝપાઝપીના દૃશ્યો પણ જોવા મળ્યા હતા.
પોલીસ બંદોબસ્ત વચ્ચે સ્થિતિ કાબૂમાં
પ્રદર્શનને ધ્યાનમાં રાખીને જિલ્લા પંચાયત ચોક ખાતે અગાઉથી જ પોલીસનો ચુસ્ત બંદોબસ્ત ગોઠવવામાં આવ્યો હતો. કાયદો અને વ્યવસ્થા જળવાઈ રહે તે માટે પોલીસે પરિસ્થિતિ પર સતત નજર રાખી હતી. વિરોધ બાદ અટકાયતમાં લેવામાં આવેલા કાર્યકરો સામે કાયદેસરની કાર્યવાહી હાથ ધરવામાં આવી હતી, જ્યારે સમગ્ર ઘટનાએ શહેરના રાજકીય માહોલને વધુ ગરમાવ્યો છે.
કોંગ્રેસે લોકશાહી પર પ્રહારનો લગાવ્યો આરોપ
વિરોધ પ્રદર્શન દરમિયાન કોંગ્રેસના આગેવાનોએ આરોપ લગાવ્યો કે કેન્દ્ર સરકાર વિરોધ પક્ષના નેતાઓના અવાજને દબાવવાનો પ્રયાસ કરી રહી છે. તેમણે જણાવ્યું કે લોકશાહી દેશમાં શાંતિપૂર્ણ વિરોધ પ્રદર્શન દરેક નાગરિક અને રાજકીય પક્ષનો બંધારણીય અધિકાર છે. કોંગ્રેસે વિદ્યાર્થીઓના મુદ્દે સરકાર સંવાદનો માર્ગ અપનાવે અને જવાબદારી નક્કી કરે તેવી પણ માંગ કરી હતી.
આ પણ વાંચો: રાહુલ ગાંધીની અટકાયતના વિરોધમાં ગાંધીનગરમાં કોંગ્રેસનો વિરોધ : મુખ્યમંત્રી નિવાસસ્થાન બહાર વિરોધ પ્રદર્શન, પોલીસે ચુસ્ત બંદોબસ્ત ગોઠવ્યો
ઘટનાના પગલે શહેરમાં રાજકીય ગરમાવો
જિલ્લા પંચાયત ચોક ખાતે યોજાયેલા વિરોધ પ્રદર્શન બાદ રાજકોટમાં રાજકીય માહોલ વધુ ગરમાયો છે. પોલીસ કાર્યવાહી અને કોંગ્રેસના કાર્યકરોની અટકાયતને લઈને વિવિધ રાજકીય વર્તુળોમાં ચર્ચા શરૂ થઈ છે. હવે આ મુદ્દે કોંગ્રેસ આગામી દિવસોમાં વધુ વિરોધ કાર્યક્રમોની જાહેરાત કરે છે કે કેમ અને પોલીસની કાર્યવાહી અંગે શું વલણ અપનાવે છે તેના પર સૌની નજર મંડાયેલી છે.
