આમિર ખાન પ્રોડક્શન્સની 25મી વર્ષગાંઠ પર મુંબઈમાં ભવ્ય સેલિબ્રેશન
બોલિવૂડના મિસ્ટર પરફેક્શનિસ્ટ આમિર ખાનની આઇકોનિક ફિલ્મ 'લગાન' રિલીઝ થયાને 25 વર્ષ પૂરા થયા છે. આ ખાસ અવસર અને 'આમિર ખાન પ્રોડક્શન્સ' (AKP) ની 25મી વર્ષગાંઠ નિમિત્તે મુંબઈમાં શનિવારે એક ભવ્ય પાર્ટીનું આયોજન કરવામાં આવ્યું હતું. આ સેલિબ્રેશનમાં સલમાન ખાન, કરીના કપૂર, કાજોલ, જુહી ચાવલા અને રેખા સહિત બોલિવૂડના અનેક મોટા સ્ટાર્સે હાજરી આપી હતી.
સલમાન ખાનનો નવો લુક સોશિયલ મીડિયા પર વાયરલ
પાર્ટીમાં સૌથી વધુ ચર્ચા સલમાન ખાનના લુકની થઈ હતી. સલમાન ખાન એકદમ અલ્ટ્રા-શોર્ટ હેર લુક (ઝીણા વાળ) સાથે રેડ કાર્પેટ પર પહોંચ્યો હતો, જેને જોઈને ત્યાં હાજર કરીના કપૂર પણ આશ્ચર્યચકિત થઈ ગઈ હતી. રેડ કાર્પેટ પર સલમાને આમિર અને કરીના સાથે પાપારાઝીને પોઝ આપ્યા હતા. આ ઇવેન્ટમાં આમિર ખાનની પૂર્વ પત્ની કિરણ રાવ, દીકરી ઇરા ખાન અને જમાઈ પણ હાજર રહ્યા હતા.
કાજોલ અને જુહી ચાવલાએ આમિરની મજાક ઉડાવી
ઇવેન્ટ દરમિયાન સ્ટેજ પર જુહી ચાવલા અને કાજોલે આમિર ખાનની જોરદાર મજાક ઉડાવી હતી. જુહીએ આમિરના વખાણ કરતા કહ્યું કે, તેની પ્રોડક્શન કંપનીએ હંમેશાં બેસ્ટ ફિલ્મોની પસંદગી કરી છે, જે તેનો સારો ટેસ્ટ દર્શાવે છે. આ વાત પર કાજોલે તરત જ કટાક્ષ કરતા મજાકમાં ઉમેર્યું કે, "આમિરનો ફિલ્મોની સાથે-સાથે મહિલાઓની બાબતમાં પણ ટેસ્ટ ઘણો સારો રહ્યો છે." જુહીએ આમિર સાથેની તેની પહેલી ફિલ્મ યાદ કરતા હસતા હસતા કહ્યું કે, "જુઓ, જેણે મારી સાથે કરિયરની શરૂઆત કરી, તે આજે ક્યાં પહોંચી ગયો!"
'લગાન' ફિલ્મનો ઓસ્કર સુધીનો ઈતિહાસ
વર્ષ 2001 માં રિલીઝ થયેલી અને આશુતોષ ગોવારિકર દ્વારા નિર્દેશિત 'લગાન' ભારતીય સિનેમાની સૌથી યાદગાર ફિલ્મોમાંની એક છે. આ ફિલ્મમાં બ્રિટિશ શાસન દરમિયાન ચંપાનેર ગામના યુવાન 'ભુવન' (આમિર ખાન) ની વાર્તા છે, જે ગામનો 3 વર્ષનો કર માફ કરાવવા અંગ્રેજોનો ક્રિકેટ ચેલેન્જ સ્વીકારે છે.
આ ફિલ્મમાં ગ્રેસી સિંહ, પોલ બ્લેકથોર્ન અને રશેલ શેલીએ પણ મુખ્ય ભૂમિકા ભજવી હતી. A. R. Rahman ના સંગીતવાળી આ ફિલ્મને ઓસ્કર એવોર્ડ્સમાં 'શ્રેષ્ઠ વિદેશી ભાષાની ફિલ્મ' ની કેટેગરીમાં નોમિનેશન મળ્યું હતું. અંદાજે Rs 25 કરોડના બજેટમાં બનેલી આ ફિલ્મે તે સમયે બોક્સ ઓફિસ પર વર્લ્ડવાઇડ Rs 65 કરોડથી વધુની કમાણી કરી નવો રેકોર્ડ બનાવ્યો હતો.
