"દમ હૈ તો રોક કે દિખા શેખાવત" : લખેલી બોલેરો પિકઅપ સાથે ખેરના લાકડાં ઝડપાયા, બે આરોપી રિમાન્ડ પર

Narmada News: ગુજરાત વન વિભાગ દ્વારા લાકડા ચોરો અને તસ્કરો સામે લાલ આંખ કરવામાં આવી છે. નર્મદા જિલ્લાના સાગબારા વન વિભાગે ફિલ્મી સ્ટાઇલમાં થતી લાકડાની તસ્કરીનો પર્દાફાશ કરીને મોટી સફળતા મેળવી છે. "પુષ્પા" ફિલ્મની મોડસ ઓપરેન્ડી (છુપાવવાની પદ્ધતિ) અપનાવીને કિંમતી લાકડાની હેરાફેરી કરતા બે ઇસમોને વન વિભાગે મુદ્દામાલ સાથે દબોચી લીધા છે.

વન વિભાગની સપાટો: બાતમીના આધારે વોચ ગોઠવી

મળતી માહિતી મુજબ, સાગબારાના રેન્જ ફોરેસ્ટ ઓફિસર (RFO) પી. એ. ચૌધરીને કિંમતી લાકડાની ગેરકાયદેસર હેરાફેરી થવાની ખાનગી બાતમી મળી હતી. આ બાતમીના આધારે આર.એફ.ઓ.ના માર્ગદર્શન હેઠળ વન વિભાગની ટીમે પાટ ગામ નજીક વોચ ગોઠવી હતી.

રાજકોટ મનપા: 3 દરખાસ્તો સાથેની બેઠકમાં 72 હજાર વૃક્ષોને મંજૂરી : સરેરાશ ₹92 ખર્ચાશે એક વૃક્ષ પાછળ

આ દરમિયાન ત્યાંથી પસાર થઈ રહેલી એક શંકાસ્પદ બોલેરો પિકઅપ વાનને ટીમે અટકાવી હતી. આ વાહનની પાછળના ભાગે એક મોટો પડકાર ફેંકતું વાક્ય લખેલું હતું. "દમ હૈ તો રોક કે દિખા શેખાવત". વન વિભાગે આ પડકારને ઝીલીને ગાડીને રોકી તપાસ હાથ ધરી હતી.

'પુષ્પા' સ્ટાઇલમાં સંતાડ્યા હતા કિંમતી લાકડાં

જ્યારે વન વિભાગની ટીમે MH 03 CP 5997 નંબરની આ બોલેરો પિકઅપની તલાશી લીધી, ત્યારે અધિકારીઓ પણ ચોંકી ગયા હતા. વાહનમાં ખૂબ જ ચાલાકીથી, ફિલ્મી સ્ટાઇલમાં સંતાડીને રાખેલા સાગ, ખેર અને શામળા જેવા પ્રતિબંધિત અને અત્યંત કિંમતી લાકડાંનો જથ્થો મળી આવ્યો હતો.

પ્રાથમિક પૂછપરછમાં સામે આવ્યું છે કે, તસ્કરો આ કિંમતી લાકડાનો જથ્થો મહારાષ્ટ્રના કાકડીઆંબા ગામ તરફથી લાવીને પાટ વિસ્તારમાં સગેવગે કરવાની ફિરાકમાં હતા. વન વિભાગે પકડાયેલા આરોપીઓની કડક પૂછપરછ કરતાં અન્ય એક સ્થળેથી પણ છુપાવી રાખેલો લાકડાનો જથ્થો મળી આવ્યો હતો, જેને વન વિભાગે કબજે કર્યો છે.

સુરત ખાડી પૂર મુદ્દે ધારાસભ્યના તંત્ર સામે ગંભીર આક્ષેપ : કાયમી ઉકેલ માટે આયોજનની ઉઠી માંગ

બે આરોપીઓની ધરપકડ, કોર્ટે મંજૂર કર્યા રિમાન્ડ

વન વિભાગે આ ગેરકાયદેસર હેરાફેરીના મામલામાં બે શખ્સોની અટકાયત કરી છે:

1. સંજય ગંગારામ પાડવી (ઉંમર: 32 વર્ષ)

2. મનીષ જિતેન્દ્ર પાડવી (ઉંમર: 34 વર્ષ)

બંને આરોપીઓ સામે વન કાયદાની વિવિધ કલમો હેઠળ ગુનો નોંધી કાયદેસરની કાર્યવાહી હાથ ધરવામાં આવી છે. વન વિભાગ દ્વારા બંને આરોપીઓને નામદાર કોર્ટ સમક્ષ રજૂ કરવામાં આવ્યા હતા, જ્યાં કોર્ટે ગુનાની ગંભીરતાને ધ્યાનમાં રાખીને આરોપીઓના 17 કલાકના રિમાન્ડ મંજૂર કર્યા છે.

સુરતમાં વરસાદનો કહેર : ગોડાદરા–પર્વત પાટિયા માર્ગ ખાડીના પાણીમાં ગરક, 300થી વધુ લોકોનું રેસ્ક્યુ

નેટવર્ક ભેદવા તપાસ તેજ

હાલમાં વન વિભાગ રિમાન્ડ દરમિયાન આરોપીઓની સઘન પૂછપરછ કરી રહ્યું છે. આ સમગ્ર નેટવર્ક પાછળ કોણ મુખ્ય સૂત્રધાર છે? લાકડાનો આ જથ્થો ક્યાંથી કાપવામાં આવ્યો હતો અને તેને ક્યાં સપ્લાય કરવાનો હતો? તેમજ આ તસ્કરીના કાળા કારોબારમાં અન્ય કેટલા ઇસમો સંડોવાયેલા છે, તે તમામ દિશાઓમાં તપાસના ચક્રો ગતિમાન કરવામાં આવ્યા છે.