પ્રધાનમંત્રી નરેન્દ્ર મોદી જાપાનના બે દિવસીય પ્રવાસે ટોક્યો પહોંચ્યા, જ્યાં તેમનું ઉષ્માભર્યું સ્વાગત કરવામાં આવ્યું. પીએમ મોદી જાપાનના પ્રધાનમંત્રી શિગેરુ ઇશિબાના આમંત્રણ પર યોજાનારી 15મી ભારત-જાપાન વાર્ષિક સમિટમાં ભાગ લેવા માટે ગયા છે.
પ્રથમ દિવસે પીએમ મોદીએ ભારત-જાપાન આર્થિક મંચમાં હાજરી આપી અને દ્વિપક્ષીય આર્થિક સહકાર પર ભાર મૂક્યો.
ભારતમાં રોકાણ કરવાનો શ્રેષ્ઠ સમય: પીએમ મોદી
સંમેલનમાં બોલતા પીએમ મોદીએ જણાવ્યું કે છેલ્લા 11 વર્ષમાં ભારતમાં અનેક ઐતિહાસિક ફેરફારો થયા છે. “ભારતમાં રોકાણ કરવાનો આ શ્રેષ્ઠ સમય છે. ભારતની અર્થવ્યવસ્થા ઝડપથી વિકસી રહી છે અને આજનું ભારત પ્રતિભાનું પાવરહાઉસ છે,” એમ તેમણે જણાવ્યું.
‘મેક ઇન ઇન્ડિયા, મેક ફોર વર્લ્ડ’
પીએમ મોદીએ જાપાનના ઉદ્યોગપતિઓને ભારત આવવા આમંત્રણ આપ્યું. તેમણે કહ્યું:
“તમે ભારત આવો, અમે ભારતમાં ઉત્પાદનો બનાવીએ અને તેમને વિશ્વ માટે બનાવીએ — મેક ઇન ઇન્ડિયા, મેક ફોર ધ વર્લ્ડ.”
ભારતમાં મૂડી માત્ર વધતી નથી, ગુણાકાર થાય છે
પીએમ મોદીએ જણાવ્યું કે જાપાન ભારતની વિકાસયાત્રાનો સદાય મહત્વપૂર્ણ ભાગીદાર રહ્યું છે. મેટ્રો રેલથી લઈને સેમિકન્ડક્ટર અને સ્ટાર્ટઅપ્સ સુધી જાપાની કંપનીઓએ ભારતમાં અત્યાર સુધીમાં $40 બિલિયનથી વધુનું રોકાણ કર્યું છે. “ભારતમાં મૂડી માત્ર વધતી નથી, તે ગુણાકાર થાય છે,” એમ તેમણે ઉમેર્યું.
ઝડપથી વિકસતું અર્થતંત્ર
પ્રધાનમંત્રીએ જણાવ્યું કે આજે ભારતમાં રાજકીય સ્થિરતા, આર્થિક સ્થિરતા અને નીતિઓમાં પારદર્શિતા છે. ભારત વિશ્વનું સૌથી ઝડપથી વિકસતું મુખ્ય અર્થતંત્ર છે અને ટૂંક સમયમાં વિશ્વનું ત્રીજું સૌથી મોટું અર્થતંત્ર બનવા જઈ રહ્યું છે.
