શાંતિની આશા પર ફરી વળ્યું પાણી! : પુતિને કહ્યું- હવે લક્ષ્ય પૂરું થાય પછી જ થંભશે યુદ્ધ

મોસ્કો/કીવ: રશિયા અને યુક્રેન વચ્ચે ચાલી રહેલું યુદ્ધ હવે વધુ ગંભીર તબક્કામાં પ્રવેશી રહ્યું છે. એક તરફ યુક્રેન સતત રશિયાના ઊર્જા માળખા, ઓઈલ રિફાઈનરીઓ અને લોજિસ્ટિક્સ નેટવર્ક પર હુમલાઓ તેજ કરી રહ્યું છે, તો બીજી તરફ રશિયાના રાષ્ટ્રપતિ વ્લાદિમીર પુતિને સ્પષ્ટ કરી દીધું છે કે તેઓ યુદ્ધમાંથી પીછેહઠ કરવાના મૂડમાં નથી. યુક્રેન તરફથી રજૂ કરાયેલા યુદ્ધવિરામના પ્રસ્તાવને નકારી કાઢતા પુતિને જણાવ્યું છે કે રશિયાએ નક્કી કરેલા તમામ સૈન્ય અને વ્યૂહાત્મક લક્ષ્યાંકો હાંસલ નહીં થાય ત્યાં સુધી સૈન્ય કાર્યવાહી ચાલુ રહેશે. પુતિનના આ નિવેદન બાદ આંતરરાષ્ટ્રીય સ્તરે ફરી એકવાર ચિંતા વધી છે. અમેરિકા, યુરોપિયન દેશો અને અન્ય વૈશ્વિક શક્તિઓ લાંબા સમયથી બંને દેશોને વાટાઘાટો દ્વારા ઉકેલ લાવવાની અપીલ કરી રહ્યા છે. જોકે તાજેતરની ઘટનાઓ દર્શાવે છે કે બંને પક્ષો હજુ પણ યુદ્ધના મેદાનમાં પોતાની સ્થિતિ મજબૂત બનાવવાના પ્રયાસોમાં વ્યસ્ત છે.

કીવ પર રશિયાનો ઘાતક હુમલો, મૃત્યુઆંક 30 પર પહોંચ્યો

ગુરુવારે રશિયન સેનાએ યુક્રેનની રાજધાની કીવ પર મોટા પાયે મિસાઇલ અને ડ્રોન હુમલા કર્યા હતા. યુક્રેનના અધિકારીઓના જણાવ્યા મુજબ આ હુમલામાં અનેક રહેણાંક વિસ્તારો અને અન્ય ઈમારતોને નુકસાન પહોંચ્યું છે. બચાવ કામગીરી પૂર્ણ થતાં મૃત્યુઆંક વધીને 30 પર પહોંચી ગયો છે, જ્યારે અનેક લોકો ઘાયલ થયા છે. કાટમાળ નીચે ફસાયેલા લોકોને બહાર કાઢવા માટે કલાકો સુધી રાહત અને બચાવ કામગીરી ચલાવવામાં આવી હતી.

આ હુમલાને લઈને પુતિને દાવો કર્યો કે યુક્રેન રશિયાના ઊર્જા ક્ષેત્રને નિશાન બનાવી રહ્યું છે જેથી યુદ્ધના મોરચે તેને મળી રહેલા પડકારો પરથી વિશ્વનું ધ્યાન હટાવી શકાય. જોકે સ્વતંત્ર સુરક્ષા વિશ્લેષકોનું માનવું છે કે છેલ્લા કેટલાક મહિનાઓમાં રશિયન સેનાની આગળ વધવાની ગતિ ધીમી પડી છે અને બંને પક્ષો હવે એકબીજાના મહત્વપૂર્ણ ઈન્ફ્રાસ્ટ્રક્ચરને નિશાન બનાવી રહ્યા છે.

આ પણ વાંચો: ખેતરોને ગળી રહી છે ધરતી! : 700થી વધુ ભયાનક ખાડાઓ બાદ ભારત માટે પણ ઊભું થયું મોટું જોખમ

યુક્રેનના હુમલાથી રશિયાના ઊર્જા ક્ષેત્રને મોટો ફટકો

યુક્રેને છેલ્લા કેટલાક મહિનાઓમાં ડ્રોન અને અન્ય હુમલાઓ દ્વારા રશિયાની ઓઈલ રિફાઈનરીઓ, ઈંધણ સંગ્રહ કેન્દ્રો અને ગેસ સંબંધિત માળખાને નિશાન બનાવ્યું છે. વિવિધ અહેવાલો મુજબ 50થી વધુ મોટા હુમલાઓમાં રશિયાની કુલ 33 રિફાઈનરીઓમાંથી 24 કોઈને કોઈ રીતે પ્રભાવિત થઈ છે. તેમાંથી અનેક સ્થળોએ ઉત્પાદન ક્ષમતા નોંધપાત્ર રીતે ઘટી ગઈ છે, જ્યારે કેટલાક પ્લાન્ટમાં તેલ શુદ્ધિકરણનું કામ અસ્થાયી રીતે બંધ કરવું પડ્યું છે.

આ હુમલાઓના કારણે રશિયાના ઘરેલું ઈંધણ પુરવઠા પર પણ અસર જોવા મળી રહી છે. સ્થાનિક બજારમાં પેટ્રોલ અને ડીઝલની માંગ જાળવી રાખવા માટે સરકારને વૈકલ્પિક વ્યવસ્થાઓ કરવી પડી રહી છે. કેટલાક અહેવાલો અનુસાર રશિયાએ પોતાની જરૂરિયાત પૂરી કરવા માટે ભારત સહિત કેટલાક મિત્ર દેશોમાંથી ઈંધણની આયાત પણ વધારી છે.

આ પણ વાંચો: આજે 4 જુલાઈ : અમેરિકાનો સ્વતંત્રા દિવસ, જાણો આજના દિવસની મહત્વપૂર્ણ ઘટનાઓ

ક્રિમિયામાં પણ ઈંધણની અછત, લોકો લાંબી કતારોમાં ઉભા

રશિયાના નિયંત્રણ હેઠળના ક્રિમિયા દ્વીપકલ્પમાં પણ ઈંધણની અછત વધુ ગંભીર બની રહી હોવાનું સામે આવ્યું છે. પેટ્રોલ અને ડીઝલના મર્યાદિત પુરવઠાને કારણે અનેક ફ્યુઅલ સ્ટેશનો પર વાહનોની લાંબી કતારો જોવા મળી રહી છે. કેટલાક વિસ્તારોમાં લોકોને કલાકો સુધી રાહ જોવી પડી રહી છે. આ સ્થિતિ માત્ર સામાન્ય નાગરિકોને જ નહીં પરંતુ પરિવહન વ્યવસ્થા અને સ્થાનિક વેપારને પણ અસર કરી રહી છે. ઊર્જા પુરવઠામાં ખલેલને કારણે અનેક વિસ્તારોમાં આર્થિક પ્રવૃત્તિઓ પર દબાણ વધી રહ્યું છે.

પુતિનનો વિશ્વાસ યથાવત, યુદ્ધ ચાલુ રાખવાનો સંકેત

રશિયન રાષ્ટ્રપતિ વ્લાદિમીર પુતિને સ્વીકાર્યું છે કે ઊર્જા ક્ષેત્ર સામે ઉભા થયેલા પડકારો ગંભીર છે. તેમ છતાં તેમણે વિશ્વાસ વ્યક્ત કર્યો કે રશિયા ટૂંક સમયમાં આ સ્થિતિમાંથી બહાર આવી જશે. તેમણે ભારપૂર્વક કહ્યું કે હાલની મુશ્કેલીઓ યુદ્ધના લક્ષ્યાંકોને બદલશે નહીં અને રશિયા પોતાની વ્યૂહરચના મુજબ આગળ વધશે.

પુતિનના આ નિવેદનથી સ્પષ્ટ થાય છે કે હાલ નજીકના ભવિષ્યમાં યુદ્ધવિરામની સંભાવના ઓછી દેખાઈ રહી છે. બીજી તરફ યુક્રેન પણ પશ્ચિમી દેશોની સૈન્ય અને આર્થિક મદદના આધારે પોતાના હુમલાઓ ચાલુ રાખવાના સંકેત આપી રહ્યું છે.

આ પણ વાંચો: યુરોપમાં જીવલેણ હીટવેવનો કહેર : ફ્રાન્સ, બેલ્જિયમ અને નેધરલેન્ડ્સમાં 3,700થી વધુ લોકોના મોત

વિશ્વની ચિંતા વધી, આર્થિક અસર પણ ઊંડી બનવાની શક્યતા

રશિયા-યુક્રેન યુદ્ધ હવે માત્ર બે દેશો પૂરતું મર્યાદિત રહ્યું નથી. તેની અસર વૈશ્વિક ઊર્જા બજાર, ખાદ્ય સુરક્ષા, વેપાર માર્ગો અને આંતરરાષ્ટ્રીય રાજનીતિ પર સતત પડી રહી છે. જો બંને દેશો વચ્ચે અથડામણ વધુ તીવ્ર બનશે તો ક્રૂડ ઓઈલના ભાવ, વૈશ્વિક સપ્લાય ચેઇન અને અન્ય કોમોડિટી બજારો પર પણ તેની અસર જોવા મળી શકે છે. વિશ્વના અનેક દેશો હજુ પણ રાજદ્વારી પ્રયાસો દ્વારા યુદ્ધનો અંત લાવવાનો પ્રયાસ કરી રહ્યા છે. જોકે મેદાન પરની સ્થિતિ અને બંને પક્ષોના તાજેતરના નિવેદનો સૂચવે છે કે હાલ સંઘર્ષ અટકવાના કોઈ સ્પષ્ટ સંકેત દેખાતા નથી. આવી સ્થિતિમાં આગામી દિવસોમાં યુદ્ધ વધુ ઉગ્ર બનવાની આશંકા વ્યક્ત કરવામાં આવી રહી છે અને સમગ્ર વિશ્વની નજર હવે રશિયા તથા યુક્રેનની આગામી સૈન્ય અને રાજદ્વારી ચાલ પર ટકેલી છે.