Noida violence: નોઈડામાં કામદારોના વિરોધને હિંસક રૂપ આપવા માટે નકલી વીડિયો અને અફવાઓ ફેલાવનારાઓ વિરુદ્ધ મોટી કાર્યવાહી કરવામાં આવી છે. નોઈડા સાયબર પોલીસ સ્ટેશને રાષ્ટ્રીય જનતા દળ (RJD)ના પ્રવક્તા પ્રિયંકા ભારતી સહિત ચાર વ્યક્તિઓ વિરુદ્ધ કેસ નોંધ્યો છે. આરોપ છે કે તેમણે જાણી-જોઈને જૂના અને નકલી વીડિયોને નોઈડાના તરીકે પ્રસારિત કરીને લોકોમાં ભય અને અરાજકતાનું વાતાવરણ સર્જ્યું હતું.
શહડોલ જિલ્લાનો એક જૂનો વીડિયો
પોલીસ તપાસમાં બહાર આવ્યું છે કે 11 એપ્રિલ, 2026ના રોજ મધ્યપ્રદેશના શહડોલ જિલ્લાનો એક જૂનો વીડિયો (જેમાં પોલીસ એક વ્યક્તિ પર હુમલો કરતી જોવા મળે છે)ને નોઈડાના તરીકે ફેલાવવામાં આવ્યો હતો. તેમજ સેક્ટર-62માં આગ લગાડવાનો ખોટો વીડિયો પણ ટ્વિટર (X) પર વાયરલ કરવામાં આવ્યો હતો. આ બંને વીડિયો સંપૂર્ણપણે નકલી હોવાનું પોલીસ તપાસમાં સામે આવ્યું છે.
ફરિયાદમાં જણાવાયું છે કે જીતેન્દ્ર કુમાર દૌસાએ ફેસબુક પર શહડોલનો વીડિયો શેર કરીને ભ્રામક કેપ્શન સાથે લખ્યું હતું કે “નોઈડાનો મજૂર” છે. આ જ રીતે ‘ઈટ્સક્ટીની’ નામના અનામી એકાઉન્ટમાંથી સેક્ટર-62ની આગનો નકલી વીડિયો પોસ્ટ કરવામાં આવ્યો હતો. પોલીસનું કહેવું છે કે આ સુનિયોજિત ષડયંત્ર હતું જેનો હેતુ નોઈડાના રહેવાસીઓમાં વહીવટ પ્રત્યે અવિશ્વાસ અને ભયનું વાતાવરણ ઊભું કરવાનો હતો.
STFની ડિજિટલ ટ્રેલ તપાસ શરૂ
નોઈડા પોલીસની સ્પેશિયલ ટાસ્ક ફોર્સ (STF) હાલમાં આ કેસની ડિજિટલ તપાસ કરી રહી છે. તપાસમાં જાણવા મળ્યું છે કે હિંસક વિરોધ શરૂ થાય તેના એક દિવસ પહેલા જ અંદાજે 140 વોટ્સએપ ગ્રુપ અને ઘણા નવા X હેન્ડલ્સ બનાવવામાં આવ્યા હતા. ફક્ત રવિવારે જ 50 શંકાસ્પદ X હેન્ડલ્સ બનાવાયા હતા. STF હવે આ તમામ ગ્રુપ્સના એડમિન્સ અને હેન્ડલ્સની ઓળખ કરી રહી છે અને ડિજિટલ ફોરેન્સિક લેબની મદદથી આરોપીઓની ઓળખ કરવાની તૈયારીમાં છે.
આ પણ વાંચો: પહેલી વખત ભાજપના હાથમાં બિહારની સત્તા : સમ્રાટ ચૌધરીએ લીધા 24મા મુખ્યમંત્રી તરીકે શપથ
અચાનક વિરોધ હિંસક બની ગયો
નોઈડામાં ચાર દિવસ સુધી શાંતિપૂર્ણ વિરોધ ચાલ્યો હતો. રવિવારે તો અધિકારીઓ સાથે બેઠક પણ યોજાઈ હતી. પરંતુ સોમવારે અચાનક વિરોધ હિંસક બની ગયો અને 300થી વધુ કંપનીઓમાં તોડફોડ કરવામાં આવી હતી. પોલીસે સ્પષ્ટ કર્યું છે કે આ હિંસા પાછળ બહારના તત્વો અને સંગઠિત ષડયંત્રની સંભાવના છે. વધુ તપાસ ચાલુ છે.
