West Bengal Politics: પશ્ચિમ બંગાળની રાજનીતિમાં તૃણમૂલ કોંગ્રેસ (TMC) માટે મુશ્કેલીઓ સતત વધી રહી હોવાનું જોવા મળી રહ્યું છે. વિધાનસભા સ્તરે શરૂ થયેલા આંતરિક મતભેદો હવે સંસદીય રાજકારણ સુધી પહોંચી ગયા હોવાનું ચર્ચાઈ રહ્યું છે. પક્ષની અંદર વધતા અસંતોષ વચ્ચે હવે TMCના કેટલાક સાંસદોએ અલગ રાજકીય વલણ અપનાવવાના સંકેતો આપ્યા હોવાના અહેવાલો સામે આવ્યા છે. આ સમગ્ર ઘટનાક્રમમાં સૌથી વધુ ચર્ચામાં રહેલું નામ TMCની યુવા અને લોકપ્રિય સાંસદ સાયોની ઘોષનું છે. બંગાળી ફિલ્મ જગતમાંથી રાજકારણમાં પ્રવેશ કરનાર સાયોની ઘોષને મમતા બેનર્જીના નજીકના ચહેરા તરીકે જોવામાં આવે છે. તેથી તેમના નામની ચર્ચાએ રાજકીય વર્તુળોમાં નવી ચર્ચાઓ શરૂ કરી દીધી છે.
લોકસભા સ્પીકરને પત્ર લખાયાની ચર્ચા
અહેવાલો અનુસાર TMCના કેટલાક સાંસદોએ લોકસભા સ્પીકર સમક્ષ સંસદમાં અલગ બેઠકો અને અલગ ઓળખ માટે માંગણી કરી હોવાનું કહેવાઈ રહ્યું છે. આ યાદીમાં સાયોની ઘોષનું નામ પણ સામેલ હોવાનું ચર્ચાઈ રહ્યું છે. રાજકીય વિશ્લેષકોનું માનવું છે કે, જો આ દાવાઓ સાચા સાબિત થાય તો તે TMCના ટોચના નેતૃત્વ માટે મોટો પડકાર બની શકે છે. ખાસ કરીને પક્ષના રાષ્ટ્રીય સ્તરના ચહેરાઓમાં અસંતોષની ચર્ચા TMC માટે ચિંતાનો વિષય બની શકે છે.
કોણ છે સાયોની ઘોષ?
સાયોની ઘોષ પશ્ચિમ બંગાળની જાણીતી અભિનેત્રી, ગાયિકા અને રાજકારણી છે. તેઓ હાલમાં જાદવપુર લોકસભા બેઠકનું પ્રતિનિધિત્વ કરે છે. રાજકારણમાં પ્રવેશ કરતાં પહેલાં તેઓ બંગાળી ફિલ્મ અને ટેલિવિઝન જગતમાં લોકપ્રિય ચહેરા તરીકે જાણીતા હતા. તેમની લોકપ્રિયતા અને યુવા છબીના કારણે TMCએ તેમને ઝડપથી મહત્વની જવાબદારીઓ સોંપી હતી. તેઓ પાર્ટીની યુવા પેઢીના મુખ્ય ચહેરાઓમાં ગણાય છે.
આ પણ વાંચો: TMCને મોટો ઝટકો: રાજ્યસભા સાંસદ સુષ્મિતા દેવે આપ્યું રાજીનામું, હિમંત સરમા સાથે મુલાકાતથી અટકળો તેજ
'કાબા અને મદીના' ગીતથી રાષ્ટ્રીય ચર્ચામાં આવી હતી
પશ્ચિમ બંગાળ વિધાનસભા ચૂંટણી દરમિયાન સાયોની ઘોષ એક ચૂંટણી ગીતને કારણે ભારે ચર્ચામાં આવી હતી. "મેરે દિલ મેં હૈ કાબા ઔર આંખોં મેં મદીના" જેવા શબ્દો ધરાવતા ગીતને લઈને રાજકીય વિવાદ સર્જાયો હતો. તે સમયે વિરોધ પક્ષોએ આ ગીતને લઈને TMC અને મમતા બેનર્જી પર તુષ્ટિકરણના આરોપો લગાવ્યા હતા. સાયોની ઘોષનું નામ ત્યારથી રાષ્ટ્રીય રાજકીય ચર્ચાનો વિષય બન્યું હતું.
રાજકારણમાં ઝડપી ઉછાળો
સાયોની ઘોષે 2021માં તૃણમૂલ કોંગ્રેસમાં સત્તાવાર રીતે જોડાઈ હતી. પાર્ટીમાં જોડાયા બાદ મમતા બેનર્જીએ તેમને આસનસોલ વિધાનસભા બેઠક પરથી ચૂંટણી મેદાનમાં ઉતાર્યા હતા. જોકે તેઓ ચૂંટણી જીતવામાં સફળ રહ્યા નહોતા. પરંતુ, ત્યારબાદ તેમણે સંગઠનમાં પોતાની સક્રિયતા અને રાજકીય કુશળતા દ્વારા ઝડપથી સ્થાન બનાવ્યું. 2023માં તેમને TMC યુથ વિંગના પ્રમુખ તરીકે પણ જવાબદારી સોંપવામાં આવી હતી.
ધરપકડથી લઈને EDની પૂછપરછ સુધી
સાયોની ઘોષ અનેક વખત વિવાદો અને ચર્ચાઓના કેન્દ્રમાં રહી છે. 2021માં ત્રિપુરામાં સ્થાનિક ચૂંટણી દરમિયાન ભાજપ વિરોધી સૂત્રોચ્ચારને લઈને તેમની ધરપકડ કરવામાં આવી હતી, જે મામલે રાષ્ટ્રીય સ્તરે ચર્ચા થઈ હતી. ત્યારબાદ પશ્ચિમ બંગાળના ભરતી કૌભાંડની તપાસ દરમિયાન એન્ફોર્સમેન્ટ ડિરેક્ટોરેટ (ED) દ્વારા તેમની લાંબી પૂછપરછ પણ કરવામાં આવી હતી. આ ઘટનાએ પણ તેમને ફરી એકવાર ચર્ચામાં લાવી દીધા હતા.
2024માં બની લોકસભા સાંસદ
1993માં કોલકાતામાં જન્મેલી સાયોની ઘોષ 2024ની લોકસભા ચૂંટણીમાં જાદવપુર બેઠક પરથી વિજયી બની સંસદમાં પહોંચી હતી. યુવા ચહેરા તરીકે તેઓ TMC માટે મહત્વપૂર્ણ પ્રચારક અને સંગઠનાત્મક નેતા તરીકે ઉભરી આવી હતી. પશ્ચિમ બંગાળની ચૂંટણી દરમિયાન તેઓ પક્ષના સ્ટાર પ્રચારકોમાં સામેલ હતી અને સોશિયલ મીડિયા પર પણ તેમની મોટી લોકપ્રિયતા છે.
TMCમાં વધી રહેલી રાજકીય ઉથલપાથલ
તાજેતરના દિવસોમાં TMCમાં અનેક નેતાઓ અને સાંસદોને લઈને અસંતોષની ચર્ચાઓ સામે આવી રહી છે. કેટલાક અહેવાલોમાં પક્ષના ઘણા સાંસદો અલગ જૂથ બનાવવાની વિચારણા કરી રહ્યા હોવાના દાવા કરવામાં આવ્યા છે. જોકે આ તમામ દાવાઓ અંગે હજુ સુધી સત્તાવાર સ્તરે સ્પષ્ટતા સામે આવી નથી. તેમ છતાં સાયોની ઘોષ જેવા પ્રભાવશાળી ચહેરાનું નામ ચર્ચામાં આવવું TMC માટે રાજકીય રીતે મહત્વપૂર્ણ ઘટના માનવામાં આવી રહી છે. આગામી દિવસોમાં આ ઘટનાક્રમ કઈ દિશામાં આગળ વધે છે અને TMCનું નેતૃત્વ આ પડકારનો કેવી રીતે સામનો કરે છે તેના પર સૌની નજર રહેશે.
