ફ્રાન્સના સુપ્રસિદ્ધ ભવિષ્યવક્તા માઈકલ દિ નાસ્ત્રેદમસ આજે પણ તેમની રહસ્યમય આગાહીઓ માટે વિશ્વભરમાં ચર્ચામાં રહે છે. તેમની પ્રસિદ્ધ પુસ્તક 'લેસ પ્રોફેટીઝ' (Les Propheties) માં લખેલી અનેક વાતો સમય જતાં સાચી સાબિત થઈ છે. હવે જ્યારે વર્ષ 2025 તેના અંતિમ તબક્કા તરફ છે, ત્યારે વર્ષ 2026 ને લઈને નાસ્ત્રેદમસ દ્વારા કરવામાં આવેલી કેટલીક ડરામણી આગાહીઓ સોશિયલ મીડિયા અને વિશ્લેષકો વચ્ચે ચર્ચાનું કેન્દ્ર બની છે.
મધમાખીઓનું ઝુંડ કે આધુનિક ડ્રોન હુમલો?
નાસ્ત્રેદમસે પોતાની પુસ્તકમાં સીધી રીતે વર્ષ 2026 નો ઉલ્લેખ કર્યો નથી, પરંતુ વિશ્લેષકો '26' નંબરના શ્લોકને વર્ષ 2026 સાથે જોડી રહ્યા છે. આ આગાહીમાં લખ્યું છે કે, "મધમાખીઓનું એક મોટું ઝુંડ ઉઠશે... અને રાત્રિના સમયે છૂપો હુમલો થશે." નિષ્ણાતો આ આગાહીને મધમાખીઓ સાથે નહીં, પરંતુ આધુનિક યુદ્ધમાં વપરાતા 'Military Drones' સાથે જોડી રહ્યા છે. આશંકા છે કે વર્ષ 2026 માં ડ્રોન ટેકનોલોજી દ્વારા કોઈ મોટું યુદ્ધ અથવા આક્રમણ થઈ શકે છે.
પશ્ચિમી દેશોની સત્તા નબળી પડવાના સંકેત
નાસ્ત્રેદમસની આગાહીઓમાં સ્વિટ્ઝરલેન્ડના એક શહેરનો ઉલ્લેખ છે, જ્યાં લોહીની નદીઓ વહેવાની વાત કરવામાં આવી છે. વધુમાં તેમણે લખ્યું છે કે, "પશ્ચિમનો પ્રકાશ શાંતિમાં ખોવાઈ જશે" અને "પૂર્વમાં ત્રણ અગ્નિ પ્રજ્વલિત થશે." આ વિગતોનું વિશ્લેષણ કરતા વિદ્વાનો માને છે કે આ પશ્ચિમી દેશોની શક્તિમાં ઘટાડો અને એશિયાઈ અથવા પૂર્વીય દેશોના વર્ચસ્વના ઉદયનો સંકેત હોઈ શકે છે.
કોઈ મહાન વિભૂતિના અંતની આગાહી
વર્ષ 2026 માટે નાસ્ત્રેદમસે એક વધુ ચોંકાવનારી વાત કહી છે. તેમણે લખ્યું છે કે, "એક મહાન વ્યક્તિ એક જ દિવસમાં વીજળીના આંચકાથી (struck down by a thunderbolt) પરાજિત થશે અથવા મૃત્યુ પામશે." આ આગાહીને લઈને અત્યારે આંતરરાષ્ટ્રીય સ્તરે ભારે ચર્ચાઓ જાગી છે. લોકો અંદાજ લગાવી રહ્યા છે કે શું કોઈ શક્તિશાળી વૈશ્વિક નેતા અથવા મોટી હસ્તી સાથે કોઈ દુર્ઘટના ઘટશે?
જોકે, નાસ્ત્રેદમસની આગાહીઓ હંમેશા સાંકેતિક ભાષામાં હોય છે અને તેનું અર્થઘટન અલગ-અલગ રીતે થઈ શકે છે. હવે જોવાનું એ રહેશે કે આગામી વર્ષમાં આ ભવિષ્યવાણીઓ કેટલી સાચી સાબિત થાય છે.
