Fuel Price Hike: ભારતમાં મધ્યમ વર્ગના પરિવારનું માસિક બજેટ ખોરવવામાં જો કોઈ પરિબળ સૌથી મોટો ભાગ ભજવતું હોય, તો તે છે ઈંધણના ભાવ. આજના સમયમાં સવારે આંખ ખુલતાની સાથે જ જો પેટ્રોલ-ડીઝલ મોંઘા થવાના સમાચાર મળે, તો આખા મહિના ગણતરીઓ ઊંધી વળી જાય છે. જો તમે એવું વિચારી રહ્યા હતા કે ગત શુક્રવારે થયેલો ભાવવધારો એક સામાન્ય ઝટકો હતો અને હવે કિંમતો સ્થિર થશે, તો તમારા માટે આંચકાજનક સમાચાર છે. સરકારે માત્ર 5 જ દિવસની અંદર દેશની જનતાને બીજો મોટો આંચકો આપતા ફરી એકવાર પેટ્રોલ અને ડીઝલના ભાવમાં તોતિંગ વધારો ઝીંકી દીધો છે. પશ્ચિમ એશિયા (મિડલ ઈસ્ટ)માં ચાલી રહેલા સૈન્ય તણાવ અને વૈશ્વિક બજારમાં ક્રૂડ ઓઈલની કિંમતોમાં આવેલી અચાનક ઉથલપાથલની સીધી અને આકરી અસર હવે સામાન્ય ભારતીયના ખિસ્સા પર સ્પષ્ટપણે દેખાવા લાગી છે. તેલ કંપનીઓ દ્વારા સતત કરવામાં આવી રહેલા આ વધારાને કારણે આગામી દિવસોમાં જીવનજરૂરી ચીજવસ્તુઓ પણ મોંઘી થવાના એંધાણ વર્તાઈ રહ્યા છે.
માત્ર 5 દિવસમાં બીજી વખત ભાવવધારો: જાણો મેટ્રો શહેરોની સ્થિતિ
સરકારી ઓઈલ માર્કેટિંગ કંપનીઓએ આજે પેટ્રોલ અને ડીઝલની કિંમતોમાં આશરે 90 પૈસા પ્રતિ લિટર સુધીનો વધારો ઝીંક્યો છે. ઉલ્લેખનીય છે કે, હજુ ગત શુક્રવારે જ દેશભરમાં લિટર દીઠ 3 રૂપિયાનો મોટો વધારો કરવામાં આવ્યો હતો. આ સતત બીજા વધારા બાદ દેશના મુખ્ય મેટ્રો શહેરોમાં ઇંધણની કિંમતો નવી ઐતિહાસિક સપાટીએ પહોંચી ગઈ છે. સૌથી મોટો ઝટકો કોલકાતાના વાહનચાલકોને લાગ્યો છે, જ્યાં પેટ્રોલના ભાવમાં રેકોર્ડ 96 પૈસાનો વધારો નોંધાયો છે. જ્યારે દેશની રાજધાની દિલ્હીમાં નવો ભાવવધારો લાગુ થયા બાદ હવે:
પેટ્રોલ: ₹98.64 પ્રતિ લિટર
ડીઝલ: ₹91.58 પ્રતિ લિટર પર પહોંચી ગયું છે.
રોકાણકારો માટે 'ગોલ્ડન વીક': 7 દિવસમાં ખુલશે 8 IPO! જુઓ લિસ્ટ
ઈંધણ સાથે CNG પણ મોંઘો: શાકભાજી-કરિયાણાના ભાવ વધવાની આશંકા
મુશ્કેલી માત્ર પેટ્રોલ-ડીઝલ પૂરતી સીમિત નથી. ગત શુક્રવારે પેટ્રોલ-ડીઝલની સાથે દિલ્હી સહિતના વિસ્તારોમાં CNG ના ભાવમાં પણ પ્રતિ કિલો ₹2નો વધારો કરવામાં આવ્યો હતો. આ વધારા બાદ દેશના જુદા જુદા શહેરોમાં CNGનો ભાવ ₹87ની આસપાસ પહોંચી ગયો છે. ટ્રાન્સપોર્ટ અને ટ્રેડિંગ ક્ષેત્રના નિષ્ણાતો અને અર્થશાસ્ત્રીઓનું માનવું છે કે ઇંધણ અને સીએનજીમાં બેક-ટુ-બેક થયેલા આ વધારાની સીધી અસર માલસામાનના ટ્રાન્સપોર્ટેશન કોસ્ટ (ભાડા) પર પડશે. પરિણામે ટૂંક સમયમાં જ સામાન્ય લોકોના રસોડા સાથે જોડાયેલી વસ્તુઓ જેવી કે શાકભાજી, દૂધ, ફળ અને કરિયાણાની ચીજવસ્તુઓ મોંઘી થઈ શકે છે.
વૈશ્વિક બજારમાં ક્રૂડ ઓઈલનો ભડકો: $111ને પાર પહોંચ્યો ભાવ
ભારતીય બજારમાં આવી રહેલા આ ભૂકંપ પાછળ આંતરરાષ્ટ્રીય બજાર જવાબદાર છે. પશ્ચિમ એશિયામાં ચાલી રહેલા યુદ્ધ અને તણાવપૂર્ણ સ્થિતિના કારણે ઇન્ટરનેશનલ માર્કેટમાં કાચા તેલ (Crude Oil)ની કિંમતો આસમાને પહોંચી છે. હાલમાં:
બ્રેન્ટ ક્રૂડ (Brent Crude): પ્રતિ બેરલ 111 ડોલરને પાર થઈ ગયું છે.
WTI ક્રૂડ: પ્રતિ બેરલ 107 ડોલરની સપાટી વટાવી ચૂક્યું છે.
મહત્વની વાત: ભારત પોતાની જરૂરિયાતનું લગભગ 85% ક્રૂડ ઓઈલ બહારથી આયાત (ઈમ્પોર્ટ) કરે છે. આથી જ વૈશ્વિક બજારમાં થતી નાની સળવળાટ કે ડોલરની વધઘટ પણ ભારતીય બજારમાં મોટો આર્થિક ભૂકંપ લાવી દે છે.
વૈશ્વિક આર્થિક અનિશ્ચિતતા વચ્ચે ઇન્વેસ્ટ માટે No.1 સરકારી સ્કીમ!: દર મહિને ઘરે બેઠા મળશે હજારો રૂપિયા!, જાણો સંપૂર્ણ માહિતી
રશિયા પર અમેરિકાની કડકાઈ: ભારતનું 'સસ્તું ઓઈલ કવચ' હટ્યું!
ભારત છેલ્લા બે વર્ષથી આંતરરાષ્ટ્રીય પ્રતિબંધો હોવા છતાં રશિયા પાસેથી ભારે ડિસ્કાઉન્ટમાં (સસ્તું) ક્રૂડ ઓઈલ ખરીદી રહ્યું હતું, જેના કારણે ભારતીય ઓઈલ કંપનીઓ ઘરેલું બજારમાં મહિનાઓ સુધી કિંમતો સ્થિર રાખી શકી હતી. પરંતુ હવે સમીકરણો બદલાયા છે.
અમેરિકાના રાષ્ટ્રપ્રમુખ ડોનાલ્ડ ટ્રમ્પ દ્વારા રશિયાના સમુદ્રી ઓઈલ સપ્લાય પર આપવામાં આવેલી કામચલાઉ પ્રતિબંધ મુક્તિ (Waiver) શનિવારે સમાપ્ત થઈ ગઈ છે. અમેરિકાના આ કડક વલણને કારણે ભારતનું 'સસ્તું ઓઈલ કવચ' નબળું પડ્યું છે. હવે ભારતીય ઓઈલ કંપનીઓ પર દબાણ વધ્યું છે કારણ કે તેમણે રશિયાને બદલે અન્ય દેશો પાસેથી મોંઘા વૈશ્વિક દરો પર ઓઈલ ખરીદવું પડી રહ્યું છે. આ જ મુખ્ય કારણ છે કે અત્યાર સુધી શાંત બેઠેલી કંપનીઓ હવે ઉપરાઉપરી ભાવ વધારીને જનતાના ખિસ્સા ખાલી કરી રહી છે.
