પેટ્રોલ અને ડીઝલના ભાવમાં વધારો
પાકિસ્તાન સરકારે પેટ્રોલના ભાવમાં 4.93 રૂપિયા પ્રતિ લિટર અને હાઈ-સ્પીડ ડીઝલ (HSD)ના ભાવમાં 7.15 રૂપિયા પ્રતિ લિટરનો વધારો કર્યો છે. નવા દરો 22 જુલાઈથી અમલમાં આવ્યા છે.
નવા દર બાદ કેટલી થઈ કિંમત?
ભાવ વધારા પછી હવે પેટ્રોલ 320.73 રૂપિયા પ્રતિ લિટર અને હાઈ-સ્પીડ ડીઝલ 367.21 રૂપિયા પ્રતિ લિટરના દરે વેચાઈ રહ્યું છે.
એપ્રિલના રેકોર્ડ ભાવથી હજુ પણ ઓછા દર
હાલના દરો આ વર્ષે એપ્રિલમાં નોંધાયેલા સર્વોચ્ચ સ્તર કરતાં ઓછા છે. તે સમયે પેટ્રોલ અને ડીઝલના ભાવ આંતરરાષ્ટ્રીય બજારમાં ક્રૂડ ઓઈલના વધતા ભાવને કારણે રેકોર્ડ સ્તરે પહોંચ્યા હતા.
હવે દરરોજ નક્કી થશે ઇંધણના ભાવ
આંતરરાષ્ટ્રીય બજારમાં ક્રૂડ ઓઈલના ભાવમાં થતા ઝડપી ફેરફારોને ધ્યાનમાં રાખીને સરકારે નવી વ્યવસ્થા અમલમાં મૂકી છે. હવે અઠવાડિયે એક વખતના બદલે પેટ્રોલ અને ડીઝલના ભાવ દૈનિક ધોરણે નક્કી કરવામાં આવશે.
ડીલર્સ એસોસિએશને કર્યો વિરોધ
ઓલ પાકિસ્તાન ડીલર્સ એસોસિએશને સરકારના આ નિર્ણયનો વિરોધ કર્યો છે. એસોસિએશનનું કહેવું છે કે દૈનિક ભાવ નક્કી કરવાની પદ્ધતિ વ્યવહારુ નથી અને તેના વિરોધમાં પ્રદર્શન કરવાની પણ ચેતવણી આપવામાં આવી છે.
સામાન્ય લોકો અને પરિવહન ક્ષેત્ર પર અસર
પેટ્રોલના ભાવ વધવાથી ખાનગી વાહનચાલકો અને મધ્યમ વર્ગ પર સીધી અસર પડશે. જ્યારે ડીઝલ મોંઘું થતાં ટ્રાન્સપોર્ટ ખર્ચ વધવાની શક્યતા છે, જેના કારણે અન્ય વસ્તુઓના ભાવ પર પણ અસર પડી શકે છે.
