દેશના કરોડો અન્નદાતાઓ માટે મહત્વના સમાચાર સામે આવ્યા છે. પ્રધાનમંત્રી કિસાન સન્માન નિધિ યોજના હેઠળ 22મા હપ્તાની આતુરતાથી રાહ જોઈ રહેલા ખેડૂતો માટે સરકારે લાભાર્થીઓની યાદી (Beneficiary List) અપડેટ કરી છે. આ યોજના અંતર્ગત પાત્ર ખેડૂતોને વાર્ષિક 6,000 રૂપિયાની સહાય ત્રણ સમાન હપ્તામાં સીધી તેમના બેંક ખાતામાં ટ્રાન્સફર કરવામાં આવે છે. જો કે, આ વખતે સરકારે નિયમોમાં કડકાઈ દાખવી છે, જેના કારણે અનેક ખેડૂતોના નામ લિસ્ટમાંથી કપાઈ શકે છે. જો તમારા દસ્તાવેજોમાં ભૂલ હશે અથવા e-KYC પૂર્ણ નહીં હોય, તો તમારા ખાતામાં ₹2,000નો હપ્તો જમા થશે નહીં. તેથી, હપ્તો જાહેર થાય તે પહેલાં જ તમારું નામ લિસ્ટમાં છે કે નહીં તે તપાસવું અનિવાર્ય છે.
આ કારણોસર લિસ્ટમાંથી ગાયબ થઈ શકે છે તમારું નામ
સરકાર દરેક નવો હપ્તો રિલીઝ કરતા પહેલા ડેટા ફિલ્ટર કરે છે. નીચે મુજબની ભૂલોને કારણે ખેડૂતો હપ્તાથી વંચિત રહી શકે છે:
જો તમે હજુ સુધી e-KYC પ્રક્રિયા પૂર્ણ કરી નથી.
જમીનના દસ્તાવેજો (Land Seeding) પોર્ટલ પર અપડેટ ન હોય.
બેંક ખાતા સાથે આધાર કાર્ડ લિંક ન હોવું.
અરજી ફોર્મમાં નામ, જેન્ડર અથવા આધાર નંબરમાં સ્પેલિંગની ભૂલ હોવી.
ઓનલાઈન લિસ્ટમાં નામ કેવી રીતે ચેક કરવું?
તમે ઘરે બેઠા તમારા મોબાઈલ દ્વારા મિનિટોમાં જાણી શકો છો કે તમને 22મો હપ્તો મળશે કે નહીં. તેના માટે નીચેના સ્ટેપ્સ ફોલો કરો:
સૌ પ્રથમ PM કિસાનની સત્તાવાર વેબસાઇટ pmkisan.gov.in પર જાઓ.
હોમપેજ પર 'Farmers Corner' સેક્શનમાં 'Beneficiary List' પર ક્લિક કરો.
હવે નવા પેજ પર તમારું રાજ્ય, જિલ્લો, તાલુકો અને ગામ પસંદ કરો.
બધી વિગતો ભર્યા પછી 'Get Report' પર ક્લિક કરો.
તમારી સામે આખા ગામની યાદી ખુલશે, જેમાં તમે તમારું નામ શોધી શકો છો.
ઓફલાઈન મદદ ક્યાંથી મેળવવી?
જો તમને ઓનલાઈન તપાસવામાં મુશ્કેલી પડતી હોય, તો તમે તમારી ગ્રામ પંચાયત, નજીકના કોમન સર્વિસ સેન્ટર (CSC) અથવા જિલ્લાની કૃષિ કચેરીની મુલાકાત લઈ શકો છો. ત્યાં તમે આધાર સીડિંગ અને e-KYC જેવી પ્રક્રિયાઓ પૂર્ણ કરાવી શકો છો. જો તમે પાત્ર હોવા છતાં હપ્તો અટકેલો હોય, તો મહેસૂલ અધિકારી (તલાટી) નો સંપર્ક કરવો હિતાવહ છે.
ક્યારે આવશે 22મો હપ્તો?
કેન્દ્ર સરકાર દ્વારા 22મા હપ્તાની સત્તાવાર તારીખ હજુ જાહેર કરવામાં આવી નથી. પરંતુ મીડિયા રિપોર્ટ્સ અને સૂત્રોના જણાવ્યા અનુસાર, સરકાર હોળીના તહેવાર પહેલા ખેડૂતોના ખાતામાં પૈસા ટ્રાન્સફર કરવાની યોજના બનાવી રહી છે. કૃષિ મંત્રાલયે આ માટેની લગભગ તમામ તૈયારીઓ પૂર્ણ કરી લીધી છે.
