ઘણા દિવસોથી ગુમ થયેલી ભારતીય મહિલાનો મૃતદેહ મળતાં અમેરિકામાં સનસનાટી મચી ગઈ છે. પોલીસે જણાવ્યું હતું કે 27 વર્ષીય ભારતીય મહિલા નિકિતા ગોડિશ્લાનો મૃતદેહ મેરીલેન્ડમાં તેના એક્સ બોયફ્રેન્ડના એપાર્ટમેન્ટમાંથી મળી આવ્યો હતો. તેના શરીર પર છરાના ઊંડા ઘા હતા. હોવર્ડ કાઉન્ટી પોલીસે એક્સ બોયફ્રેન્ડ પર હત્યાનો આરોપ લગાવ્યો છે.
અહેવાલો અનુસાર, નિકિતાના એક્સ બોયફ્રેન્ડ, અર્જુન શર્માએ 2 જાન્યુઆરીએ પોલીસમાં ગુમ થયાની ફરિયાદ નોંધાવી હતી. અર્જુન શર્માએ અધિકારીઓને જણાવ્યું હતું કે તેણે છેલ્લે 31 ડિસેમ્બરે ટ્વીન રિવર્સ રોડના 10100 બ્લોકમાં તેના એપાર્ટમેન્ટમાં નિકિતાને જોઈ હતી.
જોકે, અધિકારીઓએ જણાવ્યું હતું કે તપાસ દરમિયાન એવું બહાર આવ્યું હતું કે રિપોર્ટ નોંધાવ્યા પછી તરત જ અર્જુન શર્મા ભારત ભાગી ગયો હતો. પોલીસે જણાવ્યું હતું કે અર્જુન શર્માએ તે જ દિવસે ફ્લાઇટ લીધી હતી. પોલીસે અર્જુન શર્મા પર ફર્સ્ટ અને સેકન્ડ ડિગ્રી મર્ડરનો આરોપ લગાવ્યો છે અને ધરપકડ વોરંટ જારી કર્યું છે. પોલીસને શંકા છે કે 31 ડિસેમ્બરે સાંજે 7 વાગ્યા પછી નીકીતાની હત્યા કરવામાં આવી હતી.
હત્યાનો હેતુ હજુ સુધી જાણી શકાયો નથી. પોલીસના નિવેદનમાં કહેવામાં આવ્યું છે કે, "શર્માએ 31 ડિસેમ્બરના રોજ સાંજે 7 વાગ્યા પછી નીકીતાની હત્યા કરી હતી. તપાસ ચાલુ છે અને હાલમાં હત્યાનો કોઈ હેતુ નક્કી થયો નથી." પોલીસે જણાવ્યું હતું કે તપાસ ચાલુ છે અને હોવર્ડ કાઉન્ટી પોલીસ શર્માને શોધવા અને ધરપકડ કરવા માટે યુએસ એજન્સીઓ સાથે કામ કરી રહી છે.
