Pakistan team announcement for T20 series against Australia : પાકિસ્તાન ક્રિકેટ બોર્ડ (PCB) દ્વારા આગામી ઓસ્ટ્રેલિયા સામેની ઘરેલુ T20 સિરીઝ માટે રાષ્ટ્રીય ટીમની જાહેરાત કરવામાં આવી છે. શુક્રવારે જાહેર થયેલી આ ટીમમાં કેટલાક મહત્વના ફેરફારો અને દિગ્ગજ ખેલાડીઓની વાપસી જોવા મળી છે. શ્રીલંકા સામેની હાલની સિરીઝ પછી પાકિસ્તાની સિલેક્ટર્સએ અનુભવ અને યુવા જોશના કોમ્બિનેશન સાથે ટીમ મેદાનમાં ઉતારવાનો નિર્ણય લીધો છે.
સ્ટાર ખેલાડીઓનું કમબેક
આ સિરીઝમાં સૌથી મોટા સમાચાર ફાસ્ટ બોલર શાહીન શાહ આફ્રિદીનું કમબેક છે. ઓસ્ટ્રેલિયામાં બિગ બેશ લીગ (BBL) દરમિયાન ફિલ્ડિંગ કરતી વખતે શાહીનને ઘૂંટણની ઈજા થઈ હતી, જે બાદ તે લાહોરના હાઈ પર્ફોર્મન્સ સેન્ટરમાં રિહેબ હેઠળ હતો. આ ઉપરાંત, દિગ્ગજ બેટ્સમેન બાબર આઝમ પણ બિગ બેશ લીગ રમીને ટીમમાં પરત ફર્યા છે, જેનાથી પાકિસ્તાનનું બેટિંગ લાઇન-અપ ઘણું મજબૂત બન્યું છે.
નવી કેપ્ટનશીપ અને ફેરફારો
આ વખતે પાકિસ્તાન ટીમની કમાન સલમાન અલી આગાના હાથમાં સોંપવામાં આવી છે. જોકે, ટીમમાં કેટલાક મોટા નામોની ગેરહાજરી પણ ચોંકાવનારી છે. ફાસ્ટ બોલર હરિસ રૌફ અને અનુભવી વિકેટકીપર બેટ્સમેન મોહમ્મદ રિઝવાનને આ સિરીઝમાં સામેલ કરવામાં આવ્યા નથી. સિલેક્ટર્સએ શ્રીલંકા સામે રમેલી ટીમના મોટાભાગના ખેલાડીઓ પર ભરોસો યથાવત રાખ્યો છે.
મેચનું સમયપત્રક અને સ્થળ
ઓસ્ટ્રેલિયાની ટીમ 28 જાન્યુઆરીએ પાકિસ્તાન પહોંચશે. આ પ્રવાસ દરમિયાન ત્રણ T20 મેચોની સિરીઝ રમાશે:
પ્રથમ મેચ: 29 જાન્યુઆરી
બીજી મેચ: 31 જાન્યુઆરી
ત્રીજી મેચ: 1 ફેબ્રુઆરી
ખાસ વાત એ છે કે, આ ત્રણેય મેચો લાહોરના ગદ્દાફી સ્ટેડિયમમાં રમાશે. એપ્રિલ 2022 પછી ઓસ્ટ્રેલિયાની ટીમ પાકિસ્તાનમાં આ ફોર્મેટમાં તેની બીજી સિરીઝ રમવા જઈ રહી છે.
પાકિસ્તાનની ટીમ:
સલમાન અલી આગા (કેપ્ટન), અબરાર અહેમદ, બાબર આઝમ, ફહીમ અશરફ, ફખર જમાન, ખ્વાજા મોહમ્મદ નાફે (વિકેટકીપર), મોહમ્મદ નવાઝ, મોહમ્મદ સલમાન મિર્ઝા, મોહમ્મદ વસીમ જુનિયર, નસીમ શાહ, સાહિબજાદા ફરહાન (વિકેટકીપર), સૈમ અયુબ, શાહીન શાહ આફ્રિદી, શાદાબ ખાન, ઉસ્માન ખાન (વિકેટકીપર) અને ઉસ્માન તારિક.
વર્લ્ડ કપ અને અફવાઓનું બજાર
એક તરફ ટીમની જાહેરાત થઈ છે, તો બીજી તરફ વર્લ્ડ કપને લઈને અફવાઓ તેજ બની છે. બાંગ્લાદેશ ક્રિકેટ બોર્ડએ સુરક્ષાના કારણોસર ભારત જવાનો ઇનકાર કર્યો છે, જેના સમર્થનમાં પાકિસ્તાન પણ આગામી ટૂર્નામેન્ટમાંથી ખસી શકે તેવી ચર્ચાઓ ચાલી રહી છે. હાલમાં પાકિસ્તાની સિલેક્ટર્સએ વર્લ્ડ કપ માટેની અંતિમ ટીમની જાહેરાત મોકૂફ રાખી છે.
