ગાંધીનગર સ્માર્ટ સિટી બનવાના માર્ગ પર વધુ એક મહત્વપૂર્ણ પગલું ભરવામાં આવ્યું છે. પ્રધાનમંત્રી નરેન્દ્ર મોદીના માર્ગદર્શન હેઠળ શરૂ કરવામાં આવેલી PM eBus Sewa યોજના અંતર્ગત હવે ગુજરાતના પાટનગર ગાંધીનગરમાં આધુનિક, પર્યાવરણ-મૈત્રી અને હાઇટેક જાહેર પરિવહન સેવાનો પ્રારંભ થયો છે. આ યોજના હેઠળ પ્રથમ તબક્કામાં 40 આધુનિક એર કન્ડિશન્ડ ઇલેક્ટ્રિક બસોને નિયમિત રૂટ પર દોડતી કરવામાં આવી છે, જ્યારે આગામી સમયમાં શહેરને કુલ 100 ઇલેક્ટ્રિક મિડી બસોની સુવિધા ઉપલબ્ધ કરાવવાનું આયોજન કરવામાં આવ્યું છે. આ યોજના માત્ર સ્વચ્છ અને ગ્રીન પરિવહનને પ્રોત્સાહન આપશે એટલું જ નહીં, પરંતુ સામાન્ય નાગરિકોને આરામદાયક, સુરક્ષિત અને ડિજિટલ સુવિધાઓથી સજ્જ મુસાફરીનો અનુભવ પણ કરાવશે.
રૂ. 57,613 કરોડની રાષ્ટ્રીય યોજના, ગાંધીનગરને 100 ઇ-બસોની ફાળવણી
દેશના વિવિધ શહેરોમાં પ્રદૂષણ ઘટાડવા અને જાહેર પરિવહનને આધુનિક બનાવવા માટે કેન્દ્ર સરકારે PM eBus Sewa યોજના શરૂ કરી છે. સમગ્ર યોજના માટે અંદાજે રૂ. 57,613 કરોડનો ખર્ચ કરવામાં આવી રહ્યો છે, જેમાં કેન્દ્ર સરકારનો રૂ. 20,000 કરોડનો ફાળો છે. Public-Private Partnership (PPP) મોડલ હેઠળ સમગ્ર દેશમાં કુલ 10,000 ઇલેક્ટ્રિક બસો શરૂ કરવાનો લક્ષ્યાંક રાખવામાં આવ્યો છે.
આ યોજનામાં ગાંધીનગર શહેરને કુલ 100 ઇલેક્ટ્રિક મિડી બસોની ફાળવણી કરવામાં આવી છે. ગાંધીનગર મહાનગરપાલિકા દ્વારા રચાયેલી Gandhinagar Greenline Transport Service Limited (GGTSL) મારફતે સમગ્ર પ્રોજેક્ટનું સંચાલન કરવામાં આવી રહ્યું છે. પ્રથમ તબક્કામાં 40 બસોને સેવામાં સામેલ કરવામાં આવી છે અને આગામી તબક્કામાં બાકીની બસો પણ ઉમેરવામાં આવશે.
આધુનિક સુવિધાઓથી સજ્જ છે નવી AC ઇ-બસો
ગાંધીનગરમાં શરૂ થયેલી નવી ઇલેક્ટ્રિક બસો મુસાફરોની સુવિધા અને સુરક્ષાને ધ્યાનમાં રાખીને ડિઝાઇન કરવામાં આવી છે. 9 મીટર લાંબી સંપૂર્ણ એર કન્ડિશન્ડ બસોમાં 25 બેઠકો ઉપરાંત 13 મુસાફરો ઉભા રહી શકે તેવી ક્ષમતા છે. દિવ્યાંગ નાગરિકો માટે હાઇડ્રોલિક રેમ્પ અને સંપૂર્ણ એક્સેસિબિલિટી સુવિધા આપવામાં આવી છે.
મહિલાઓ માટે ચાર બેઠકો અને વરિષ્ઠ નાગરિકો માટે પણ ચાર બેઠકો અનામત રાખવામાં આવી છે. બસોમાં Electronic Ticketing Machine (ETM) ઉપલબ્ધ છે, જેના કારણે મુસાફરો QR Code, UPI અને અન્ય ડિજિટલ પેમેન્ટ માધ્યમો દ્વારા સરળતાથી ટિકિટ ખરીદી શકશે. આ પહેલ ડિજિટલ ઇન્ડિયા અભિયાનને પણ વધુ મજબૂત બનાવશે.
સરગાસણમાં બન્યો આધુનિક ચાર્જિંગ ડેપો
ઇ-બસોના સફળ સંચાલન માટે સરગાસણ ખાતે અંદાજે રૂ. 17 કરોડના ખર્ચે અત્યાધુનિક ડેપો અને ચાર્જિંગ ઇન્ફ્રાસ્ટ્રક્ચર ઉભું કરવામાં આવ્યું છે. અહીં ફાસ્ટ ચાર્જિંગ સ્ટેશન, મેન્ટેનન્સ વર્કશોપ અને આધુનિક ઓપરેશનલ કંટ્રોલ સિસ્ટમ જેવી સુવિધાઓ ઉપલબ્ધ કરાવવામાં આવી છે, જેના કારણે બસોની કામગીરી વધુ કાર્યક્ષમ બની રહેશે.
18 રૂટ પર દોડશે ઇ-બસો, અનેક મહત્વના વિસ્તારો જોડાશે
નવી ઇ-બસ સેવા હેઠળ ગાંધીનગર અને આસપાસના વિસ્તારોને જોડતા કુલ 18 રૂટ તૈયાર કરવામાં આવ્યા છે. આ રૂટમાં સરગાસણ, પાથિકાશ્રમ, સચિવાલય, ગાંધીનગર રેલવે સ્ટેશન, મહાત્મા મંદિર, GIFT City, ચિલોડા, દહેગામ, કડી, કલોલ, ચાંદખેડા, ધમાસણ, નારદીપુર, સોનીપુર, કોથા, આદરજ મોટી, ટીંટોડા, IIT ગાંધીનગર, ડભોડા અને માણસા જેવા વિસ્તારોનો સમાવેશ થાય છે. આ નેટવર્કથી રોજિંદા મુસાફરોને ઝડપી અને સરળ જાહેર પરિવહનની સુવિધા મળશે.
માત્ર રૂ. 5થી શરૂ થશે ભાડું, 15 દિવસ સુધી મફત મુસાફરી
ગાંધીનગર મહાનગરપાલિકાએ સામાન્ય નાગરિકોને પરવડે તેવું ભાડું નક્કી કર્યું છે. 3 કિલોમીટર સુધીના અંતર માટે માત્ર રૂ. 5, 3થી 5 કિમી માટે રૂ. 10, 5થી 8 કિમી માટે રૂ. 15, 8થી 14 કિમી માટે રૂ. 20, 14થી 20 કિમી માટે રૂ. 25 અને 20 કિમીથી વધુ અંતર માટે મહત્તમ રૂ. 30 ભાડું રાખવામાં આવ્યું છે.
નવી સેવા વધુમાં વધુ લોકો અપનાવે તે માટે શરૂઆતના પ્રથમ 15 દિવસ સુધી તમામ મુસાફરો માટે સંપૂર્ણ નિઃશુલ્ક મુસાફરીની જાહેરાત કરવામાં આવી છે. ઉપરાંત 5 વર્ષથી ઓછી ઉંમરના બાળકો માટે હંમેશા મફત મુસાફરીની સુવિધા પણ આપવામાં આવી છે.
