OPERATION SHIELD મુલતવી : જલ્દી જ થશે નવી તારીખની જાહેરાત

કેન્દ્ર સરકાર દ્વારા ગુરુવાર, 29 મેના રોજ પ્રસ્તાવિત નાગરિક સંરક્ષણ કવાયત 'ઓપરેશન શીલ્ડ' હાલ વહીવટી કારણોસર મુલતવી રાખવામાં આવી છે. આ સંદર્ભમાં, તમામ નાગરિક સંરક્ષણ નિયંત્રકો અને સંબંધિત વિભાગોને સૂચનાઓ જારી કરવા કહેવામાં આવ્યું છે. સરકારી આદેશમાં જણાવાયું છે કે તમામ સંબંધિત અધિકારીઓ અને હિસ્સેદારોને જાણ કરવામાં આવે કે ઓપરેશન શીલ્ડ નાગરિક સંરક્ષણ કવાયત આગામી સૂચના સુધી મુલતવી રાખવામાં આવી છે. આગામી તારીખ પછીથી જાહેર કરવામાં આવશે.

ગૃહ મંત્રાલયની સૂચના મુજબ, ગુજરાત, રાજસ્થાન, જમ્મુ અને કાશ્મીર, હરિયાણા અને ચંદીગઢ સહિત કેન્દ્રશાસિત પ્રદેશોના ઘણા જિલ્લાઓમાં 29 મે ના રોજ સાંજે 5 વાગ્યાથી મોક ડ્રીલ યોજાવાની હતી. પરંતુ હવે તે મુલતવી રાખવામાં આવી છે. તેથી, જમ્મુ અને કાશ્મીરના તમામ 20 જિલ્લાઓમાં મોક ડ્રીલ રદ કરવામાં આવી છે. આવતીકાલે જમ્મુ ક્ષેત્રમાં યોજાનારી કવાયત હવે થશે નહીં. કેન્દ્રના આદેશ બાદ રાજસ્થાન, ગુજરાત, હરિયાણા, ચંદીગઢ અને અન્ય રાજ્યોએ પણ મોક ડ્રીલ અને બ્લેકઆઉટ મુલતવી રાખ્યા છે.

ગુજરાત માહિતી વિભાગ અને રાજસ્થાન ગૃહ વિભાગે પણ મોક ડ્રીલ મુલતવી રાખવાની સત્તાવાર પુષ્ટિ કરી છે. બીજી તરફ, ચંદીગઢ વહીવટીતંત્રે સ્પષ્ટતા કરી છે કે ગુરુવારે કોઈ બ્લેકઆઉટ કે મોક ડ્રીલ નહીં થાય.

તમને જણાવી દઈએ કે આ કવાયત હેઠળ, હવાઈ હુમલો, બ્લેકઆઉટ, ઈમરજન્સી એક્ઝિટ અને મેડિકલ હેલ્પના મોક ડ્રીલ કરવામાં આવનાર હતા, જેથી આપત્તિ દરમિયાન નાગરિક અને વહીવટી પ્રતિભાવની તૈયારીઓ ચકાસી શકાય.

'ઓપરેશન શીલ્ડ' હેઠળ યોજાનારી મોક ડ્રીલમાં નાગરિક સુરક્ષા વોર્ડન, સ્થાનિક વહીવટી કર્મચારીઓ અને NCC, NSS, NYKS, ભારત સ્કાઉટ્સ અને ગાઈડ્સ જેવા યુવા સ્વયંસેવકોની ભાગીદારીનો પ્રસ્તાવ મૂકવામાં આવ્યો હતો. ઉપરાંત, નાગરિકોને કટોકટીની પરિસ્થિતિઓથી વાકેફ કરવાના હેતુથી તેને મહત્વપૂર્ણ માનવામાં આવ્યું હતું, જેથી તેઓ વિવિધ કાર્યોમાં નાગરિક વહીવટીતંત્રને મદદ કરી શકે.