સેન્સર બોર્ડનો ચોંકાવનારો નિર્ણય: કૃતિ સેનનની કરિયરની પ્રથમ અડલ્ટ રેટેડ ફિલ્મ
બોલિવૂડ કલાકારો શાહિદ કપૂર, કૃતિ સેનન અને નેશનલ ક્રશ રશ્મિકા મંદાનાની આગામી ફિલ્મ 'કૉકટેલ 2' (Cocktail 2) ને લઈને એક મોટા સમાચાર સામે આવ્યા છે. સેન્સર બોર્ડ (CBFC) દ્વારા આ ફિલ્મને જોયા બાદ તેને 'A' એટલે કે અડલ્ટ સર્ટિફિકેટ (Adult Certificate) આપવામાં આવ્યું છે. સેન્સર બોર્ડના આ નિર્ણયથી ફિલ્મ ઇન્ડસ્ટ્રી અને ફેન્સ બંને ઘણા આશ્ચર્યચકિત થયા છે.
નોંધનીય છે કે અભિનેત્રી કૃતિ સેનનના આખા કરિયરની આ પહેલી 'A' રેટેડ ફિલ્મ છે, જ્યારે રશ્મિકા મંદાના માટે આ બીજી વખત છે જ્યારે તેની કોઈ ફિલ્મને આવું સર્ટિફિકેટ મળ્યું હોય.
રશ્મિકા મંદાના અને 'A' સર્ટિફિકેટનું લકી કનેક્શન
રશ્મિકા મંદાના માટે 'A' સર્ટિફિકેટ મળવું એ બોક્સ ઓફિસ પર ગુડ લક સાબિત થઈ શકે છે. આ પહેલાં વર્ષ 2023 માં રિલીઝ થયેલી રશ્મિકા અને રણબીર કપૂરની મેગા બ્લોકબસ્ટર ફિલ્મ 'એનિમલ' (Animal) ને પણ સેન્સર બોર્ડ તરફથી 'A' સર્ટિફિકેટ આપવામાં આવ્યું હતું. ભારે હિંસા અને બોલ્ડ કન્ટેન્ટ હોવા છતાં 'એનિમલ' ફિલ્મે બોક્સ ઓફિસ પર છપ્પરફાડ કમાણી કરીને ઇતિહાસ રચ્યો હતો.
હવે જોવાનું એ રહેશે કે શું 'A' સર્ટિફિકેટ અને રશ્મિકાનું આ કનેક્શન 'કૉકટેલ 2' માટે પણ તેટલું જ ભાગ્યશાળી સાબિત થાય છે કે નહીં.
ફિલ્મ અને તેના પ્રમોશનલ ઇવેન્ટની ચર્ચા
'કૉકટેલ 2' એક હાઈ-પ્રોફાઈલ પ્રોજેક્ટ છે, જેમાં શાહિદ કપૂરની સાથે કૃતિ અને રશ્મિકાની જોડી પ્રથમ વખત મોટા પડદા પર ધમાલ મચાવવા તૈયાર છે. તાજેતરમાં જ ફિલ્મના એક પ્રમોશનલ ઇવેન્ટ દરમિયાન ભારે ભીડ એકઠી થઈ હતી, જ્યાં શાહિદ કપૂર ભીડને સંભાળતા જોવા મળ્યા હતા અને કૃતિ સેનન પણ રશ્મિકા મંદાનાને સુરક્ષિત રીતે બહાર નીકાળવામાં મદદ કરતી જોવા મળી હતી. આ ઇવેન્ટનો વીડિયો પણ સોશિયલ મીડિયા પર ઘણો વાયરલ થયો હતો.
