Netflix : આજકાલ ડિજિટલ પ્લેટફોર્મ પર સસ્પેન્સ અને થ્રિલર ફિલ્મો જોવાનો ક્રેઝ ખૂબ જ વધી ગયો છે. લોકોને એવી વાર્તાઓ જોવી વધુ ગમે છે જે તેમના મગજને કસરત કરાવે અને છેલ્લી મિનિટ સુધી અસલી રહસ્ય છુપાવી રાખે. ઓટીટી પ્લેટફોર્મ નેટફ્લિક્સ (Netflix) પર આવી ફિલ્મોનો એક મોટો ખજાનો ઉપલબ્ધ છે. આ ફિલ્મોની કહાની એટલી દમદાર હોય છે કે તે તમને શરૂઆતથી લઈને છેક છેલ્લે સુધી સ્ક્રીન સામે પકડી રાખે છે. જો તમે પણ વીકએન્ડમાં કંઈક એવું જોવા માંગો છો જે તમને રોમાંચથી ભરી દે, તો આજે અમે તમને 6 એવી સસ્પેન્સ થ્રિલર ફિલ્મો વિશે વિગતવાર જણાવીશું, જે તમારું મગજ ચકરાવે ચડાવી દેશે.
1. જાને જાન – મગજ ઘુમાવી દે તેવું રહસ્ય
કરીના કપૂર ખાનની આ ઓટીટી ડેબ્યુ ફિલ્મ હતી, જે પ્રખ્યાત જાપાનીઝ નોવેલ 'ધ ડેવોશન ઓફ સસ્પેક્ટ એક્સ' પર આધારિત છે. ફિલ્મ 'જાને જાન' વર્ષ 2023 માં નેટફ્લિક્સ પર રિલીઝ થઈ હતી અને તેણે રિલીઝ થતાની સાથે જ ધૂમ મચાવી દીધી હતી. વાર્તાની વાત કરીએ તો, આમાં કરીના કપૂર એક સિંગલ મધરના રોલમાં છે જે પોતાની દીકરીને બચાવવા માટે એક મોટી મુશ્કેલીમાં ફસાઈ જાય છે. ફિલ્મમાં જયદીપ અહલાવતે એક સામાન્ય દેખાતા પણ અતિશય ચાલાક ગણિતના શિક્ષકની ભૂમિકા ભજવી છે, જ્યારે વિજય વર્મા આ કેસની તપાસ કરતા પોલીસ ઓફિસરના રોલમાં છે. સુજોય ઘોષના શાનદાર ડાયરેક્શન હેઠળ બનેલી આ ફિલ્મમાં એક પછી એક એવા ટ્વિસ્ટ આવે છે કે તમે ક્લાઈમેક્સ સુધી સાચો અંદાજ લગાવી જ નહીં શકો.
2. દેવા – એક્શન અને સસ્પેન્સનો જબરદસ્ત હાઈ ડોઝ
વર્ષ 2025 માં સિનેમાઘરોમાં રિલીઝ થયા બાદ શાહિદ કપૂરની આ મોસ્ટ અવેટેડ ફિલ્મ 'દેવા' હવે નેટફ્લિક્સ પર ધમાલ મચાવી રહી છે. આ ફિલ્મમાં શાહિદ કપૂરનો એક તદ્દન અલગ અને આક્રમક અંદાજ જોવા મળે છે, જેમાં તે એક ડેશિંગ અને નિયમો તોડનારા પોલીસ ઓફિસરની ભૂમિકામાં છે. ફિલ્મની વાર્તા એક હાઈ-પ્રોફાઈલ કેસની આસપાસ ફરે છે, જેમાં સસ્પેન્સની સાથે જબરદસ્ત એક્શન સીન્સ પણ જોવા મળે છે. પૂજા હેગડે અને પવૈલ ગુલાટી જેવા કલાકારોએ પણ ફિલ્મમાં ખૂબ જ મહત્વના રોલ પ્લે કર્યા છે. આ ફિલ્મના ડાયરેક્ટર પ્રખ્યાત સાઉથ ફિલ્મમેકર રોશાન એન્ડ્રયુઝ છે, જેમણે વાર્તાની ગતિ એટલી ફાસ્ટ રાખી છે કે તમને એક સેકન્ડ માટે પણ કંટાળો નહીં આવે.
Batwara 1947: પાર્ટિશન ના એ દર્દનાક સંઘર્ષની અજાણી સત્ય ઘટના પર બનશે ફિલ્મ
3. હસીન દિલરુબા – પ્રેમ, ઈર્ષ્યા અને ગુનાની અનોખી વાર્તા
તાપસી પન્નુ, વિક્રાંત મૈસી અને હર્ષવર્ધન રાણે સ્ટારર ફિલ્મ 'હસીન દિલરુબા' વર્ષ 2021 માં નેટફ્લિક્સ પર રિલીઝ થઈ હતી અને તે બોલિવૂડની સૌથી ચર્ચિત રોમેન્ટિક-થ્રિલર ફિલ્મોમાંથી એક બની ગઈ હતી. આ ફિલ્મ માત્ર એક મર્ડર મિસ્ટ્રી નથી પરંતુ તેમાં પ્રેમ અને પાગલપનની એક અનોખી વાર્તા વણાયેલી છે. ડાયરેક્ટર વિનીલ મૈથ્યુએ વાર્તાને પલ્પ ફિક્શન નવલકથાની શૈલીમાં રજૂ કરી છે, જેમાં વારંવાર આવતા ટ્વિસ્ટ દર્શકોને ચોંકાવી દે છે. આ ફિલ્મ લોકોને એટલી બધી પસંદ આવી હતી કે તેની લોકપ્રિયતા જોઈને મેકર્સે વર્ષ 2024 માં તેની સિક્વલ 'ફિર આઈ હસીન દિલરુબા' પણ રિલીઝ કરી હતી, જેને પણ દર્શકો તરફથી જોરદાર રિસ્પોન્સ મળ્યો હતો.
4. દો પત્તી – ડબલ રોલ અને કોર્ટરૂમનો ડ્રામા
બોલિવૂડની સીનિયર એક્ટ્રેસ કાજોલ અને કૃતિ સેનની જોડીથી સજ્જ ફિલ્મ 'દો પત્તી' 25 ઓક્ટોબર 2024 ના રોજ નેટફ્લિક્સ પર સિધ્ધિ રિલીઝ કરવામાં આવી હતી. આ ફિલ્મની ખાસ વાત એ છે કે કૃતિ સેનને પોતાના કરિયરમાં પહેલીવાર આ મૂવીમાં ડબલ રોલ (જોડિયા બહેનો) ભજવ્યો છે, જેમાં એક બહેન ખૂબ જ માસૂમ છે અને બીજી અત્યંત ચાલાક છે. કાજોલ આ ફિલ્મમાં એક પોલીસ ઓફિસરની સાથે એક વકીલના રોલમાં ન્યાય માટે લડતી જોવા મળે છે. શશાંકા ચતુર્વેદીના ડાયરેક્શનમાં બનેલી આ ફિલ્મ કૌટુંબિક હિંસા અને રહસ્યના તાણાવાણાથી વણાયેલી છે. રસપ્રદ વાત એ પણ છે કે આ ફિલ્મને કૃતિ સેનને પોતે જ પ્રોડ્યુસ કરી છે, જે તેના કરિયરનો એક મોટો ટર્નિંગ પોઈન્ટ સાબિત થઈ છે.
5. બદલા – દરેક સીન પર અણધાર્યા માઇન્ડ ગેમ્સ
બોલિવૂડના મહાનાયક અમિતાભ બચ્ચન અને તાપસી પન્નુની સુપરહિટ સસ્પેન્સ ફિલ્મ 'બદલા' સિનેમાઘરોમાં મોટી સફળતા મેળવ્યા બાદ નેટફ્લિક્સ પર પણ બ્લોકબસ્ટર સાબિત થઈ છે. આ ફિલ્મમાં અમૃતા સિંહ પણ એક શાનદાર અને શક્તિશાળી ભૂમિકામાં જોવા મળે છે. ફિલ્મની વાર્તા એક બંધ રૂમમાં થતા સંવાદો પર આધારિત છે, જ્યાં અમિતાભ બચ્ચન એક ડિફેન્સ લોયર તરીકે તાપસી પન્નુ પર લાગેલા મર્ડરના આરોપની તપાસ કરે છે. ડાયરેક્ટર સુજોય ઘોષની આ ફિલ્મમાં સત્ય અને જૂઠ વચ્ચે એવી પાતળી રેખા દોરવામાં આવી છે કે છેલ્લી સેકન્ડ સુધી દર્શકો પણ ગોથે ચડી જાય છે. જો તમને મગજ ઘુમાવી દે તેવી ફિલ્મો ગમતી હોય, તો આ મૂવી તમારા માટે બેસ્ટ ઓપ્શન છે.
દેવ આનંદના આ 2 કલ્ટ ગીતો પર સરકારે લગાવ્યો હતો પ્રતિબંધ: જ્યારે દેવ આનંદના 2 લોકપ્રિય ગીતો પર સરકારે રોક લગાવી હતી, જાણો સમગ્ર કહાની
6. રાત અકેલી હૈ – અંધારા રહસ્યોની રોમાંચક મર્ડર મિસ્ટ્રી
નેટફ્લિક્સની સૌથી અદભુત અને ક્લાસિક સસ્પેન્સ ફિલ્મોમાં 'રાત અકેલી હૈ' નું નામ ખૂબ જ આદર સાથે લેવામાં આવે છે. નવાઝુદ્દીન સિદ્દીકી અને રાધિકા આપ્ટે સ્ટારર આ ફિલ્મ એક હાઈ-પ્રોફાઈલ મર્ડર મિસ્ટ્રી પર આધારિત છે, જેની શરૂઆત એક મોટા જમીનદારના ખૂનથી થાય છે. આ જમીનદાર પોતાના લગ્નની રાત્રે જ પોતાના જ ઘરમાં માર્યો જાય છે. નવાઝુદ્દીન સિદ્દીકી એક નાના શહેરના પોલીસ ઓફિસર 'જટિલ યાદવ' ના રોલમાં આ કેસ હાથમાં લે છે. જેમ જેમ તપાસ આગળ વધે છે, તેમ તેમ ઘરના દરેક સભ્ય પર શંકાની સોય ફરે છે. હની ત્રેહાનના ડાયરેક્શનમાં બનેલી આ ફિલ્મનો ક્લાઈમેક્સ એટલો અણધાર્યો છે કે તે તમને લાંબા સમય સુધી વિચારતા કરી મૂકશે.
