Banaskantha News: દીકરી નિક્ષાનું સાહસ અને પર્યાવરણ પ્રત્યેની તેની સંવેદનશીલતા ખરેખર પ્રશંસનીય અને પ્રેરણાદાયી છે. આ ગૌરવશાળી શબ્દો બનાસકાંઠા જિલ્લા કલેક્ટર શ્રી મિહિર પટેલના છે, જેમણે માત્ર ૮ વર્ષની ઉંમરે હિમાલયની કઠિન ઊંચાઈઓને આંબી લેનાર પાલનપુરની દીકરી નિક્ષા બારોટને બિરદાવી હતી.
માત્ર 7 દિવસના ટૂંકા ગાળામાં માઉન્ટ એવરેસ્ટ બેઝ કેમ્પ સર કરીને વૈશ્વિક સ્તરે બનાસકાંઠા સહિત સમગ્ર ગુજરાતનું નામ રોશન કરનાર નિક્ષા બારોટે તાજેતરમાં બનાસકાંઠા જિલ્લા કલેક્ટર મિહિર પટેલની શુભેચ્છા મુલાકાત લીધી હતી. પાલનપુર સ્થિત કલેક્ટર કચેરી ખાતે યોજાયેલી આ મુલાકાત દરમિયાન કલેક્ટરશ્રીએ દીકરી નિક્ષાની આ અસાધારણ અને અદભુત સાહસિક સિદ્ધિને હૃદયપૂર્વક બિરદાવી, તેને સન્માનિત કરી હતી.
સુરતમાં કચરામાંથી મળ્યું 1 દિવસનું નવજાત શિશુ : CCTV તપાસમાં જે સામે આવ્યું એ જોઈ પોલીસ પણ ચકરાઈ ગઈ
કલેક્ટર દ્વારા યાદગાર પ્રતિકૃતિ આપી પ્રોત્સાહન
મુલાકાત દરમિયાન કલેકટર મિહિર પટેલે બાળ ગૌરવ નિક્ષાને એક યાદગાર પ્રતિકૃતિ અર્પણ કરી પ્રોત્સાહિત કરી હતી. તેમણે નિક્ષા સાથે અત્યંત આત્મીય સંવાદ સાધીને હિમાલયના જોખમી અને કઠિન ટ્રેકિંગના અનુભવો વિશે રસપૂર્વક પૂછપરછ કરી હતી. નાની ઉંમરે દેશભક્તિ અને પર્યાવરણ પ્રત્યેની આવી અદભુત સંવેદનશીલતા જોઈને કલેક્ટરશ્રી અભિભૂત થયા હતા અને તેમણે નિક્ષા તથા તેના પરિવારને ઉજ્જવળ ભવિષ્ય માટે અનેકવિધ શુભેચ્છાઓ પાઠવી હતી.
કેવી રહી નિક્ષાની એવરેસ્ટ બેઝ કેમ્પ સુધીની સફર?
નિક્ષાની આ સિદ્ધિ કોઈ ચમત્કારથી ઓછી નથી. તેના ટ્રેકિંગ રૂટ પર એક નજર કરીએ તો યાત્રાની શરૂઆત ૧૬ મેના રોજ લુકલાથી આ કપરી સફર શરૂ થઈ. માત્ર એક સપ્તાહમાં (૭ દિવસ) આશરે 130 કિલોમીટરથી વધુનું અંતર કાપીને ૧૭,૫૯૮ ફૂટની ઊંચાઈ પર આવેલો એવરેસ્ટ બેઝ કેમ્પ સર કર્યો. માઇનસ ડિગ્રીની હાડથીજવતી ઠંડી, ઓક્સિજનની ભારે અછત અને પથ્થરીલા-પહાડી રસ્તાઓ.
વૈશ્વિક મંચ પર દેશભક્તિ અને પર્યાવરણનો સંદેશ
એવરેસ્ટ બેઝ કેમ્પ પર પહોંચીને નિક્ષાએ ગર્વભેર રાષ્ટ્રગાન ગાયું હતું. આ ઉપરાંત, તેણે ત્યાં યોગાભ્યાસ કર્યો હતો અને 'Save Nature' (કુદરત બચાવો), 'Save Himalayas' (હિમાલય બચાવો) તેમજ 'Fit India, Green India' (ફિટ ઈન્ડિયા, ગ્રીન ઈન્ડિયા)** જેવા પ્લેકાર્ડ પ્રદર્શિત કરીને વૈશ્વિક સ્તરે પર્યાવરણ જાગૃતિનો અનોખો સંદેશ આપ્યો હતો.
સિદ્ધિઓનું ભાથું: અગાઉ પણ કરી ચૂક્યા છે અદભુત સાહસો
૮ વર્ષની નિક્ષા માટે આ પ્રકારનું સાહસ નવું નથી. નાની ઉંમરે તે અગાઉ પણ અનેક રેકોર્ડ પોતાના નામે કરી ચૂકી છે. ૬ વર્ષની ઉંમરે કઠિન ગણાતો કેદારકાંઠા ટ્રેક સફળતાપૂર્વક સર કર્યો. બાળપણમાં અરુણાચલ પ્રદેશથી શરૂ કરીને ગુજરાત સુધીની લાંબી સાયકલ યાત્રા પૂર્ણ કરી. ૮ વર્ષની ઉંમરે માઉન્ટ એવરેસ્ટ બેઝ કેમ્પ (૧૭,૫૯૮ ફૂટ) સર કર્યો. નિક્ષાની આ નવીનતમ અને ઐતિહાસિક સફળતાથી સમગ્ર બનાસકાંઠા જિલ્લામાં અને ગુજરાતભરમાં ગૌરવ અને આનંદની લાગણી વ્યાપી ગઈ છે. નાની વયે હિમાલયને પડકારનારી આ દીકરી આજે હજારો યુવાનો માટે પ્રેરણા સ્ત્રોત બની ગઈ છે.
