PM મોદીની અધ્યક્ષતામાં નીતિ આયોગની બેઠક : અર્થવ્યવસ્થા પર ફોકસ

પ્રધાનમંત્રી નરેન્દ્ર મોદી આજે દિલ્હીના ભારત મંડપમ ખાતે નીતિ આયોગની એક મહત્વપૂર્ણ બેઠકની અધ્યક્ષતા કરશે. ભારતીય સશસ્ત્ર દળોએ પાકિસ્તાન અને પીઓકેમાં 9 આતંકવાદી ઠેકાણાઓનો નાશ કર્યા પછી, વડા પ્રધાન અને તમામ રાજ્યોના મુખ્યમંત્રીઓ વચ્ચે આ પહેલી મોટી વાતચીત છે.

નીતિ આયોગના નિવેદન અનુસાર, બેઠકમાં વિકસિત ભારતના લક્ષ્યને પ્રાપ્ત કરવા માટે 'ટીમ ઇન્ડિયા' તરીકે તમામ રાજ્યો સાથે કામ કરવાની વડા પ્રધાનની પ્રતિબદ્ધતા પર ભાર મૂકવામાં આવ્યો.

બેઠકમાં અર્થતંત્ર પર ધ્યાન કેન્દ્રિત
આ બેઠકનો મુખ્ય ઉદ્દેશ્ય અર્થતંત્ર પર ધ્યાન કેન્દ્રિત કરવાનો રહેશે. અધિકારીના જણાવ્યા અનુસાર, આ બેઠકમાં બજેટ 2025-26માં લેવામાં આવેલી પહેલ અને ભારતીય અર્થતંત્ર સામેના પડકારો પર પણ ચર્ચા થવાની અપેક્ષા છે.

અમેરિકાના રાષ્ટ્રપતિ ડોનાલ્ડ ટ્રમ્પના વહીવટીતંત્ર દ્વારા લાદવામાં આવેલા ટેરિફને કારણે ભારતીય અર્થતંત્ર મુશ્કેલીઓનો સામનો કરી રહ્યું છે. અમેરિકાની અર્થવ્યવસ્થા મંદી તરફ આગળ વધી રહી છે, ચીનના વિકાસ દરમાં તીવ્ર ઘટાડો અને વૈશ્વિક સ્તરે દેશોમાં આર્થિક પ્રવૃત્તિઓમાં મંદી આવવાની શક્યતા હોવા છતાં, ચાલુ નાણાકીય વર્ષમાં ભારતનો વિકાસ દર 6.2થી 6.7 ટકાની રેન્જમાં રહેવાની ધારણા છે.

આંતરરાષ્ટ્રીય નાણાકીય ભંડોળ (IMF) અને વિશ્વ બેંકે અનિશ્ચિત વાતાવરણ અને ઉચ્ચ વેપાર તણાવને ટાંકીને 2025-26 માટે ભારતના વિકાસ દરનો અંદાજ ઘટાડીને અનુક્રમે 6.2 અને 6.3 ટકા કર્યો છે.

ગયા વર્ષે 10 રાજ્યોએ બેઠકમાં ભાગ લીધો ન હતો

તમને જણાવી દઈએ કે, નીતિ આયોગની ટોચની સંસ્થા, ગવર્નિંગ કાઉન્સિલમાં તમામ મુખ્યમંત્રીઓ, કેન્દ્રશાસિત પ્રદેશોના ઉપરાજ્યપાલો અને કેન્દ્રીય મંત્રીઓનો સમાવેશ થાય છે. પીએમ મોદી નીતિ આયોગના અધ્યક્ષ છે. ગયા વર્ષે, 10 રાજ્યો અને કેન્દ્રશાસિત પ્રદેશોએ નીતિ આયોગ ગવર્નિંગ કાઉન્સિલની બેઠકમાં ભાગ લીધો ન હતો.