Pahalgam Terror Attack: જમ્મુ-કાશ્મીરના પહલગામમાં વર્ષ 2025માં થયેલા ભયાનક આતંકી હુમલાની તપાસમાં હવે એક મહત્વપૂર્ણ વળાંક આવ્યો છે. રાષ્ટ્રીય તપાસ એજન્સી (NIA)એ આ કેસમાં પૂરક ચાર્જશીટ દાખલ કરીને પાકિસ્તાન સ્થિત આતંકી સંગઠન લશ્કર-એ-તૈયબા (LeT)ના સ્થાપક હાફિઝ સઈદને આરોપી તરીકે નામજદ કર્યો છે. ભારતીય એજન્સીઓ લાંબા સમયથી આ હુમલાની પાછળ સરહદપારથી મળતા સમર્થન અને આતંકી નેટવર્કની સંડોવણીનો આરોપ લગાવતી રહી છે, ત્યારે NIAનું આ પગલું કાનૂની અને કૂટનીતિક રીતે મહત્વપૂર્ણ માનવામાં આવી રહ્યું છે. એજન્સીનું કહેવું છે કે, નવી પૂરક ચાર્જશીટમાં એવા તાજા પુરાવાઓનો સમાવેશ કરવામાં આવ્યો છે, જે પહલગામ હુમલાના કથિત પાકિસ્તાન સમર્થિત ષડયંત્રને વધુ મજબૂત બનાવે છે. આ ચાર્જશીટમાં હાફિઝ સઈદની વ્યક્તિગત ભૂમિકા ઉપરાંત પ્રતિબંધિત લશ્કર-એ-તૈયબા અને તેના પ્રોક્સી સંગઠન ધ રેઝિસ્ટન્સ ફ્રન્ટ (TRF) સાથેના સંબંધોને પણ વિગતવાર દર્શાવવામાં આવ્યા છે.
NIAની પૂરક ચાર્જશીટમાં શું છે ખાસ?
NIAએ જમ્મુ સ્થિત વિશેષ અદાલતમાં દાખલ કરેલી પૂરક ચાર્જશીટમાં જણાવ્યું છે કે તપાસ દરમિયાન વૈજ્ઞાનિક વિશ્લેષણ, મેદાની તપાસ અને અન્ય ટેક્નિકલ પુરાવાઓના આધારે હાફિઝ સઈદની ભૂમિકા અંગે મહત્વપૂર્ણ વિગતો સામે આવી છે. એજન્સી મુજબ, આ નવી ચાર્જશીટ અગાઉ દાખલ કરવામાં આવેલી 1,597 પાનાની ચાર્જશીટને પૂરક તરીકે રજૂ કરવામાં આવી છે. તેમાં પાકિસ્તાનમાંથી સંચાલિત આતંકી નેટવર્ક, હુમલાની યોજના અને તેના અમલીકરણ સાથે જોડાયેલા નવા પાસાઓનો સમાવેશ કરવામાં આવ્યો છે. જોકે હાફિઝ સઈદ હાલ પાકિસ્તાનમાં રહે છે અને તેની તાત્કાલિક ધરપકડ અથવા કાર્યવાહી શક્ય નથી, પરંતુ આ ચાર્જશીટ દ્વારા પહલગામ હુમલા મામલે તેની કાનૂની જવાબદારી સત્તાવાર રીતે નિર્ધારિત કરવામાં આવી છે.
આ પણ વાંચો: રામ મંદિર વિવાદ: ₹5 કરોડનું સુવર્ણમઢિત રામચરિતમાનસ સુરક્ષિત : ટ્રસ્ટે અફવાઓને ફગાવી
22 એપ્રિલ 2025ના હુમલાએ દેશને હચમચાવી દીધો હતો
22 એપ્રિલ, 2025ના રોજ પહલગામ નજીક આવેલા બૈસરાન મેદાનમાં આતંકવાદીઓએ નિર્દોષ પ્રવાસીઓને નિશાન બનાવ્યા હતા. હુમલામાં દેશના વિવિધ રાજ્યોમાંથી આવેલા 25 પ્રવાસીઓ અને એક સ્થાનિક પોની ઓપરેટર સહિત કુલ 26 લોકોના મોત થયા હતા. તપાસ એજન્સીઓના જણાવ્યા અનુસાર, હુમલાખોરોએ લોકોને ધાર્મિક ઓળખના આધારે અલગ પાડ્યા બાદ ગોળીબાર કર્યો હતો. આ ઘટનાએ સમગ્ર દેશમાં ભારે આક્રોશ ફેલાવ્યો હતો. આ હુમલા બાદ ભારતે આતંકવાદ સામે કડક વલણ અપનાવતા 'ઓપરેશન સિંદૂર' હેઠળ પાકિસ્તાન અને પાકિસ્તાન અધિકૃત કાશ્મીરમાં આવેલા કથિત આતંકી ઠેકાણાઓ સામે કાર્યવાહી હાથ ધરી હતી.
અગાઉની ચાર્જશીટમાં પણ અનેક આતંકીઓના નામ હતા
NIAએ 15 ડિસેમ્બર, 2025ના રોજ આ કેસમાં પ્રથમ ચાર્જશીટ દાખલ કરી હતી. તેમાં પાકિસ્તાન સ્થિત હેન્ડલર સાજિદ જટ્ટ, ઓપરેશન મહાદેવ દરમિયાન જુલાઈ 2025માં માર્યા ગયેલા ત્રણ આતંકવાદીઓ તેમજ બે ધરપકડ કરાયેલા આરોપીઓના નામ સામેલ કરવામાં આવ્યા હતા. આ કેસની શરૂઆત અનંતનાગ જિલ્લાના પહલગામ પોલીસ સ્ટેશનમાં નોંધાયેલા ગુનાથી થઈ હતી. બાદમાં કેન્દ્રીય ગૃહ મંત્રાલયે આ કેસની ગંભીરતાને ધ્યાનમાં રાખીને તેની તપાસ NIAને સોંપી હતી.
આ પણ વાંચો: NEETની ફી રિફંડ લેવા માટે હવે ગણતરીના કલાકો : આ તારીખ પછી NTA નહીં આપે એક પણ રૂપિયો
તપાસ હજુ ચાલુ, પાકિસ્તાન સ્થિત નેટવર્ક પર નજર
NIAએ જણાવ્યું છે કે, હુમલાની સમગ્ર સાજિશ અને ભારત વિરોધી આતંકી પ્રવૃત્તિઓને પ્રોત્સાહન આપતા પાકિસ્તાન આધારિત આતંકી નેટવર્કની સંપૂર્ણ ભૂમિકા બહાર લાવવા માટે તપાસ હજુ પણ ચાલુ છે. ભારતીય એજન્સીઓ લાંબા સમયથી દાવો કરતી આવી છે કે લશ્કર-એ-તૈયબા અને તેની સાથે સંકળાયેલા સંગઠનો કાશ્મીરમાં આતંકવાદી પ્રવૃત્તિઓને ટેકો આપી રહ્યા છે. હાફિઝ સઈદનું નામ પૂરક ચાર્જશીટમાં ઉમેરાવું ભારત માટે આંતરરાષ્ટ્રીય સ્તરે પણ એક મહત્વપૂર્ણ પગલું માનવામાં આવી રહ્યું છે, કારણ કે તે આતંકવાદ સામેના ભારતના વલણને વધુ મજબૂત આધાર પૂરું પાડે છે.
આતંકવાદ સામે ભારતની લડતને મળશે વધુ કાનૂની આધાર
હાફિઝ સઈદને વર્ષ 2008ના મુંબઈ હુમલાનો માસ્ટરમાઇન્ડ માનવામાં આવે છે અને તે સંયુક્ત રાષ્ટ્ર દ્વારા વૈશ્વિક આતંકવાદી તરીકે ઘોષિત કરવામાં આવ્યો છે. તેમ છતાં પાકિસ્તાનમાં તેના વિરુદ્ધ મુંબઈ હુમલા મામલે ક્યારેય અસરકારક કાર્યવાહી થઈ નથી. હવે પહલગામ હુમલા કેસમાં તેનું નામ આરોપી તરીકે ઉમેરાતા ભારતને આંતરરાષ્ટ્રીય મંચો પર આતંકવાદને પ્રોત્સાહન આપતા તત્વો સામે પોતાનો પક્ષ વધુ મજબૂત રીતે રજૂ કરવામાં મદદ મળશે.
