NIAના 8 રાજ્યોમાં 15 સ્થળોએ દરોડા : પાકિસ્તાન જાસૂસી કેસમાં તપાસ તેજ, હવે નથી કોઈની ખેર

રાષ્ટ્રીય તપાસ એજન્સી (NIA) એ શનિવારે પાકિસ્તાન સાથે જોડાયેલા જાસૂસી કેસના સંદર્ભમાં દેશભરના આઠ રાજ્યોમાં 15 સ્થળોએ મોટા પાયે સર્ચ ઓપરેશન હાથ ધર્યું. NIA એ દિલ્હી, મહારાષ્ટ્ર, હરિયાણા, ઉત્તર પ્રદેશ, રાજસ્થાન, છત્તીસગઢ, આસામ અને પશ્ચિમ બંગાળ રાજ્યોમાં પાકિસ્તાની ગુપ્તચર એજન્સીઓ (PIO) સાથે જોડાયેલા શંકાસ્પદોના ઠેકાણાઓ પર દરોડા પાડ્યા. CRPF જવાન મોતી રામ જાટની પૂછપરછ કર્યા પછી NIA એ આ કાર્યવાહી કરી.

પાકિસ્તાન ગુપ્તચર ઓપરેટિવ્સ (PIO) સાથે જોડાયેલા શંકાસ્પદોના ઠેકાણાઓ પર આ દરોડા પાડવામાં આવ્યા હતા. આ દરમિયાન NIA ટીમોએ વિવિધ સ્થળોએથી ઘણા ઇલેક્ટ્રોનિક ગેજેટ્સ અને સંવેદનશીલ નાણાકીય દસ્તાવેજો તેમજ અન્ય વાંધાજનક સામગ્રી જપ્ત કરી છે. ભારત વિરોધી આતંકવાદી ષડયંત્રના ભાગ રૂપે પાકિસ્તાન સ્થિત ઓપરેટિવ્સ દ્વારા ચલાવવામાં આવી રહેલા જાસૂસી રેકેટના સંકેતો મેળવવા માટે તેમની સંપૂર્ણ તપાસ કરવામાં આવી રહી છે. જેથી પાકિસ્તાનના ઈશારે ચાલી રહેલા આ જાસૂસી ષડયંત્રનો સંપૂર્ણ પર્દાફાશ થઈ શકે.

તેઓ પાકિસ્તાનને સંવેદનશીલ માહિતી મોકલતા હતા
NIA તપાસ મુજબ, શનિવારે (31 મે) હાથ ધરાયેલી સર્ચમાં જે શંકાસ્પદોને નિશાન બનાવવામાં આવ્યા હતા તેમના પાકિસ્તાની ઓપરેટિવ્સ સાથે સંબંધો હતા. તેમના પાકિસ્તાની ઓપરેટિવ્સ સાથે જોડાણ હતું અને તેઓ ભારતમાં જાસૂસી પ્રવૃત્તિઓ કરવા માટે પૈસાની આપ-લે કરી રહ્યા હતા. આ લોકો ભારતની સુરક્ષા સંબંધિત સંવેદનશીલ માહિતી પાકિસ્તાનને મોકલતા હતા. માહિતી લીક કરવાના બદલામાં, બધા આરોપીઓને ભારતમાં અલગ અલગ માધ્યમથી પૈસા મળ્યા હતા.જેની તપાસ ચાલી રહી છે.

NIA એ CRPF જવાનની ધરપકડ કરી
NIA એ 20 મેના રોજ સેન્ટ્રલ રિઝર્વ પોલીસ ફોર્સ (CRPF) ના જવાન મોતી રામ જાટની પાકિસ્તાની ગુપ્તચર અધિકારીઓ સાથે ગુપ્ત માહિતી શેર કરવાના આરોપમાં ધરપકડ કરી હતી. પહેલગામ આતંકવાદી હુમલા પહેલા આ જવાન ત્યાં તૈનાત હતો. હુમલાના પાંચ દિવસ પહેલા મોતીરામની પહેલગામથી બદલી કરવામાં આવી હતી. તપાસમાં જાણવા મળ્યું છે કે તે 2023 થી પાકિસ્તાનને મહત્વપૂર્ણ માહિતી મોકલી રહ્યો હતો અને બદલામાં તેને ભારતમાં કેટલીક ચેનલો દ્વારા પૈસા મળી રહ્યા હતા.

આ કેસમાં, NIA એ BNS 2023 ની કલમ 61(2), 147, 148, ઓફિશિયલ સિક્રેટ્સ એક્ટ 1923 ની કલમ 3 અને 5 અને UAPA 1967 ની કલમ 18 હેઠળ કેસ નોંધ્યો છે. હાલમાં, NIA આ કેસની તપાસ સતત આગળ ધપાવી રહી છે.