ખેડૂતો અને વિદ્યાર્થીઓને આંદોલનમાં જોડાવા સ્થાપક અભિજીત દીપકેની અપીલ; શિક્ષણ મંત્રીના રાજીનામાની માંગ
NEET પેપર લીક અને પરીક્ષામાં ગેરરીતિઓના વિરોધમાં કોકરોચ જનતા પાર્ટી (CJP) દ્વારા દિલ્હીના જંતર-મંતર પર શરૂ કરાયેલું પ્રદર્શન સોમવારે સતત ત્રીજા દિવસે પણ ચાલુ રહ્યું છે. આ આંદોલનનું નેતૃત્વ કરી રહેલા CJPના સ્થાપક અભિજીત દીપકેએ દેશભરના ખેડૂતો અને NEET રી-એક્ઝામ આપનારા વિદ્યાર્થીઓને આ પ્રદર્શનમાં જોડાવા માટે ભાવુક અપીલ કરી છે. પ્રદર્શનકારીઓ કેન્દ્રીય શિક્ષણ મંત્રી ધર્મેન્દ્ર પ્રધાનના તાત્કાલિક રાજીનામાની માંગ પર અડગ છે.
પોલીસથી ડરવાની જરૂર નથી: અભિજીત દીપકે
અભિજીત દીપકેએ સોશિયલ મીડિયા પર એક વીડિયો જાહેર કરીને જણાવ્યું છે કે જંતર-મંતર પર દેશભરમાંથી હજારો લોકો પહોંચી રહ્યા છે અને આ પ્રદર્શન સમય સાથે વધુ મજબૂત બની રહ્યું છે. તેમણે પ્રદર્શનકારીઓને પ્રોત્સાહિત કરતા કહ્યું કે, "પોલીસથી ડરવાની કોઈ જરૂર નથી, તેઓ આપણી સાથે જ છે."
આ અગાઉ રવિવારે તેમણે ખેડૂત સમુદાયને સંબોધતા કહ્યું હતું કે, જ્યારે ભૂતકાળમાં ખેડૂતો પોતાના અધિકારો માટે લડી રહ્યા હતા ત્યારે વિદ્યાર્થીઓએ તેમને સાથ આપ્યો હતો. હવે સમય આવ્યો છે કે ખેડૂતો વિદ્યાર્થીઓના સમર્થનમાં આગળ આવે. આ સાથે જ તેમણે રવિવારે યોજાયેલી NEET રી-એક્ઝામના ઉમેદવારોને પણ પરીક્ષા પૂર્ણ થયા બાદ આંદોલનમાં જોડાવા માટે આમંત્રણ આપ્યું હતું.
પરવાનગી પૂર્ણ થવા છતાં રાતભર ચાલ્યું ધરણાં પ્રદર્શન
દિલ્હી પોલીસ દ્વારા આ પ્રદર્શન માટે માત્ર શનિવારે સાંજે 5 વાગ્યા સુધીની જ મંજૂરી આપવામાં આવી હતી. સમય મર્યાદા સમાપ્ત થયા બાદ પોલીસે પ્રદર્શનકારીઓને જગ્યા ખાલી કરવા વિનંતી કરી હતી, પરંતુ પ્રદર્શનકારીઓએ ત્યાંથી હટવાનો સાફ ઇનકાર કરી દીધો હતો. પરિણામે, કડક સુરક્ષા વચ્ચે પ્રદર્શનકારીઓ રાતભર જંતર-મંતર પર જ ધરણાં પર બેસી રહ્યા હતા.
પ્રદર્શન સ્થળે સુવિધાઓ અંગે ગંભીર આરોપો
અભિજીત દીપકેએ દિલ્હી પોલીસ અને વહીવટીતંત્ર પર ગંભીર આરોપો લગાવ્યા છે. તેમણે જણાવ્યું કે, જે લોકો પ્રદર્શનકારીઓને ખાવા-પીવાની સામગ્રી કે ફળ-જ્યુસ આપીને મદદ કરી રહ્યા છે, પોલીસ તેમની પાસેથી ઓળખપત્ર (આધાર કાર્ડ) માંગી રહી છે અને તેમના સરનામાની પૂછપરછ કરીને પરેશાન કરી રહી છે.
આ ઉપરાંત, તેમણે સોશિયલ મીડિયા પ્લેટફોર્મ X પર સરકારી અધિકારીઓને અપીલ કરતા લખ્યું કે, જંતર-મંતર પ્રદર્શન સ્થળના જાહેર શૌચાલયોમાં શનિવાર રાતથી પાણીનો પુરવઠો બંધ કરી દેવામાં આવ્યો છે. પ્રદર્શનકારીઓએ એવો પણ દાવો કર્યો હતો કે રાત્રિના સમયે થોડીવાર માટે વીજળી ગુલ કરી દેવામાં આવી હતી, જેના કારણે શૌચાલયનો ઉપયોગ કરવામાં અને અન્ય પ્રાથમિક સુવિધાઓ મેળવવામાં ભારે મુશ્કેલી પડી હતી.
39 દિવસમાં 16 વિદ્યાર્થીઓના આપઘાતથી રોષ
પેપર લીક અને પરીક્ષાઓ રદ્દ થવાના કારણે દેશના યુવા ધનમાં ભારે હતાશા વ્યાપી ગઈ છે. છેલ્લા 39 દિવસમાં દેશભરમાં NEET પરીક્ષા સંબંધિત તણાવના કારણે 16 વિદ્યાર્થીઓએ આત્મહત્યા કરી લીધી છે. તાજેતરમાં જ હૈદરાબાદમાં 19 વર્ષની ઉમેદવાર શેખ સનાએ આપઘાત કર્યો હતો, જેની સુસાઈડ નોટ પરથી સ્પષ્ટ થાય છે કે તે NEET રી-એક્ઝામના ભારે માનસિક દબાણ હેઠળ હતી. સીજેપીએ માંગ કરી છે કે આત્મહત્યા કરનારા વિદ્યાર્થીઓના પરિવારોને ₹1 કરોડનું વળતર આપવામાં આવે.
સુપ્રીમ કોર્ટની ટિપ્પણીથી સોશિયલ મીડિયા પાવરહાઉસ બની CJP
કોકરોચ જનતા પાર્ટી (CJP)ની સ્થાપના પાછળ એક રસપ્રદ કિસ્સો છે. 15 મેના રોજ એક કેસની સુનાવણી દરમિયાન ચીફ જસ્ટિસ સૂર્યકાંતે ટિપ્પણી કરી હતી કે કેટલાક બેરોજગાર યુવાનો 'કોકરોચ' જેવા હોય છે, જેઓ પાછળથી મીડિયા, સોશિયલ મીડિયા કે RTI એક્ટિવિસ્ટ બનીને સિસ્ટમ પર હુમલો કરે છે.
આ ટિપ્પણીના વિરોધમાં વળતો પ્રહાર કરવા માટે, અમેરિકામાં વસતા 30 વર્ષીય ડિજિટલ મીડિયા સ્ટ્રેટેજિસ્ટ અભિજીત દીપકે 16 મેના રોજ 'કોકરોચ જનતા પાર્ટી'ની શરૂઆત કરી. મૂળ મહારાષ્ટ્રના સંભાજી નગરના રહેવાસી અને પુણેથી પત્રકારત્વનો અભ્યાસ કરનાર અભિજીત અગાઉ આમ આદમી પાર્ટી (AAP) સાથે પણ જોડાયેલા રહ્યા છે અને હાલમાં બોસ્ટન યુનિવર્સિટીમાંથી પબ્લિક રિલેશન્સમાં માસ્ટર્સ કરી રહ્યા છે.
આ પાર્ટીએ સોશિયલ મીડિયા પર અભૂતપૂર્વ સફળતા મેળવી છે:
કેન્દ્રીય શિક્ષણ મંત્રીના રાજીનામા માટે શરૂ કરાયેલી ઓનલાઈન પિટિશનને 8,00,000 થી વધુ લોકોએ સમર્થન આપ્યું છે.
10 જૂન સુધીમાં CJPના ઇન્સ્ટાગ્રામ પર 2,27,00,000 ફોલોઅર્સ થઈ ગયા હતા, જે ભાજપના 94,00,000 અને કોંગ્રેસના 1,37,00,000 ફોલોઅર્સ કરતાં પણ વધારે છે.
માઇક્રોબ્લોગિંગ પ્લેટફોર્મ X પર પણ CJPના 2,79,00,000 ફોલોઅર્સ નોંધાયા છે.
વિદ્યાર્થીઓ અને યુવાનો આ ડિજિટલ મૂવમેન્ટને હવે જંતર-મંતર પર ગ્રાઉન્ડ રિયાલિટી બનાવીને શિક્ષણ વ્યવસ્થામાં સુધારાની લડત લડી રહ્યા છે.
