મૃત્યુઆંકમાં સતત વધારો : ભૂકંપ પછી હવે મૃત્યુઆંક પહોંચ્યો 2 હજારને પાર

મ્યાનમારમાં આવેલા શક્તિશાળી ભૂકંપમાં મૃત્યુઆંક ફરી વધ્યો છે. સરકારે સોમવારે (31 માર્ચ, 2025) નવા આંકડા જાહેર કર્યા હતા આ પ્રચંડ ભૂકંપમાં મૃત્યુ પામેલા લોકોની સંખ્યા વધીને 2,056 થઈ ગઈ છે અને 3,900થી વધુ લોકો ઘાયલ થયા છે.

મ્યાનમારમાં આવેલા વિનાશક ભૂકંપ માટે એક અઠવાડિયાનો રાષ્ટ્રીય શોક જાહેર કરવામાં આવ્યો હતો. હવે મૃતકોની સંખ્યા 2,000થી વધુ થઈ ગઈ છે. શાસક જુન્ટાએ એક નિવેદનમાં જણાવ્યું હતું કે શુક્રવારે 7.7ની તીવ્રતાના ભૂકંપથી થયેલા જાનહાનિ અને નુકસાન અંગે શોક વ્યક્ત કરવા માટે 6 એપ્રિલ સુધી રાષ્ટ્રધ્વજ અડધા સુધી ઝુકાવવામાં આવશે.

ત્રણ દિવસે જીવીત નીકળી મહિલા

સમાચાર એજન્સી રોયટર્સ અનુસાર, અધિકારીઓએ સોમવારે જણાવ્યું હતું કે એક મહિલાને હોટલના કાટમાળમાંથી બહાર કાઢવામાં આવી છે. ભૂકંપના ત્રણ દિવસ પછી મહિલાને આશાના કિરણ તરીકે જોવામાં આવે છે, કારણ કે બચાવકર્તાઓ શક્ય તેટલા બચી ગયેલા લોકોને શોધવાનો સખત પ્રયાસ કરી રહ્યા છે.

મ્યાનમારમાં ચીની દૂતાવાસે એક ફેસબુક પોસ્ટમાં જણાવ્યું હતું કે, મહિલાને માડંલેમાં ગ્રેટ વોલ હોટલના કાટમાળમાંથી બહાર કાઢવામાં આવી હતી. મહિલાની હાલત સ્થિર હોવાનું જાણવા મળ્યું હતું. 28 માર્ચ, 2025ના રોજ આવેલા ભૂકંપના કેન્દ્રની નજીક છે. ભૂકંપને કારણે મ્યાનમાર તેમજ પડોશી થાઇલેન્ડમાં ભારે નુકસાન થયું હતું.

બેંગકોકમાં ભારે નુકસાન

બેંગકોકમાં ઇમરજન્સી ક્રૂએ સોમવારે નિર્માણાધીન ગગનચુંબી ઈમારત ધરાશાયી થયા બાદ કાટમાળ નીચે દબાયેલા 76 લોકોની શોધ ફરી શરૂ કરી છે. લગભગ ત્રણ દિવસ પછી, ભય વધી રહ્યો હતો કે બચાવકર્તાઓને વધુ મૃતદેહો મળશે, જેના કારણે થાઇલેન્ડમાં મૃત્યુઆંકમાં ભારે વધારો થઈ શકે છે. રવિવાર સુધીમાં થાઇલેન્ડમાં મૃત્યુઆંક 18 હતો.