Punjab Election 2026: પંજાબના રાજકીય ઈતિહાસમાં દાયકાઓ સુધી શિરોમણી અકાલી દળના નાના સાથીદાર તરીકે કામ કરનાર ભારતીય જનતા પાર્ટીએ હવે 'સિનિયર પાર્ટનર' બનવાની તૈયારી કરી લીધી છે. ભાજપ હાઈકમાન્ડે સ્પષ્ટ કર્યું છે કે પક્ષ પંજાબની તમામ 117 વિધાનસભા બેઠકો પર સ્વબળે ચૂંટણી લડશે. આ નિર્ણય માત્ર એક ચૂંટણી વ્યૂહરચના નથી, પરંતુ રાજ્યમાં પક્ષના જનાધારને વિસ્તારવાનો એક સાહસિક પ્રયાસ છે. આ મહત્વાકાંક્ષી યોજનાને અમલી બનાવવા માટે કેન્દ્રીય ગૃહમંત્રી અમિત શાહ પોતે મોરચો સંભાળી રહ્યા છે. સૂત્રોના જણાવ્યા અનુસાર, આ મહિનામાં જ પંજાબ ભાજપના વરિષ્ઠ નેતાઓ સાથે એક ઉચ્ચસ્તરીય બેઠક યોજાશે, જેમાં ચૂંટણીના રોડમેપ ઉપરાંત પંજાબની મુખ્ય સમસ્યા 'ડ્રગ્સ' વિરુદ્ધ ભાજપ દ્વારા શરૂ થનારી વિશેષ યાત્રાનું આયોજન કરવામાં આવશે.
રવનીત સિંહ બિટ્ટુના રોલમાં મોટો ફેરફાર
રાજકીય ગલિયારાઓમાં ચર્ચા છે કે કેન્દ્રીય રેલવે રાજ્ય મંત્રી રવનીત સિંહ બિટ્ટુ ટૂંક સમયમાં મોટો નિર્ણય લઈ શકે છે. આગામી 21 જૂને તેમનો રાજ્યસભાનો કાર્યકાળ પૂર્ણ થઈ રહ્યો છે, અને ભાજપ તેમને ફરીથી સંસદના ઉપલા ગૃહમાં મોકલવાના બદલે પંજાબના મેદાનમાં ઉતારવા માંગે છે. અપેક્ષા છે કે તેઓ મંત્રી પદ પરથી રાજીનામું આપીને રાજ્યના સ્થાનિક રાજકારણમાં સક્રિય ભૂમિકા ભજવશે. પાર્ટીએ સ્પષ્ટતા કરી છે કે આ ચૂંટણીમાં કોઈ એક નેતાને મુખ્યમંત્રી પદના ચહેરા તરીકે પ્રોજેક્ટ કરવામાં નહીં આવે, પરંતુ સામૂહિક નેતૃત્વ હેઠળ જ ભાજપ મેદાનમાં ઉતરશે.
આ પણ વાંચો: ભારતના 'દોસ્ત'ની મોટી જાહેરાત: યહૂદી દેશમાં ગૂંજશે છત્રપતિ શિવાજીનું નામ, કારણ જાણી તમને પણ થશે ગર્વ
સંગઠન મજબૂતીકરણ: 'પન્ના પ્રમુખ' થી ગ્રામીણ વિસ્તારો સુધી પહોંચ
ભાજપે પાયાના સ્તરે સંગઠન મજબૂત કરવા માટે 'બૂથ લેવલ' પ્લાનિંગ શરૂ કર્યું છે. 'પન્ના પ્રમુખ' અભિયાન હેઠળ કાર્યકર્તાઓને ખાસ તાલીમ આપવામાં આવી રહી છે. બીજી તરફ, પક્ષ આંતરિક અસંતોષને શાંત કરવા માટે પણ પ્રયત્નશીલ છે. કેપ્ટન અમરિંદર સિંહ અને કેન્દ્રીય નેતૃત્વ વચ્ચેની મુલાકાતે અટકળો પર પૂર્ણવિરામ મૂક્યું છે, જ્યારે ડૉ. જગમોહન રાજુ જેવા નારાજ નેતાઓને મનાવવાની કવાયત ચાલુ છે. પક્ષનું મુખ્ય લક્ષ્ય ખેડૂતો અને ગ્રામીણ વિસ્તારોના ઘરો સુધી પહોંચીને ભાજપની વિચારધારાને પહોંચાડવાનું છે.
લોકસભા ચૂંટણીના આંકડા ભાજપ માટે પ્રોત્સાહનરૂપ
ભાજપના રણનીતિકારો શા માટે આટલા ઉત્સાહી છે? તેના જવાબ પાછળ તાજેતરની લોકસભા ચૂંટણીના આંકડા છે. ભલે પક્ષ એક પણ બેઠક ન જીત્યો હોય, પરંતુ 18.56% વોટ શેર અને વિધાનસભા મુજબ 38 બેઠકો પર મજબૂત પકડ ભાજપનો ઉત્સાહ વધારવા માટે પૂરતી છે. પક્ષના આંકડાઓ મુજબ, 23 બેઠકો પર ભાજપ પ્રથમ નંબરે રહ્યો હતો અને અનેક બેઠકો પર હારનો તફાવત ખૂબ જ નજીવો હતો. 59 બેઠકોના બહુમતી આંકડા સુધી પહોંચવા માટે ભાજપ પોતાની આ 38 બેઠકોને મજબૂત આધાર માનીને ચાલી રહ્યો છે.
આ પણ વાંચો: PM મોદીના ઐતિહાસિક રેકોર્ડની ઉજવણી પર આજે NDAની મેગા બેઠક: 35 પક્ષોના 75થી વધુ દિગ્ગ
પિંડો (ગામડાઓ) પર વિશેષ ફોકસ
ભાજપ જાણે છે કે શહેરી વિસ્તારોમાં તેમની પકડ સારી છે, પરંતુ 'પિંડો' (પંજાબી ગામડાઓ) માં હજુ ઘણું કામ બાકી છે. ચતુષ્કોણીય મુકાબલાના આ રાજકીય માહોલમાં, જ્યાં જીત-હારનો તફાવત બહુ પાતળો હોય છે, ત્યાં ભાજપનો વધતો જનાધાર ગેમ ચેન્જર સાબિત થઈ શકે છે. અમિત શાહના આ 'મિશન પંજાબ'નું પરિણામ શું આવશે, તે જોવું રસપ્રદ રહેશે.
