દેશભરમાં આજે લાખો વિદ્યાર્થીઓ માટે મહત્વપૂર્ણ ગણાતી NEET (નેશનલ એલિજિબિલિટી કમ એન્ટ્રન્સ ટેસ્ટ) પરીક્ષા યોજાઈ રહી છે. મેડિકલ ક્ષેત્રમાં પ્રવેશ મેળવવા માટેની આ રાષ્ટ્રીય સ્તરની પરીક્ષા માટે સુરક્ષા અને વ્યવસ્થાના કડક બંદોબસ્ત વચ્ચે પ્રધાનમંત્રી નરેન્દ્ર મોદી સાથે જોડાયેલી એક નોંધપાત્ર ઘટના સામે આવી છે. મળતી માહિતી મુજબ વિદ્યાર્થીઓને પરીક્ષા કેન્દ્ર સુધી પહોંચવામાં કોઈ મુશ્કેલી ન પડે તે માટે પ્રધાનમંત્રી નરેન્દ્ર મોદીએ દિલ્હી એરપોર્ટ પર લગભગ 45 મિનિટ સુધી રાહ જોવાનો નિર્ણય લીધો હતો.
આ નિર્ણયને વિદ્યાર્થીઓ પ્રત્યેની સંવેદનશીલતા અને પરીક્ષાની ગંભીરતાને ધ્યાનમાં રાખીને લેવામાં આવેલા પગલા તરીકે જોવામાં આવી રહ્યો છે. દેશભરમાં લાખો વિદ્યાર્થીઓ પરીક્ષા માટે પોતાના કેન્દ્રો તરફ જઈ રહ્યા હતા ત્યારે વડાપ્રધાનનો કાફલો રસ્તા પર નીકળે અને તેના કારણે ટ્રાફિક વ્યવસ્થા પ્રભાવિત થાય નહીં તે માટે આ પગલું લેવામાં આવ્યું હોવાનું જણાવવામાં આવ્યું છે.
કોલકાતાથી દિલ્હી પહોંચ્યા બાદ એરપોર્ટ પર જ રોકાયા PM
મળતી માહિતી અનુસાર વડાપ્રધાન નરેન્દ્ર મોદી પશ્ચિમ બંગાળના પ્રવાસ પરથી આજે દિલ્હી પરત ફર્યા હતા. તેમનું વિમાન બપોરે લગભગ 1:15 વાગ્યે દિલ્હી એરપોર્ટ પર ઉતર્યું હતું. સામાન્ય રીતે એરપોર્ટ પર પહોંચ્યા બાદ પ્રધાનમંત્રી સીધા પોતાના સત્તાવાર નિવાસસ્થાન તરફ રવાના થતા હોય છે, પરંતુ આ વખતે પરિસ્થિતિ અલગ હતી.
બપોરે 2 વાગ્યે NEET પરીક્ષા શરૂ થવાની હતી અને તે પહેલાં દેશની રાજધાની દિલ્હીમાં મોટી સંખ્યામાં વિદ્યાર્થીઓ વિવિધ પરીક્ષા કેન્દ્રો તરફ જઈ રહ્યા હતા. આવી સ્થિતિમાં પ્રધાનમંત્રીના કાફલાની અવરજવરથી કેટલાક માર્ગો પર ટ્રાફિક વ્યવસ્થામાં ફેરફાર કરવાની જરૂર પડી શકે તેમ હતું.
વિદ્યાર્થીઓને સમયસર પરીક્ષા કેન્દ્ર સુધી પહોંચવામાં કોઈ પ્રકારની મુશ્કેલી ન પડે તે હેતુથી પ્રધાનમંત્રીએ એરપોર્ટ પર જ રાહ જોવાનો નિર્ણય લીધો હતો. પરીક્ષા શરૂ થવાનો સમય પૂર્ણ થયા બાદ જ તેઓ પોતાના નિવાસસ્થાન તરફ રવાના થયા હોવાનું જાણવા મળ્યું છે.
આ પણ વાંચો: અમદાવાદમાં RE-NEET પરીક્ષા દરમિયાન હિજાબ મુદ્દે વિવાદ : પરીક્ષા કેન્દ્ર બહાર વાલીઓનો હોબાળો
લાખો વિદ્યાર્થીઓ માટે મહત્વપૂર્ણ દિવસ
NEET દેશની સૌથી મહત્વપૂર્ણ પ્રવેશ પરીક્ષાઓમાંની એક છે. દર વર્ષે લાખો વિદ્યાર્થીઓ MBBS, BDS અને અન્ય મેડિકલ કોર્સમાં પ્રવેશ મેળવવા માટે આ પરીક્ષા આપે છે. આ વર્ષે પણ દેશભરના લાખો વિદ્યાર્થીઓ પરીક્ષામાં સામેલ થયા છે પરીક્ષાને ધ્યાનમાં રાખીને કેન્દ્ર અને રાજ્ય સરકારો દ્વારા વિશેષ સુરક્ષા વ્યવસ્થાઓ ગોઠવવામાં આવી હતી. પરીક્ષા કેન્દ્રોની આસપાસ પોલીસ બંદોબસ્ત, ટ્રાફિક મેનેજમેન્ટ અને ઉમેદવારોની સરળ અવરજવર માટે ખાસ આયોજન કરવામાં આવ્યું હતું. વિદ્યાર્થીઓ અને તેમના વાલીઓ માટે પણ આ દિવસ અત્યંત મહત્વપૂર્ણ ગણાય છે, કારણ કે પરીક્ષાનું પરિણામ તેમના ભવિષ્યના અભ્યાસ અને કારકિર્દી માટે નિર્ણાયક સાબિત થઈ શકે છે.
પેપર લીક બાદ ફરી યોજાઈ રહી છે પરીક્ષા
આ વર્ષની NEET પરીક્ષા ખાસ કારણસર વધુ ચર્ચામાં રહી છે. અગાઉ યોજાયેલી પરીક્ષાને લઈને પેપર લીકના ગંભીર આરોપો સામે આવ્યા હતા. તેના કારણે પરીક્ષાની વિશ્વસનીયતા અંગે સવાલો ઊભા થયા હતા અને મામલો દેશવ્યાપી ચર્ચાનો વિષય બન્યો હતો.
અગાઉ 3 મેના રોજ યોજાયેલી પરીક્ષામાં 22 લાખથી વધુ વિદ્યાર્થીઓએ ભાગ લીધો હતો. જોકે પેપર લીક સંબંધિત વિવાદો બાદ પરીક્ષા રદ કરવામાં આવી હતી અને ફરીથી પરીક્ષા યોજવાનો નિર્ણય લેવામાં આવ્યો હતો. આજની પરીક્ષા એ જ પ્રક્રિયાનો ભાગ છે, જેમાં લાખો વિદ્યાર્થીઓ ફરી એકવાર પોતાની તૈયારીના આધારે પરીક્ષા આપી રહ્યા છે. પરીક્ષાની પારદર્શિતા જળવાઈ રહે તે માટે આ વખતે વિશેષ તકેદારી રાખવામાં આવી છે.
સુરક્ષાના કડક બંદોબસ્ત
પેપર લીકની અગાઉની ઘટનાને ધ્યાનમાં રાખીને આ વખતે સુરક્ષા વ્યવસ્થાઓને વધુ મજબૂત બનાવવામાં આવી હતી. દેશભરના વિવિધ પરીક્ષા કેન્દ્રો પર પોલીસ, અર્ધલશ્કરી દળો અને સ્થાનિક પ્રશાસનના અધિકારીઓને તૈનાત કરવામાં આવ્યા હતા.
સોશિયલ મીડિયા પ્લેટફોર્મ્સ પર પણ સતત નજર રાખવામાં આવી રહી હતી જેથી કોઈ ભ્રામક માહિતી અથવા અફવા ફેલાય નહીં. નેશનલ ટેસ્ટિંગ એજન્સી (NTA) દ્વારા વિદ્યાર્થીઓને અફવાઓથી દૂર રહેવા અને માત્ર સત્તાવાર માહિતી પર વિશ્વાસ રાખવા અપીલ કરવામાં આવી હતી.
વિદ્યાર્થીઓને અપાયો વધારાનો સમય
આ વખતે વિદ્યાર્થીઓને કેટલીક વિશેષ સુવિધાઓ પણ આપવામાં આવી છે. નેશનલ ટેસ્ટિંગ એજન્સીએ જાહેરાત કરી હતી કે ઉમેદવારોને 15 મિનિટનો વધારાનો સમય આપવામાં આવશે. પરીક્ષા બપોરે 2 વાગ્યે શરૂ થઈ અને સાંજે 5:15 વાગ્યે પૂર્ણ થઈ હતી.
સાથે જ પરીક્ષા કેન્દ્રોમાં પ્રવેશ માટેનો સમય પણ સ્પષ્ટ નક્કી કરવામાં આવ્યો હતો. નિર્ધારિત સમય બાદ કોઈપણ ઉમેદવારને કેન્દ્રમાં પ્રવેશ આપવામાં આવ્યો નહોતો. આ પગલું પરીક્ષાની શિસ્ત અને સુરક્ષા જાળવવા માટે લેવામાં આવ્યું હતું.
આ પણ વાંચો: ‘પહેલાં જેવો ઉત્સાહ હવે નથી’ : અમદાવાદમાં Re-NEET પરીક્ષા માટે પરીક્ષાર્થીઓમાં આશા અને અસમંજસ
વિદ્યાર્થીઓની સુવિધાને કેન્દ્રમાં રાખતો સંદેશ
વડાપ્રધાન નરેન્દ્ર મોદી દ્વારા વિદ્યાર્થીઓને મુશ્કેલી ન પડે તે માટે એરપોર્ટ પર રાહ જોવાનો નિર્ણય એક પ્રતીકાત્મક પરંતુ મહત્વપૂર્ણ સંદેશ તરીકે જોવામાં આવી રહ્યો છે. દેશના લાખો વિદ્યાર્થીઓ માટે મહત્વના દિવસે તેમની સુવિધાને પ્રાથમિકતા આપવાનો આ નિર્ણય વિવિધ વર્ગોમાં ચર્ચાનો વિષય બન્યો છે.
